އެކްސިޑެންޓްވެ ވެއްޓިފައި އޮންނަ މީހާ ނަގަންވާނީ ކަނދުރާ ނުގުޑާގޮތަށް، ނެގޭ ގޮތަކުން ފުރާނަ ގޮސްދާނެ: ޑރ.ފައިސަލް

އެކްސިޑެންޓެއް ނުވަތަ އަނިޔާއެއްވެގެން ވެއްޓިފައި އޮންނަ މީހާ ނެގުމުގައި ޚާއްސަ ސަމާލުކަމެއް ދިނުމަށް އައިޖީއެމްއެޗްގެ ކުޑަކުދިންގެ ޚާއްސަ ޑރ. އަހުމަދު ފައިސަލް އިލްތިމާސްކުރައްވައިފިއެވެ.

ޑރ.ފައިސަލް ވިދާޅުވީ އެކްސިޑެންޓެއްފަދަ އަނިޔާއެއްވެ ހޭނެތިގެން މަގުމައްޗަށް ވެއްޓިފައިއޮންނަ މީހާ ނަގަންވާނީ ކަނދުރާ ނުގުޑާގޮތަށް ކަމަށާއި، އަވަސް އަވަހަށް އޭނާ ހޮސްޕިޓަލަށް ގެންދަން އަތާއިފައިގަ ހިފާފަ ހިއްލާލުމުން ބިނދިފައޮތް ކަނދުރާއެއް ގުޑާ ފުރާނައަށް ނުރައްކާވެދާނެ ކަމަށް ޑރ.ފައިސަލް ވިދާޅުވިއެވެ.

ޑރ.ފައިސަލް ވިދާޅުވީ ވެއްޓިފައި އޮންނަމީހާ އަވަހަށް ހޮސްޕިޓަލަށް ގެންދަން އެންމެން ބޭނުންވާ ކަމަށެވެ. ނަމަވެސް މިކަން ކުރުމުގެ ކުރިން ވިސްނާލަންޖެހޭ ކަމަށް ޑރ.ފައިސަލް ވިދާޅުވިއެވެ.

މީގެ އިތުރުން ޑރ.ފައިސަލް ވަނީ މިފަދަ ހާލަތެއްގައި އަމަލުކުރަންޖެހޭ ގޮތް ފެންނަ ވީޑިއޯއެއް ވެސް ސޯޝަލް މީޑިއާގައި އާއްމުކުރައްވާފައެވެ. އަދި އެގޮތްތައް ދަސްކުރުމަށް ޑރ.ފައިސަލް އިލްތިމާސްކުރެއްވިއެވެ.

އެކްސިޑެންޓެއް ނުވަތަ އަނިޔާއެއްވެގެން ވެއްޓިފައި އޮންނަ މީހާ ނެގުމުގައި ޚާއްސަ ސަމާލުކަމެއް ދިނުމަށް ދޭންޖެހޭ ކަމަށް ޑރ.ފައިސަލް ވިދާޅުވެފައިވާއިރު، މި މުޖުތަމައުގައި ވެސް ހިނގާ ނުރައްކާތެރި އެކްސިޑެންޓްތަކުގައި އެގޮތަށް ބެލުމެއް ނެތި އަނިޔާވެފައި އޮންނަ މީހާ ނަގައިގެން ހޮސްޕިޓަލަށް ގެންގޮސްފައިވެއެވެ. ބޮޑަށް އިސްކަން ދެވެނީ އެމީހާ ހޮސްޕިޓަލަށް ގެންދިއުމަށް ކަމަށް ބައެއް އާއްމުންގެ ފަރާތަކުން ބުނެފައިވެއެވެ.

މީގެ އިތުރުން މިމަހުގެ 28 ވީ ބުދަ ދުވަހު ވެސް މާލޭގައި ހިނގި ނުރައްކާތެރި އެކްސިޑެންޓްގައި އަނިޔާވި މީހެއް ނަގާގެން ގެންދާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ވަނީ އާއްމުވެފައެވެ.