ނަޝީދު އެމްޑީޕީން ވަކިވެވަޑައިގެންފި
21 ޖޫން 2023 | ބުދަ 09:00ނަޝީދު ވަނީ ބުދަ ދުވަހު ޓްވިޓަރ ގައި ސިޓީއެއް ހިއްސާ ކުރައްވާފައި
ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް މުޙައްމަދު ނަޝީދު
ރައްޔިތުންގެ މަޖިލީހުގެ ރައީސް، އަދި އެމްޑީޕީގެ ރައީސް މުޙައްމަދު ނަޝީދު ވެރިކަން ކުރާ މައިޕާޓީ އެމްޑީޕީން ވަކިވެވަޑައިގެންފިއެވެ.
އެމްޑީޕީން ވަކިވެވަޑައިގެންނެވިކަން ނަޝީދު ވަނީ ބުދަ ދުވަހު ޓްވިޓަރ ގައި ސިޓީއާއެކު ހިއްސާ ކުރައްވާފައެވެ.
ސިޓީގައި ނަޝީދު ވިދާޅުވެފައިވަނީ، ރާއްޖޭގައި މިވަގުތު ކަންކަން ހިނގަމުންދާ ގޮތަށް ބަލާއިރު، އެމްޑީޕީގައި ހުންނެވުން އެއީ އެންމެ ރަނގަޅު ގޮތްކަމަށް ދެކިވަޑައިނުގަންނަވާ ކަމަށާއި، ވުމާއެކު، ޕާޓިން ވަކިވެވަޑައިގަންނަވާ ކަމަށެވެ.
މީގެ ކުރިން ނަޝީދު ވަނީ އެމަނިކުފާނު އެމްޑީޕީގައި ހުންނެވި ސަބަބަކީ އެ ޕާޓީ އަނބުރާ ހޯއްދެއްވުމަށް ކަމަށް ވިދާޅުވެފައެވެ.
އެމްޑީޕީގެ ޗެއަރޕަރސަން ފައްޔާޒު އިސްމާއިލް ވަނީ އެމްޑީޕީއާއި އެމްޑީޕީގެ މެމްބަރުންގެ ނަމުގައި ނަޝީދަށް ކާމިޔާބީއަށް އެދިލައްވާފައެވެ.
މިއީ ހިތާމަވެރި ދުވަހެއް ނަމަވެސް، މިއީ ކޮންމެ ޕާޓީއަކުންވެސް އެބަޔަކު އަމިއްލައަށް ކުރިއަށްދާން ބޭނުންވި މަގުން ކުރިއަށް ދިއުމަށް ފަހިގެންދާ ދުވަހެއްގެ ގޮތުގައިވެސް ފައްޔާޒު ސިފަ ކުރެއްވިއެވެ.
ފައްޔާޒު ވަނީ ނަޝީދު އެމްޑީޕީއަށް ކޮށްދެއްވި ޚިދުމަތްތައް ފާހަގަ ކުރައްވައި އެކަމަށް ޝުކުރު އަދާ ކުރައްވާފައެވެ.
އެމްޑީޕީގައި ހުންނަވައި "ދި ޑިމޮކްރަޓެސް " އުފެއްދެވުމުގައި ނަޝީދު ޙަރަކާތްތެރިވަމުންދާއިރު، އެކަމާ އެމްޑީޕީގެ ގިނަ މެމްބަރުން ފާޑުވިދާޅުވަމުން ގޮސްފައިވެއެވެ.
ދާދި ފަހުން މަޖިލިސް އިދާރާގައި ބޭއްވި ނޫސްވެރިންގެ ބައްދަލުވުމުގައި ނަޝީދު ވަނީ، އެމްޑީޕީގައި ހުންނަވަނީ ސީދާ އެ ނިޔަތުގައިކަމަށް ވިދާޅުވެފައެވެ.
އެމްޑީޕީގެ ހުރިހާ މެންބަރުންނަށް ވެސް އެނގިވަޑައިގަންނަަވަން ޖެހޭ، އަޅުގަނޑު މި ތަނުގައި ހުރެ، ހަމަ މި ޕާޓީ އެކީގައި، ޑިމޮކްރެޓުންނާ އެކީގައި، ކަންކަން ނިންމަމުން އިރާދަކުރެއްވިއްޔާ މި ރާއްޖޭގައި އަދި ދާނެ،" ނަޝީދު ވިދާޅުވި އެވެ.
