މުލާ ހޯދުމަށް ޗައިނާގެ ކްލަބަކުން ބޮޑު ހުށަހެޅުމެއް

ބަޔާން މިއުނިކަށް ކުޅެމުން އަންނަ ޖަރުމަންގެ ފޯވާޑް ތޯމަސް މުލާ ހޯދުމަށް ޗައިނާގެ ކްލަބަކުން ބޮޑު ހުށަހެޅުމެއް ހުށަހަޅާފައިވާ ކަމަށް ރިޕޯޓްތައް ބުނެފިއެވެ.

ކިކާއިން ބުނީ، މި ޓްރާންސްފާ ބާޒާރުގައި މުލާ ހޯދުމަށް ޗައިނާގެ ކްލަބަކުން މަސައްކަތް ކުރަމުން އަންނަ ކަމަށާއި، އެ ކްލަބުން އޭނާއަށް އަހަރަކު 25 މިލިއަން ޔޫރޯ ދޭން އެއްބަސްވެފައިވާ ކަމަށެވެ.

އުމުރުން 29 އަހަރުގެ މުލާ ބަޔާންއާއެކު ހަދާފައިވާ އެއްބަސްވުން 2021 ވަނަ އަހަރު ހަމަވާއިރު، އޭނާ ހޯދުމަށް ޗައިނާގެ ކްލަބްތަކުގެ އިތުރުން އިޓަލީގެ ކްލަބްތަކުންވެސް އަންނަނީ މަސައްކަތް ކުރަމުން ކަމަށް ރިޕޯޓްތައް ބުނެއެވެ.

ބަޔާން އިން 2008 ވަނަ އަހަރު ސީނިއާ ކެރިޔަރު ފެށި މުލާ ޔޫތު ކެރިޔަރުވެސް ހޭދަކޮށްފައިވަނީ އެ ކްލަބުގެ ޔޫތު ޓީމުގައެވެ. އޭނާ ވަނީ އެ ކްލަބަށް މިހާތަނަށް ކުޅުނު 485 މެޗުގައި 185 ލަނޑު ކާމިޔާބުކޮށްފައެވެ.

މުލާ ވަނީ ބަޔާންއާ އެކު ހަތް ލީގު ތަށި، ހަތަރު ޖަރުމަން ކަޕް، ހަތަރު ޖަރުމަން ސުޕަ ކަޕް، އެއް ޔުއެފާ ޗެމްޕިއަންސް ލީގު، އެއް ޔުއެފާ ސުޕަ ކަޕް އަދި އެއް ފީފާ ކްލަބް ވޯލްޑް ކަޕް ކާމިޔާބުކޮށްފައެވެ.

ޖަރުމަން ގައުމީ ޓީމާއެކު 2010 ވަނަ އަހަރު ފީފާ ވޯލްޑް ކަޕްގެ ތިންވަނަ ހޯދި މުލާ ވަނީ ގައުމީ ޓީމަށް މިހާތަނަށް ކުޅުނު 100 މެޗުގައި 38 ލަނޑު ކާމިޔާބުކޮށްފައެވެ. އަދި އޭނާ ވަނީ 2010 ވަނަ އަހަރު ވޯލްޑް ކަޕްގެ ރަން ބޫޓު ހޯދުމުގެ އިތުރުން އެންމެ މޮޅު ޒުވާން ކުޅުންތެރިޔާގެ މަގާމުވެސް އެފަހަރުގެ މުބާރާތުގައި ހޯދާފައެވެ.

ގިނަ އިންޑިވިޖުއަލް އެވޯޑްތަކެއް ހޯދާފައިވާ މުލާ ވަނީ 2010 ވަނަ އަހަރު ބްރާވޯ އެވޯޑްގެ އިތުރުން ވޯލްޑް ސޮކާ ޔަންގް ޕްލޭޔާ އޮފް ދަ އިޔާވެސް ހޯދާފައެވެ.