ދިވެހިރާއްޖެއިން ބޫޓާނަށް ކަނޑައެޅުއްވި އާ ނޮން-ރެޒިޑެންޓް ސަފީރު އިބްރާހީމް ޝަހީބު، އެމަނިކުފާނުގެ ސަފީރުކަމުގެ ފަތްކޮޅު ބޫޓާންގެ ރަސްގެފާނު, ޖިގްމޭ ކެސަރު ނަމްގްޔެލް ވަންގްޗުކްއަށް އަރުއްވައިފިއެވެ.
ސަފީރުކަމުގެ ފަތްކޮޅު އެރުއްވުމަށްފަހު، ރަސްގެފާނު ޖިގްމޭ ކޭސަރ ނަމްގްޔަލް ވަންގްޗުކް، ސަފީރު ޝަހީބަށް މަރުޙަބާ ވިދާޅުވެ، ރާއްޖެއާއި ބޫޓާނާ ދެމެދު އޮތް ގާތް ގުޅުން އިތުރަށް ބަދަހިކުރެއްވުމަށް ސަފީރު މަސައްކަތް ކުރައްވާނެކަމުގެ ޔަޤީންކަން އެބައޮތްކަމުގައި ވިދާޅުވިއެވެ.
މި ބައްދަލުކުރެއްވުމުގައި ސަފީރު ޝަހީބު ދެއްކެވި ވާހަކަފުޅުގައި، ދެޤައުމުގެ ދެމެދުގައި އޮތް ގުޅުން އިތުރަށް ބަދަހިކުރެއްވުމަށް މަސައްކަތްކުރުމުގެ ފުރުޞަތު ލިބުމަކީ ލިބުނު ވަރަށް ބޮޑު ޝަރަފެއްކަމުގައި ވިދާޅުވިއެވެ. އަދި މިހާރު އޮތް އެކުވެރި ގުޅުން އިތުރަށް ބަދަހިކުރުމަށް ޓަކައި ގާތުން މަސައްކަތް ކުރައްވާނެ ކަމުގެ ޔަޤީންކަން ސަފީރު ދެއްވިއެވެ.
މި ބައްދަލުކުރެއްވުމުގައި ސަފީރު ޝަހީބު ދެއްކެވި ވާހަކަފުޅުގައި، ބޫޓާނުގެ ރަސްގެފާނަށް ދިވެހި ސަރުކާރާއި ރައްޔިތުންގެ ނަމުގައި، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ފަރާތުން ވަރަށް އިޚްލާޞްތެރިކަމާއެކު ތަހުނިޔާ އާއި ހެޔޮއެދުންތައް ފޮނުއްވާފައިވެއެވެ. އަލަށް އައްޔަންކުރެއްވި ސަފީރުގެ ހައިސިއްޔަތުން އިބްރާހިމް ޝަހީބު ވަނީ އެމަނިކުފާނުގެ ދައުރުގައި ރާއްޖެއާއި ބޫޓާނާ ދެމެދު އޮތް ގާތް ގުޅުން އިތުރަށް ބަދަހިކުރެއްވުމަށް ބޫޓާން ސަރުކާރާ ގުޅިގެން މަސައްކަތް ކުރައްވާނެ ކަމުގެ ޔަޤީންކަން ދެއްވާފައެވެ.
މި ރަސްމިއްޔާތަށްފަހު، ދިވެހިރާއްޖެއިން ބޫޓާނަށް ކަނޑައެޅުއްވި އާ ސަފީރު، ބޫޓާނުގެ ބޮޑުވަޒީރު، ޑޮކްޓަރ ލޮޓޭ ޝެރިންގ އާއި، ބޫޓާންގެ މިނިސްޓަރ އޮފް ފޮރިން އެފެއާޒް އެންޑް އެކްސްޓާނަލް ޓްރޭޑް ޑޮކްޓަރ ޓަންޑީ ޑޯޖީގެ އަރިހަށް އިޙްތިރާމްގެ ޒިޔާރަތެއް ކުރެއްވުމަށް ވަނީ ހަމަޖެހިފައެވެ. ސަފީރު ޝަހީބު ބޫޓާނުގައި ތިއްބަވާ ސަރުކާރުގެ އިސްވެރިންނާ ބައްދަލުކުރެއްވުމަށް ވެސް ވަނީ ހަމަޖެހިފައެވެ.
ސަފީރު ޝަހީބުގެ އަރިހުގައި އިންޑިއާގައި ހުންނަ ދިވެހިރާއްޖޭގެ ހައިކޮމިޝަންގެ ފަސްޓް ސެކްރެޓަރީ މުޙައްމަދު ނަޖީލް ބައިވެރިވެވަޑައިގަންނަވައެވެ.
