ސިޔާސަތަކީ ޝަރުތު ހަމަވާ އެންމެންނަށް ކުރިއަށް އޮތްތަނުގައި ގޯތި ދިނުން، 19000ށްވުރެ ގިނަ މީހުން ޝަރުތު ހަމަވޭ: އަސްލަމް

ސަރުކާރުގެ ސިޔާސަތަކީ "ބިންވެރިޔާ" ސްކީމްގެ ދަށުން ގޯއްޗަށް އެދި ކުރިމަތިލި ފަރާތްތަކުގެ ތެރެއިން ޝަރުތު ހަމަވާ އެންމެންނަށް ގޯތި ދިނުން ކަމަށް، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން އަސްލަމް ވިދާޅުވީ، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހުގެ ވިސްނުންފުޅަކީ ގޯއްޗަށް އެދި ކުރިމަތިލީ ވީހާވެސް ގިނަ ފަރާތްތަކަށް ގޯތި ލިބޭނޭ މަގު ހޯއްދަވައިދެއްވުން ކަމަށެވެ. އެހެންކަމުން "ބިންވެރިޔާ" ސްކީމްގެ ދަށުން ދޭ 5000 ގޯތި ލިބޭ މީހުންގެ ލިސްޓު ހޯމަ ދުވަހު ހާމަކުރިނަމަވެސް، ބާކީ ތިބި ޝަރުތު ހަމަވާ މީހުންނަށްވެސް ކުރިއަށް އޮތްތަނުގައި ގޯތި ދިނުމަަކީ ސަރުކާރުގެ ވިސްނުން ކަމަށް އަސްލަމް ވަނީ ވިދާޅުވެފައެވެ. ބިންވެރިޔާ ސްކީމްގެ ދަށުން ގޯއްޗަށް އެދި 23000ށްވުރެ ގިނަ މީހުން ފޯމް ހުށަހަޅާފައިވާ ކަމަށާއި، އެއީ ޖުމްލަ 15164 ފޯމެވެ. ފޯމު ހުށަހެޅި މީހުންގެ ތެރެއިން 19000ށްވުރެ ގިނަ މީހުންނަކީ ގޯތި ލިބުމުގެ ޝަރުތު ހަމަވާ މީހުން ކަމަށްވެސް އަސްލަމް ވިދާޅުވިއެވެ. އަސްލަމް ވިދާޅުވީ "ބިންވެރިޔާ" ސްކީމްގެ ދަށުން ދޫކުރާ 5000 ގޯތި, 10314 މީހަކަށް ލިބޭނެކަމަށެވެ. އަދި އިތުރު 9544 މީހުންނަކީ ގޯތި ލިބުމަށް ޝަރުތުހަމަވާ ފަރާތްތައް ކަމަށް އަސްލަމް ވިދާޅުވިއެވެ.

އަސްލަމް ވިދާޅުވިގޮތުގައި ގޯތީގެ ސައިޒު ކަނޑައަޅާފައިވަނީ އެޕްލިކަންޓުންގެ އަދަދަށް ބެލުމަށް ފަހުގައެވެ. އެހެންކަމުން ގިނަ މީހުންގެ ނަމުގައި ހުށަހަޅާފައިވާ ފޯމްތަކަށް ލިބޭ ގޯތީގެ ސައިޒު، އެންމެ މީހެއްގެ ނަމުގައި ހުށަހަޅާފައިވާ ފޯމަށް ލިބޭ ގޯތިތަކަށްވުރެ ސައިޒުން ބޮޑުވާނެ ކަމަށް އަސްލަމް ވިދާޅުވިއެވެ. މީގެ އިތުރުން މިފަަދަ ސްކީމެއްގެ އެންމެ މުހިންމު ބޭނުމަކީ ގޯތިގެދޮރު ނެތި ތިބި މާލޭގެ ރައްޔިތުންނަށް ބޯހިޔާވަހިކަން ހޯދައިދިނުން ކަމަށެވެ. އަދި ބޯހިޔާވަހިކަމުގެ މައްސަލައަކީ ހައްލު ނުލިބި ގިނަ ދުވަސްވެފައިވާ މައްސަލައެއްކަމުން މި މައްސަލަ ހައްލުކުރުމަކީ އުނދަނގޫ ކަމެއްކަން އަސްލަމް ވަނީ ފާހަގަކުރައްވާފައެވެ.

އަސްލަމް ވަނީ ގޯތި ދިނުމުގެ މަސައްކަތް ކުރިއަށް ގެންގޮސްފައި ވަނީ ވަރަށް އިންސާފުވެރިކަމާއެކު ކަމަށްވެސް ވިދާޅުވެފައެވެ. އެމަނިކުފާނު ވިދާޅުވީ މި މަރުހަލާ ކުރިއަށް ގެންދިޔައީ ވަރަށް ރަނގަޅަށް ކަމަށެވެ.

ޝަރުތު ހަމަނުވާ މީހުންނަށް ގޯތި ނުލިބޭ ސަބަބު "ގެދޮރުވެރިން" ޕޯޓަލް މެދުވެރިކޮށް އެނގެން ހުންނާނެކަމަށް އަސްލަމް ވަނީ ވިދާޅުވެފައެވެ. މި ސްކީމުގެ ދަށުން ގޯތި ދޫކުރަން ކަނޑައަޅައިފައިވާ ބިމުގެ ޖުމްލަ ބޮޑުމިނަކީ 3.7 މިލިއަން އަކަފޫޓެވެ. މިނިސްޓްރީން ބުނެފައި ވަނީ، ދޫކުރާ ގޯތީގެ އަދަދު ކަނޑައަޅާނީ ގޯތި ދޭން ހޮވާ ވަކިވަކި އެޕްލިކޭޝަންތަކަށް ދޫކުރާނެ ގޯތީގެ ބޮޑުމިން ކަނޑައެޅުމަށްފަހު ކަމަށާއި، ހޯމަ ދުވަހު ގެޒެޓްކުރި ގޯތި ލިބޭ މީހުންގެ 5،000 މީހުންގެ ލިސްޓަކީ "ލައިވް" ނުވަތަ އަޕްޑޭޓްކުރަމުން ދާނެ ލިސްޓެއް ކަމަށް ޕްލޭނިންގ މިނިސްޓްރީން ވަނީ ބުނެފައެވެ. އަދި އެ ލިސްޓުގައިވާ އެންމެންނަށް ގޯތި ލިބުމާ ހަމައަށް އެ މަސައްކަތް ކުރިއަށްދާނެ ކަމަށް މިނިސްޓްރީން ބުނެއެވެ.

މާލެއިން ގޯތި ނުދޭތާ އެތައް އަހަރުތަކެއް ފަހުން އެ މަސައްކަތް ފަށާފައިވަނީ މި ސަރުކާރުންނެވެ. އެގޮތުން ރައީސް އިބްރާހީމް މުހައްމަދު ސާލިހުގެ ސަރުކާރުން ޚާއްސަ އިސްކަމެއް ދެއްވައިގެން، މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ހައްލުކޮށްދެއްވުމަށް ބިން ދޫކުރުމަށް ނިންމަވައި، އެކަމާގުޅޭ މަސައްކަތްތައް ދަނީ ކުރަމުންނެވެ.