ބޯޓު ގެނައުމަށް ގިނަ މަސައްކަތްތަކެއް ކުރަން އެބަހުރި، އެއްބާރުލުން ނުލިބޭ
9 ޖޫން 2023 | ހުކުރު 06:35އެރިޓްރިއާގެ ފޮރިން މިނިސްޓަރާއެކު ފޯނުކޯލަކަށް ރާއްޖޭގެ ފޮރިން މިނިސްޓަރު އެދިވަޑައިގެންފައިވޭ
އެފްއެސްއެމްގެ ބާޖެއް
މިސްރުން ފުރައިގެން ރާއްޖެއަށް ދަތުރުކުރަނިކޮށް އެފްރިކާގެ ޤައުމެއްކަމަށްވާ އެރިޓްރިއާގައި ހިފެހެއްޓި ފިއުލް ސަޕްލައި މޯލްޑިވްސް، އެފްއެސްއެމްގެ ދެ ބޯޓު ގެނައުމަށް ގިނަ މަސައްކަތްތަކެއް ކުރަންޖެހޭ ކަމަށާއި ނަމަވެސް އެރިޓްރިއާގެ ފަރާތުން އެއްބާރުލުން ނުލިބޭ ކަމަށް ފިއުލް ސަޕްލައި މޯލްޑިވްސް (އެފްއެސްއެމް)ގެ މެނޭޖިންގ ޑިރެކްޓަރު މުހައްމަދު ގަސަމް ވިދާޅުވެއްޖެއެވެ.
ރާއްޖެއެމްވީއަށް މައުލޫމާތު ދެއްވަމުން ގަސަމް ވިދާޅުވީ ބޯޓުގައި ތިބި ދިވެހި ފަޅުވެރިން މިދިޔަ ހުކުރު ދުވަހު ރާއްޖެ ގެނެސްފައިވާއިރު ބޯޓު އަދިވެސް އޮތީ ހިފަހައްޓާފައި ކަމަށެވެ.
އެފްއެސްއެމް އިން އެރިޓްރިއާއަށް ފޮނުވި ޕަވަރ އޮފް އެޓާނީ ވެސް ޤަބޫލުނުކުރި ކަމަށާއި އޭގައި ރާއްޖޭގެ ފޮރިން މިނިސްޓްރީއާއި އެރިޓްރިއާގެ ސްޓޭމްޕް އޮންނަން ޖެހޭ ކަމަށް އެ ޤައުމުން ބުނި ކަމަށް ޤަސަމް ވިދާޅުވިއެވެ. ރާއްޖެއިން ސްޓޭމްޕް ޖެހުމަށްފަހު މިހާރު ނިއުދިއްލީގައި ހުރި އެރިޓްރިއާ އެމްބަސީއަށް ޕަވަރ އޮފް އެޓާނީ ފޮނުވިތާ ތިން ދުވަސްވެއްޖެ ކަމަށް ވެސް ވިދާޅުވިއެވެ.
ގަސަމް އިތުރަށް ވިދާޅުވީ ބޯޓު ގެނައުމަށް ގިނަ މަސައްކަތްތަކެއް ކުރަމުންދާ ކަމަށާއި އެރިޓްރިއާގެ ފޮރިން މިނިސްޓަރާއެކު ފޯނުކޯލަކަށް ރާއްޖޭގެ ފޮރިން މިނިސްޓަރު އެދިވަޑައިގެންފައިވާ ކަމަށެވެ.
މިސްރުން ރާއްޖެއަށް ދަތުރުކުރި ދެ ބޯޓު އެރިޓްރިއާގައި ބަނދަރުކުރީ މިދިޔަ އޭޕްރީލް މަހުގެ 26 ވަނަ ދުވަހު، މޫސުން ގޯސްވުމުގެ ސަބަބުންނެވެ. އެ ގައުމުގެ ސިފައިން އެ ދެ ބޯޓު ހިފެހެއްޓީ ހުއްދަ ނުހޯދާ އެރިޓްރިއާއަށް އެތެރެވި ކަމަށް ބުނެއެވެ. ނަމަވެސް ބޯޓު ބަނދަރުކުރުމުގެ ކުރިން ހުއްދަ ހޯދަން މަސައްކަތް ކުރިކަމަށް އެފްއެސްއެމްއިން ވަނީ ބުނެފައެވެ.
2019 ވަނަ އަހަރު އެފްއެސްއެމުން ވަނީ ތެޔޮ އުފުލާ 4 ބޯޓު ބަނުމަށް މިސްރުގެ ކުންފުންޏަކަށް ހަވާލުކޮށްފައެވެ. މީގެ 1 އަހަރު ކުރިން ވަނީ މީގެތެރެއިން 2 ބޯޓު ރާއްޖެ ގެނެސްފައެވެ.
އެރިޓްރިއާގައި ހިފެހެއްޓި 2 ބޯޓަކީ ބާކީ އޮތް 2 ބޯޓެވެ. މި 2 ބޯޓަކީ 250 ހާސް ލިޓަރުގެ ކެޕޭސިޓީގެ ބޯޓުތަކެއްކަމަށް އެފްއެސްއެމްއިން މައުލޫމާތުދެއެވެ. އަދި މިއިން ކޮންމެ ބޯޓެއް ބަނުމަށް ގާތްގަނޑަކަށް 11 މިލިއަން ރުފިޔާ ޚަރަދުވެފައިވާކަމަށް މައުލޫމާތުލިބެއެވެ.
