ސައޫދީގެ އަލް އަހްލީ އިން މަހްރޭޒް ހޯދުމަށް މަސައްކަތް ކުރަނީ

މެންޗެސްޓާ ސިޓީގެ ރިޔާދު މަހްރޭޒް އަށް 100 މިލިއަން ޔޫރޯގެ ކޮންޓްރެކްޓެއްގެ އިތުރުން ބޯނަސްތަކެއް ދޭން އަލް އަހްލީ ތައްޔާރަށް އޮތް ކަމަށް ބޭރުގެ މީޑިއާތަކުން ބުނެފިއެވެ.

ސައޫދީ އަރަބިއްޔާގެ ކްލަބުގެ ރައީސް ވަލީދު މުއާތު ހިމެނޭ ގޮތަށް ވަފުދެއް މި ހަފުތާގައި ލަންޑަނަށް ގޮސް، މަހްރޭޒް ހިމެނޭ ގޮތަށް ބައެއް ކުޅުންތެރިންނާ އެކު އެއްބަސްވުންތަކެއް ހެދުމާ ގުޅޭގޮތުން ވަނީ މަޝްވަރާކޮށްފައެވެ.

އަލްޖީރިއާގެ ފޯވާޑް ސިޓީއާ އެކު މިހާރު ހަދާފައިވާ އެއްބަސްވުމުގައި ބާކީ ދެ އަހަރު އޮތް ނަމަވެސް މި ސީޒަނުގައި ޕެޕް ގާޑިއޯލާގެ އިރުޝާދުގެ ދަށުން ކުޅެން ވަގުތު ނުލިބުމުން އޭނާ ވަނީ މާޔޫސްވެފައެވެ. މި ސީޒަނުގައި ޕްރިމިއަރ ލީގުގެ 22 މެޗު އޭނާ ފަށާފައިވީނަމަވެސް، ޗެމްޕިއަންސް ލީގު ނޮކްއައުޓު ބުރުތަކުގައި އިންނަން ޖެހުނީ ބެންޗުގައެވެ.

ކްރިސްޓިއާނޯ ރޮނާލްޑޯ ކުޅެމުން އަންނަ ލީގަށް ދާދި ފަހުން ބެންޒެމާ އާއި ކާންޓޭ ގޮސްފައިވާއިރު، އެ ލިސްޓަށް މަހްރޭޒް އިތުރުވުން ވެގެންދާނީ ލީގަށް ލިބޭ ބޮޑު ކުރިއެރުމަކަށެވެ.