ވިހި އަހަރުން ދަށުގެ ފީފާ ވޯލްޑް ކަޕްގެ ޗެމްޕިއަންކަން ފުރަތަމަ ފަހަރަށް އުރުގުއޭ އިން ހޯދައިފި އެވެ.

އުރުގުއޭ އިން މުބާރާތް ކާމިޔާބު ކުރީ އާދިއްތަ ދުވަހު ކުޅުނު ފައިނަލްގައި އިޓަލީގެ މައްޗަށް 1-0 އިން ކުރި ހޯދައިގެންނެވެ. މެޗު ފަށައިގެން ރަނގަޅަށް ކުޅެމުން ދިޔައީ ވެސް އުރުގުއޭ އިންނެވެ. ލަނޑު ޖެހުމުގެ ކުރިން ވެސް އެ ޓީމުން ވަނީ ގިނަ ހަމަލާތަކެއް އުފައްދައިފަ އެވެ. އިޓަލީގެ ގޯލަށް އަމާޒުކޮށް އުރުގުއޭ އިން 15 ހަމަލާއެއް ފޮނުވާލިއިރު، އިޓަލީ އަށް އުފެއްދުނީ އެންމެ ތިން ހަމަލާ އެވެ. މެޗުގެ 86 ވަނަ މިނެޓުގައި އުރުގުއޭ މޮޅުކޮށްދިން ލަނޑު ޖަހައިދިނީ މިޑްފީލްޑަރު ލޫސިއާނޯ ރޮޑްރިގޭޒް އެވެ. އެއީ އިޓަލީގެ އޭރިޔާ ތެރެއިން ލިބުނު ބޯޅައެއް ބޮލުން ގޯލަށް ވައްދާލައިގެން އޭނާ ކާމިޔާބުކޮށްދިން ލަނޑެކެވެ.

އާޖެންޓީނާގައި ކުރިއަށް ދިޔަ މުބާރާތުގެ ހުރިހާ މަގާމެއް ހޯދީ އިޓަލީންނެވެ. މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާ އާއި އެންމެ މޮޅު ކުޅުންތެރިޔާގެ މަގާމަށް ހޮވުނީ އިޓަލީގެ މިޑްފީލަރު ސެސާރޭ ކެސާޑެއީ އެވެ. އެންމެ މޮޅު ގޯލް ކީޕަރަކަށް ހޮވުނީ އެ ޓީމުގެ ސެބަސްޓިއާނޯ އެވެ. މީގެ އިތުރުން މުބާރާތުގެ ތިން ވަނަ ޓީމަކީ އިސްރާއީލް އެވެ. ހަތަރު ވަނަ ޓީމަކަށް ހޮވުނީ ސައުތު ކޮރެއާ އެވެ.