ދެވަނަ ބިޑު ރިޖެކްޓުކުރުމުން، މައުންޓު ހޯދުމަށް ޔުނައިޓެޑުން ތިންވަނަ ބިޑެއް ކޮށްފި

ޗެލްސީއަށް ކުޅެމުން އަންނަ އިންގްލެންޑުގެ ސެންޓްރަލް މިޑްފީލްޑަރު މޭސަން މައުންޓު ހޯދުމަށް، ވާދަވެރި މެންޗެސްޓަރ ޔުނައިޓެޑުން ކުރި ދެވަނަ ބިޑު ރިޖެކްޓުކުރުމުން، ތިންވަނަ ބިޑެއް ކޮށްފައިވާކަމަށް މީޑިއާތަކުން ބުނެފިއެވެ.

މައުންޓު ހޯދުމަށް މިހާތަނަށް ޔުނައިޓެޑުން ކުރި ރަސްމީ ދެ ބިޑުވެސް ޗެލްސީން ވަނީ ރިޖެކްޓުކޮށްފައެވެ. ސަބަބަކީ ޗެލްސީން ބޭނުންވާވަރުގެ އަގެއް ޔުނައިޓެޑުން ހުށަނާޅާތީއެވެ. ނަމަވެސް މިހާރު ޔުނައިޓެޑުން ވަނީ ރަސްމީކޮށް ތިންވަނަ ބިޑެއް ކޮށްފައިކަމަށް މީޑިއާތަކުން ބުނެއެވެ. އަދި އެއީ މައުންޓު ހޯދުމަށް ޔުނައިޓެޑުން ކުރާނެ ފައިނަލް ބިޑު ކަމަށްވެސް ވަނީ ބުނެފައެވެ. ކުރީ ފަހަރުގެ ދެ ބިޑާ ޚިލާފަށް، ތިންވަނަ ބިޑުގައި ކޮންމެވެސް ވަރެއްގެ ބަދަލުތަކެއް ގެނެސްފައިވާކަމަށް ބުނެއެވެ. އެހެންކަމުން ތިންވަނަ ބިޑަށް ޗެލްސީން ގަބޫލުވުމުގެ ފުރުސަތު ބޮޑެވެ. މައުންޓު ހޯދުމަށް ޔުނައިޓެޑުން ރަސްމީކޮށް ބިޑުކޮށްފައިވަނީ، ކުޅުންތެރިޔާއާއެކު އެެއްބަސްވުމަަކަށް އާދެވުމުންނެވެ. މައުންޓު ބޭނުންވަނީ ޗެލްސީ ދޫކޮށްލުމަށެވެ. ނަމަވެސް އެއްބަސްވުމުގައި ބާކީ އެއް އަހަރު އޮތުމުން, ހިލޭ ޓްރާންސްފަރއެއްގައި ދެވޭގޮތެއް ނުވާނެއެވެ. އެހެންކަމުން ޗެލްސީން މައުންޓު ދޫކޮށްލާނީ އެކުލަބުން ބޭނުންވާ އަގެއް ދޭން ޔުނައިޓެޑުން ގަބޫލުވާނަމައެވެ.

މައުންޓު އޭނާގެ ސީނިއަރ ކެރިއަރު ޗެލްސީން ފެށީ 2017 ވަނަ އަހަރުއެވެ. އޭގެ ފަހުން އޭނާ ވަނީ ލޯނު އެއްބަސްވުމެއްގެ ދަށުން ދެ ކުލަބަކަށް ކުޅެފައެވެ. އެއީ 2017އިން 2018އަށް ވިޓޭސްއަށް، އަދި 2018އިން 2019އަށް ޑާބީ ކައުންޓީއަށެވެ. އެއަށްފަހު އޭނާ ވަނީ އެނބުރި ޗެލްސީއަށް އައިސްފައެވެ. މައުންޓު ވަނީ ޗެލްސީއަށް މިހާތަނަށް ޖުމުލަ ކުޅެދިން 195 މެޗުގައި 33 ލަނޑު ޖަހާފައެވެ. އެ ކުލަބާއެކު އޭނާ ވަނީ ތިން ތައްޓެއް ކާމިޔާބުކޮށްފައެވެ. އެއީ ޔުއެފާ ޗެމްޕިއަންސް ލީގު، ޔުއެފާ ސުޕަރ ކަޕް އަދި ފީފާ ކުލަބު ވޯލްޑް ކަޕެވެ. މީގެ އިތުރުން އެފްއޭ ކަޕްގެ ފައިނަލްގައި ތިންފަހަރު, އަދި ކަރަބޯ ކަޕްގެ ފައިނަލްގައި އެއް އަހަރު ވަނީ ކުޅެފައެވެ.