އޭއެފްސީ ކަޕް އަލުން ފަށަން ދެ ހުށަހެޅުމެއް

ކޮރޯނާވައިރަސް (ކޮވިޑް-19) އާ ގުޅިގެން މެދުކަނދާލާފައިވާ އޭއެފްސީ ކަޕްގެ މެޗުތައް އަލުން ފެށުމަށް ކުރި މަޝްވަރާގައި ދެ ގޮތެއް ހުށަހަޅައިފި އެވެ.

ކޮވިޑް-19 އާ ގުޅިގެން އޭއެފްސީން އެންމެ ފުރަތަމަ މާޗު މަހުގެ 18 ވަނަ ދުވަހު ނިންމީ އޭޕްރީލް މަހު ކުޅެން ހުރި މެޗުތައް ފަސްކުރުމަށެވެ. އެކަމަކު އޭޕްރީލް މަހު އޭއެފްސީން ވަނީ މެއި މަހާއި ޖޫން މަހު ވެސް މެޗުތައް ކުރިއަށްގެންދެވޭނެ މާހައުލެއް އޮންނާނެ ކަމަށް ނުބެލެވޭތީ، އޭއެފްސީ ކަޕްގެ މެޗުތައް މުއްދަތެއް ނެތް ގޮތަށް ފަސްކޮށްފައެވެ.

އޭއެފްސީ ކަޕް އަލުން ފެށުމާ ގުޅޭ ގޮތުން ހުކުރު ދުވަހު އޭއެފްސީން ވަނީ ކްލަބުތަކާ އެކު ވީޑިއޯ ކޮންފަރެންސް މެދުވެރިކޮށް ބައްދަލުވުމެއް ބާއްވާފައެވެ.

މި ބައްދަލުވުމުގައި އޭއެފްސީން ވަނީ މުބާރާތް އަލުން ފަށަން ދެ ގޮތެއް ހުށަހަޅާފައެވެ. ގްރޫޕް ސްޓޭޖުގެ މެޗުތައް ކުރިއަށް ގެންދަން ހުށަހެޅީ ސެޕްޓެމްބަރު މަހުގެ 22ން ނޮވެމްބަރު މަހުގެ ހަތަރަކަށް ހޯމް އެންޑް އަވޭ އުސޫލުން މެޗުތައް ކުޅުމަށް ނުވަތަ އޮކްޓޫބަރު މަހުގެ 23ން ފެށިގެން ނޮވެމްބަރު ހަތަރަކާ ދެމެދު އެއް ދަނޑެއްގައި މެޗުތައް ކުޅުމަށެވެ.

މިކަމާ މެދު އަދި ވަކި ގޮތެއް އޭއެފްސީން ނިންމާފައި ނުވާއިރު، ރިޕޯޓުތައް ބުނާ ގޮތުން އޭއެފްސީން ނިންމާނީ އޮކްޓޫބަރު މަހުގެ 23 ގައި މުބާރާތް އަލުން ފެށުމަށެވެ. އެއީ އޮކްޓޫބަރު މަހު ކުރީކޮޅުގައި ފީފާ ވޯލްޑް ކަޕާއި އޭއެފްސީ އޭޝިއަން ކަޕްގެ ޖޮއިންޓް ކޮލިފިކޭޝަން މެޗުތައް ތާވަލުކޮށްފައި އޮތުމުންނެވެ.

އޭއެފްސީ ކަޕްގެ މެޗުތައް މުއްދަތެއް ނެތް ގޮތަށް ފަސްކޮށްފައިވާއިރު، އޭއެފްސީ ކަޕްގެ ދެކުނު އޭޝިއާގެ ގައުމުތަކަށް ހާއްސަ ގްރޫޕްގައި މި ފަހަރު ރާއްޖޭގެ ދެ ޓީމެއް ވާދަކުރެ އެވެ. އެއީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބެވެ.

މީގެ ކުރިން އޭއެފްސީ ކަޕްގެ ގްރޫޕް ސްޓޭޖުގެ ފުރަތަމަ މެޗުގައި މާޒިޔާ އާއި ޓީސީ ވަނީ މާޗު މަހު 12 ވަނަ ދުވަހު ވާދަކޮށްފަ އެވެ. އެ ދުވަހު ޓީސީ ނުކުތީ ބަންގްލަދޭޝްގައި އެ ގައުމުގެ ބަޝުންދުރާ ކިންގްސްއާ ދެކޮޅަށެވެ. އަދި އިންޑިއާގައި މާޒިޔާ ވަނީ އެ ގައުމުގެ ޗެންނާއީ ސިޓީ އެފްސީއާ ދެކޮޅަށް ކުޅެފަ އެވެ.