އެމެރިކް ލަޕޯޓް ބޭނުންވަނީ ސިޓީ ދޫކޮށްލަން
17 ޖޫން 2023 | ހޮނިހިރު 05:05އޭނާ ގަތުމަށް ބާސެލޯނާއިން ޝައުގުވެރިވޭ
އެމެރިކް ލަޕޯޓް: ބޭނުންވަނީ ސިޓީ ދޫކޮށްލަން
މެންޗެސްޓާ ސިޓީގެ ޑިފެންޑަރު އެމެރިކް ލަޕޯޓް އެކުލަބު ދޫކޮށްލަން ބޭނުންވާކަމަށް ބުނެފި އެވެ.
ފްރާންސަށް އުފަން، އެކަމަކު ސްޕޭންގެ ގައުމީ ޓީމަށް ކުޅެމުން އަންނަ ލަޕޯޓް އަކީ ސިޓީގެ ކޯޗު ޕެޕް ގާޑިއޯލާގެ ޓީމުގައި ވަރަށް މުހިންމު ކުޅުންތެރިއެއްކެވެ. ހާއްސަކޮށް މިދިޔަ އަހަރުގެ ސީޒަނުގަ އެވެ ނަމަވެސް މަމަހު ކުރީކޮޅު ނިމުނު ސީޒަނުގައި އޭނާ ގިނައިން އިންނަން ޖެހުނީ ބެންޗުގަ އެވެ. އޭނާ ކުލަބު ދޫކޮށްލަން ބޭނުންވާ މައިގަނޑު ސަބަބަކީ ވެސް މިއެވެ.
ލަޕޯޓް ގެންދިއުމަށް އެންމެ ބޮޑަށް ޝައުގުވެރިކަން ފާޅުކޮށްފައިވަނީ ބާސެލޯނާއިންނެވެ. މިދިޔަ ސީޒަނުގައި އެޝައުގު ފާޅުކުރި ނަމަވެސް ބާސެލޯނާއިން މި ސީޒަނުގައި ވަކި އެއްޗެއް ނުބުނެ އެވެ. ސަބަބަކީ ފައިނޭންޝަލް ޕެއާޕްލޭއަށްޓަކައި ބައެއް ކުޅުންތެރިން ވިއްކަންޖެހޭތީ އެވެ.
ލަޕޯޓް ވިއްކުމާމެދު ސިޓީން ވަކި އެއްޗެއްނުބުނެ އެވެ. އެކަމަކު މަދުވެގެން 5 މިލިއަން ޕައުންޑަށް ނޫނީ 29 އަހަރުގެ ޑިފެންޑަރު ނުވިއްކާނެ ކަމަށް އިނގިރޭސި ނޫސްތަކުން ބުނެ އެވެ. މި އަދަދަކީ ބާސެލޯނާ އަށް ހޭދަކުރަން އެހާ ފަސޭހަ އަދަދަކަށް ނުވެދާނެ އެވެ. ނަމަވެސް އަންނަ ސީޒަނަށް ޑިފެންޑަރެއް ހޯދުމަކީ ބާސެލޯނާގެ ކޯޗު ޒަވީ ހަނާންޑޭޒްގެ އަމާޒެކެވެ. މި ގޮތުން ލަޕޯޓް ގަތުމަށް އެކުލަބުން ބޭނުންވާނެ އެއް ސަބަބަކީ އޭނާ އަކީ ސްޕެއިންގެ ކުޅުންތެރިއަކަށްވުމެވެ.
