ޢަލީގެ ޙަޔާތުން އުއްމީދުގެ އަލިކަން ނިއްވާލީ އެމެރިކާ ކޯލިޝަނުން

އަފްޣާނިސްތާނުގެ އިރުމަތީ ލޫޣާރް ޕްރޮވިންސްގެ އަވަށަކަށް ނިސްބަތްވާ ޢަލީ އާޣާ ވާގި ނެތިފައި އޮންނަތާ މިހާރު 10 އަހަރަށްވުރެ ގިނަ ދުވަސް ވެދާނެއެވެ. އެ ޙާލު އޭނާއަށް ޖެހުނީ އެމެރިކާ އިސްވެ އޮވެ އަފްޣާނިސްތާނުގައި ހަރަކާތްތެރިވި އަސްކަރީ ކޯލިޝަނުން ދިން ބަޑީގެ ޙަމަލާއަކާ ގުޅިގެންނެވެ. ނަމަވެސް، އެކަމުގެ ޒިންމާ އުފުލި މީހަކު އަދާ ޖެހުނުއިރުވެސް ނެތެވެ. ދިރިއުޅުން އެފުށް މިފުށަށް ޖެހެން ދޫކޮށްލީއެވެ.

ބަޑީގެ ޙަމަލާއާއެކު ޢަލީގެ މޭކަށިގަނޑުގެ ތިރިން ވާގި ދިޔައެވެ. މިއަދު އޭނައަށް އެނދުމަތީގައި އިށީނދެލައި ހެދެނީވެސް ބޮލާ ދިމާއިން މަތީގައި އެލުވާފައި އޮންނަ ރޯނުގަނޑެއްގެ އެހީގައެވެ. ޙަމަލާއަށް 10 އަހަރު ފާއިތުވެގެން ދިޔައިރު ޢަލީގެ ޙަޔާތުގައި އުއްމީދުގެ އަލިކަމެއް ނެތް ފަދައެވެ. މީގެ 12 ވަރަކައަށް އަހަރު ދުވަސް ކުރީގެ ހަނދާންތަކާއި ތަޖުރިބާތައް ކިޔައިދެމުން ދިޔަ އޭނާގެ ހަށިގަނޑުގައި ދައުރުވަމުން ދިޔަ ޖަޒުބާތަކަކީ އެހެން މީހަކަށް ބަޔާން ކޮށްދެވޭނެ ނުވަތަ ސިފަ ކޮށްދެވޭނެ ކަމެއް ނޫނެވެ.

ޢަލީ ބުނި ގޮތުގައި ބިދޭސީ ސިފައިންގެ ފަރާތުން އޭނާއަށް އެއްވެސް އެހީތެރިކަމެއް ނުލިބުނެވެ. އަވައްޓެރިންގެ އެހީއަށް އެދި ރޮއެ ހަޅޭއްލެވީ ޢަލީގެ މަންމައެވެ. ހޮސްޕިޓަލަށް ގެންދިޔައީވެސް މަންމައެވެ.

ޢުމުރުގައި ބާކީ އޮތް ހުރިހާ ދުވަހަކީވެސް އެނދުމަތިވެފައި އޮތް ޙާލުގައި ގުނަން ޖެހޭ ދުވަސްތަކެއް ކަން އެނގުނު ހިސާބުން ޢަލީގެ ހަތަރު އުދަރެސް ފެނުޖެހިއްޖެ ކަމުގެ އިޙުސާސް އޭނާއަށް ކުރެވުނެވެ.

ޢަލީގެ ބައްޕަ މި ދުނިޔެއާ ވަކިވެދިޔައީ އޭނާގެ ޢުމުރުން ވަރަށް ޅަ އިރުއެވެ. ޢަލީ ބަލައިބޮޑުކުރީ ހަމައެކަނި އޭނާގެ މަންމަގެ މަސައްކަތާއި ހިތްވަރުންނެވެ. ބަޑީގެ ޙަމަލާ އަމާޒުވެ، އެނދުމަތިވާން ޖެހުނުއިރު ޢަލީ ގުނަމުން ދިޔައީ އޭނާގެ ޙަޔާތުގެ ޒުވާން ދުވަސްތަކެވެ. 30ގެ އަހަރުތަކެވެ. އޭރު އެ ޢާއިލާއެއްގެ ހުރިހާ ޚަރަދެއް ބަލަހައްޓަމުން ދިޔައީވެސް ޚުދު އޭނާގެ މަސައްކަތުންނެވެ.

ވާގި ނެތި، ބަލި އެނދުގައި އޮންނަން ޖެހުނު ހިސާބުން، ޢަލީގެ މުޅި ޢާއިލާގެ ދިރިއުޅުންވެސް އަނދަވަޅަކަށް ވެއްޓުނެވެ. ދިރިއުޅުމުގެ ޒަރޫރީ ބޭނުންތައް ފުއްދާލެވޭވަރު ކިރިޔާ ވަނީވެސް ދަރަންޏަށް ފައިސާ ނަގައިގެންނެވެ. އެމެރިކާއާއި އެމެރިކާއަށް އެއްބާރުލުން ދިން އެއްވެސް ބައިވެރިއަކު، ޢަލީއަށް ލޯ ލާރިއެއްގެ މިންވަރުވެސް ދިއްކޮށްނުލައެވެ.

ޢަލީ ސިފަކުރާގޮތުގައި މަކަރާއި ޙީލަތް ހެދުމަކީ އެމެރިކާ ކޯލިޝަނުން އާންމުކޮށް ބޭނުންކުރާ އުކުޅެކެވެ. އަފްޣާނިސްތާނުގައި ޞުލްޙަ ބެލެހެއްޓުމުގެ ނަމުގައި އެ ކޯލިޝަނުން ހިންގަމުން ދިޔައީ ލާއިންސާނީ ޖަރީމާ ނޫން ދެވަނަ ދެކަމެއް ނޫން ކަމަށް އިއްތިފާޤުވާ މީހުންވެސް މަދެއް ނޫނެވެ. އާންމު ރައްޔިތުންގެ އަބުރުވެރި ދިރިއުޅުމަށް ކުޑަނަމަވެސް ފަރުވާލެއް ބެހެއްޓި މަންޒަރު، ކޯލިޝަންގެ ފަރާތުން ނުފެނެއޭވެސް ދެންނެވިދާނެއެވެ.

އެމެރިކާ އިސްވެ އޮވެ އަފްޣާނިސްތާނުގައި ކުރި ދިގު ހަނގުރާމައިގެ އަސަރުތައް ދިގު މުއްދަތަކަށް ދެމިގެންދާނެއެވެ. އަފްޣާނިސްތާނުގެ އެތައް ޖީލަކަށް އެކަމުގެ އަސަރު ފޯރާނެއެވެ.

ހަނގުރާމައިގެ ތެރޭގައި ޢަލީގެ އަވަށަށް ލިބުނު ގެއްލުންތަކުން މިއިން ދުވަހަކު އަރައިގަނެވޭނެ ކަމަކަށް ނުބެލެވެއެވެ. އަނިޔާތަކާއެކު ދިރިއުޅެމުން ދާ އަންހެނުންނާ ކުޑަކުދިންގެ ޢަދަދު ގުނާލަން ދަތިވާހާވެސް ގިނައެވެ. އެތައް ބައެއްގެ ފުރާނަ ވަނީ ގެއްލިފައެވެ.