ބްރެޒިލްގެ ރާނީ އަނެއްކާވެސް ވޯލްޑްކަޕަށް ތައްޔާރު

ބްރެޒިލްގެ މަޝްހޫރު ފޯވަޑް އަދި ރާނީގެ ނަމުން މަޝްހޫރުކަން ހޯދާފައިވާ މާޓާ ވިއޭރާ ޑަސިލްވާ، ކުރިއަށް އޮތް އަންހެނުންގެ ވޯލްޑްކަޕް ކުޅެން ތައްޔާރުވެއްޖެއެވެ.

އޮސްޓްރޭލިޔާއާއި ނިއުޒީލޭންޑްގައި އަންނަ މަހުގެ 20ގައި ފަށާ ވޯލްޑްކަޕަށް ދާ ޓީމުގައި މާޓާ ހިމަނާފައިވާއިރު، އޭނާގެ އުމުރަކީ 37 އަހަރެވެ. އަދި މިއީ އޭނާގެ ހަވަނަ ވޯލްޑްކަޕެވެ. މާޓާ އަކީ ހަ ފަހަރު ދުނިޔޭގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ ކުޅުންތެރިއެކެވެ. އަދި ވޯލްޑްކަޕުގައި އެންމެ ގިނަ ގޯލު ޖެހީ ވެސް އޭނާއެވެ. އެއީ 17 ގޯލެވެ. ފިރިހެނުންގެ ވޯލްޑްކަޕުގައި ވެސް އެންމެ ގިނައިން އެއް ކުޅުންތެރިއަކު ޖަހާފައިވަނީ 16 ގޯލެވެ.

ބްރެޒިލްގެ ކޯޗު ޕިއާ ސުންދާގޭ ބުނީ މާޓާއަކީ ގައުމުގެ ފުޓްބޯޅައިގެ ރާނީ ކަމަށާއި، އޭނާ ޓީމުގައި ހުރުމަކީ ވަރަށް ބޮޑު ހިތްހަމަޖެހުމެއް ކަމަށެވެ.

ފިރިހެނުންގެ ވޯލްޑްކަޕުގައި އެންމެ ކާމިޔާބު ގައުމަކީ ބްރެޒިލްއެވެ. ނަމަވެސް އަންހެން މުބާރާތް އަދި ބްރެޒިލްއަށް ކާމިޔާބު ނުކުރެއެވެ. މި ފަހަރުގެ މުބާރާތުގައި ބްރެޒިލް ހިމެނެނީ ފްރާންސް، ޖެމެއިކާ އަދި ޕެނަމާއާ އެއް ގްރޫޕެއްގައެވެ.