މޭސަން މައުންޓް ގެނައުމަށް މެންޗެސްޓާ ޔުނައިޓެޑުން ޗެލްސީއާއެކު އެއްބަސްވުމަކަށް އައިސްފައިވާ ކަމަށް ރިޕޯޓްތަކުން ބުނެފިއެވެ.

އެ ރިޕޯޓުތަކުން ބުނާގޮތުން ޔުނައިޓެޑުން ފުރަތަމަ 55 މިލިއަން ޕައުންޑް ދައްކަން ޖެހޭއިރު، އިތުރު ފަސް މިލިއަން ޕައުންޑް އެޑްއޮންގެ ގޮތުގައި ދޭން ޖެހޭނެއެވެ. މައުންޓް މިވަގުތު ޗުއްޓީ ހޭދަކުރަމުން އަންނައިރު، ޔުނައިޓެޑާ އެކު އޭނާގެ މެޑިކަލް އޮންނާނެ ކަމަށް ބެލެވެނީ އަންނަ ހަފުތާގައެވެ.

އިންގްލެންޑުގެ އިންޓަނޭޝަނަލް ކުޅުންތެރިޔާއަށް ޗެލްސީން އެންމެ ފުރަތަމަ ޑިމާންޑް ކުރީ 70 މިލިއަން ޕައުންޑް ދިނުމަށެވެ. ޔުނައިޓެޑުން ކުރި 40 މިލިއަން ޕައުންޑާއި 50 މިލިއަން ޕައުންޑް އަދި 55 މިލިއަން ޕައުންޑުގެ ބިޑްތައް ޗެލްސީން ވަނީ ބާތިލްކޮށްފައެވެ.

އުމުރުން 24 އަހަރުގެ މައުންޓް ޗެލްސީ އާއެކު ހަދާފައިވާ އެއްބަސްވުމުގެ ފަހު އަހަރަށް ވަނުމަށް ތައްޔާރުވަމުން ދަނިކޮށް އާ އެއްބަސްވުމަކާ ގުޅޭ މަޝްވަރާތައް ވަނީ ރޫޅިފައެވެ. އޭނާ ޗެލްސީގައި މަޑުކުރި ނަމަ އަންނަ ހޫނު މޫސުމުގައި ފްރީ އެޖެންޓެއްގެ ގޮތުގައި އޭނާ ވަކިވީހެވެ. އޭނާ ވެގެންދާނީ މެންޗެސްޓާ ޔުނައިޓެޑުން މި ޓްރާންސްފާ މާކެޓުގައި ސޮއިކުރާ ފުރަތަމަ ކުޅުންތެރިޔާއަށެވެ.

މައުންޓް ޗެލްސީ ދޫކޮށްލަނީ އޭނާގެ ކުޑައިރުގެ ކުލަބަށް 195 މެޗު ކުޅެދީފައެވެ. އޭނާ އަކީ 2021 ވަނަ އަހަރު ތޯމަސް ޓުޗެލްގެ އިރުޝާދުގެ ދަށުން ޗެމްޕިއަންސް ލީގު ކާމިޔާބުކުރި ޓީމުގައި ހިމެނުނު ކުޅުންތެރިއެކެވެ.

ޔުނައިޓެޑާ އެކު އަމިއްލަ ޝަރުތުތަކަށް އެއްބަސްވެފައިވާ މައުންޓް ދެން މެޑިކަލް ހަދަން ނިންމާފައިވާއިރު، ޖުލައި މަހުގެ 20 ވަނަ ދުވަހު ނިއު ޔޯކްގައި ފަށާ ޕްރީސީޒަން ޓުއާގައި ޓެން ހޭގްގެ ސްކޮޑުގައި ހިމެނޭނެ އެވެ.

ޖުލައި މަހުގެ 12 ވަނަ ދުވަހު އޮސްލޯގައި ލީޑްސް ޔުނައިޓެޑާ ދެކޮޅަށް ކުޅޭ އެކުވެރިކަމުގެ މެޗުގައި މައުންޓް ފެންނާނެ ކަމަށް ބެލެވެއެވެ.