މަޝްހޫރު ދިނީ އިލްމުވެރިޔާ ޑރ. ބިލާލު ފިލިޕްސް އަންނަ މަހު ރާއްޖެ ވަޑައިގަންނަވާނެ ކަމަށް ޕީސް ފައުންޑޭޝަނުން ބުނެފި އެވެ.
ޕީސް ފައުންޑޭޝަނުން ބުނީ، އަންނަ ޖުލައި މަހުގެ 13 އިން 17 އަށް ޑރ. ބިލާލް ރާއްޖެ ވަޑާއިގަންނަވާ އިރު ތަފާތު އެކި މައުލޫތަކަށް ދަރުސްތައް ބޭއްވުމަށް ނިންމާފަ އެވެ. ބިލާލުގެ މިދަތުރުގައި މާލޭގައި ތިން ދުވަސް ހޭދަކުރާ އިރު ފުވައްމުލަކުގައި ދެ ވަސް ހޭދަކުރުމަށް ވަނީ ހަމަޖެހިފަ އެވެ
އެގޮތުން ޖުލައި 13 ވަނަ ދުވަހުގެ ރޭގައި އިސްލާމީ މަރުކަޒުގައި ޑރ ބިލާލްގެ ހާއްސަ ދަރުހެއް ބޭއްވުމަށް ވަނީ ނިންމާފަ އެވެ. ދަރުހުގެ މައުލޫއު އަކީ" ޓްރޫލީ ސަކްސަސްފުލް ޕީޕަލް: ދެއަރ ހެބިޓްސް އެންޑް ކެރެކްޓެރިސްޓީކްސް." އެވެ.
ފުވައްމުލަކަށް ބިލާލް ކުރައްވާ ދަތުރުގައި ނަމޫމާގެ ނަމުގައި ވޯކްޝޮޕެއް ބޭއްވުމަށް ވަނީ ހަމަޖެހިފަ އެވެ. އަދި ތަފާތު އެކި މައުލޫއުތަކަށް ދަރުސް ދިނުމަށްވެސް ވަނީ ކަނޑައަޅާފަ އެެވެ. އެގޮތުން އާއްމުކޮށް އެންމެންނަށް ހުޅުވާލައިގެން، " ހޫ އިސް ޔުއަރ ލޯޑް؟" މި ނަމުގައި ދަރުހެއް ބޭއްވުމަށް ހަމަޖެހިފައިވާ އިރު ސްކޫލު ކުދިންނަށް އަމާޒުކޮށްގެން "އަ ޓްރޫ މުސްލިމް ސްޓޫޑެންޓް" ގެ ނަމުގައި ދަތުހެއް ދެއްވުމަށް ވަނީ ނިންމާފަ އެވެ.
މީގެ އިތުރުން މާލޭގައި ސީއެޗްއެސްސީ ކުދިންނަށް " އަ ޕްރޮޑަކްޓިވް ޓީނޭޖަރ" ގެ ނަމުގައި ވަނީ ބާއްވާފަ އެވެ.
މި ހަރަކާތްތަކަކީ ރާއްޖޭގެ ދީނީ ކަންކަމާއި ގުޅޭ ޖަމިއްޔާއެއް ކަމަށްވާ ފީސް ފައުންޑޭޝަނުން އިންތިޒާމުކޮށްގެން ކުރިއަށްގެންދާ ހަރަކާތެކެވެ.
މީގެ ކުރިންވެސް ޑރ ބިލާލް ފިލިޕްސް ވަނީ ރާއްޖެއަށް ވަޑައިގަންނަވާފަ އެވެ. އެފަހަރު ޖަމިއްޔަތުއް ސަލަފުން އިންތިޒާމު ކުރި ހަރަކާތުގައި " ދަ ކޯލް" ގެ ނަމުގައި ވަނީ ޚާއްސަ ދަރުހެއްދީފަ އެވެ.
ޑރ ބިލާލް ފިލިޕްސް އަކީ ކެނެޑާގެ މަޝްހޫރު ދީނީ އިލްމުވެރިއެކެވެ.
