ސައޫދީ ޕްރޯ ލީގުގެ ޓީމަކުން މޮޑްރިޗަށް އެއްބަސްވުމެއް ހުށަހަޅައިފިކަމަށް ރިޕޯޓުތަކުން ބުނެފިއެވެ.
ލޫކާ މޮޑްރިޗަކީ ފާއިތުވި 11 އަހަރު ރެއާލް މެޑްރިޑުން ގިނަ ތަށިތަކެއް ކާމިޔާބުކުރިއިރު އެ ޓީމަށް އެންމެ މުހިންމު އެއް ކުޅުންތެރިޔާއެވެ. މިހާރު އުމުރުން 37 އަހަރުގެ މޮޑްރިޗް ކާލޯ އެންޗެލޯޓީގެ އިރުޝާދުގެ ދަށުން މުހިއްމު ކުޅުންތެރިއެއްގެ ގޮތުގައި ދެމިއޮތް ނަމަވެސް، މި ހޫނު މޫސުމުގައި ރެއާލް މެޑްރިޑް ދޫކޮށްލަން ޖެހިދާނެ ކަމަށް ބެލެވެއެވެ.
ރިޕޯޓުތައް ބުނާގޮތުގައި މޮޑްރިޗަށް ވަނީ ބޮޑު ހުށަހެޅުމެއް ހުށަހަޅާފައެވެ. މޮޑްރިޗް ޓީމުގައި އިތުރު ސީޒަނެއްގައި މަޑުކުރަން ބޭނުންވިނަމަވެސް، ރެއާލް މެޑްރިޑުގެ ވިސްނުން ހުރީ ޒުވާން ކުޅުންތެރިންނަށް ފުރުސަތު ދިނުމަށެވެ.
މިހާރު މޮޑްރިޗް ހުރީ ސީޒަން ނިމުނުއިރު ކުއްލިއަކަށް ރެއާލް މެޑްރިޑް ދޫކޮށް އަލްއިއްތިހާދާ ގުޅުނު ކަރީމް ބެންޒީމާއާ އެއް ހާލެއްގައެވެ. މޮޑްރިޗް ސައޫދީގައި އޭނާގެ ކުރީގެ ޓީމުގެ ކުޅުންތެރިޔާއާ ގުޅެން ނިންމަފާނެކަމަށް ބެލެވެއެވެ.
