ކެރަމް އެސޯސިއޭޝަން އޮފް މޯލްޑިވްސް (ސީއޭއެމް) އިން މުޅިން އަލަށް ބޭއްވި ވެޓަރަންސް ކެރަމް ޗެމްޕިއަންޝިޕުގެ އޯޕަން ސިންގަލްސް ޗެމްޕިއަންކަން އަބްދުﷲ އިސްމާއީލް އަދި އޯޕަން ޑަބަލްސް ޗެމްޕިއަންކަން ނާޒިމް އާއި އިސްމާއީލް ސުޖާއުގެ ޕެއާއިން ހޯދައިފިއެވެ.

އޯޕަން ސިންގަލްސްގެ ފައިނަލް މެޗު ކުޅެފައިވަނީ ހުކުރު ދުވަހު ހަވީރުއެވެ. މި މެޗުގައި އިސްމާއީލް ސުޖާއުއާ ބައްދަލުކޮށް އަބްދުﷲ އިސްމާއީލް މޮޅުވެފައިވަނީ ސީދާ ދެ ގޭމުންނެވެ. ފުރަތަމަ ސެޓު 22-12 އިން ކާމިޔާބު ކޮށްފައިވާއިރު ދެވަނަ ސެޓު ކާމިޔާބުކޮށްފައިވަނީ 23-14 އިންނެވެ.

ހުކުރު ދުވަހުގެ ރޭ ކުޅުނު އޯޕަން ޑަބަލްސް ފައިނަލުގައި ބައްދަލުކުރީ ނާޒިމް އަދި އިސްމާއީލް ސުޖާއުގެ ޕެއާ އާއި އަބްދުﷲ އިސްމާއީލް އަދި އާދަމް ސަލީމްގެ ޕެއާއެވެ. މި މެޗު ނާޒިމް އަދި އިސްމާއީލް ސުޖާއުގެ ޕެއާ ކާމިޔާބުކުރީ 2-1 ގެ ނަތީޖާއަކުންނެވެ. މި މެޗުގެ ފުރަތަމަ ސެޓު 21-11 އިން ކާމިޔާބުކޮށްފައިވަނީ އަބްދުﷲ އިސްމާއީލް އަދި އާދަމް ސަލީމްގެ ޕެއާ އިންނެވެ. ނަމަވެސް ނާޒިމް އަދި އިސްމާއީލް ސުޖާއުގެ ޕެއާ އިން ވަނީ ޖެހިގެން އައި ދެ ސެޓު ކާމިޔާބުކޮށްފައެވެ. ދެވަނަ ސެޓު 23-14 އިން ކާމިޔާބުކުރިއިރު ތިންވަނަ ސެޓު ކާމިޔާބުކުރީ 21-14 އިންނެވެ.

ޖުމްލަ 24 ކުޅުންތެރިންނާއެކު ކުރިޔަށް ދިޔަ މި މުބާރާތުގެ މަގުސަދަކީ ޕްރޮފެޝަނަލް ކުޅުންތެރިން ނުހިމެނޭހެން، ވެޓަރަންސް ތެރޭގައި ވާދަވެރި މެޗުތަކެއް ކުޅުމުގެ ފުރުސަތު ދިނުމެވެ.