ގައުމީ ސާފިން ޓީމު ވާދަކުރާ ވޯލްޑް ސާފިން ގޭމްސް ހުޅުވުމުގެ ރަސްމިއްޔާތު ބާއްވައިފި

އިންޓަނޭޝަނަލް ސާފިން އެސޯސިއޭޝަން (އައިއެސްއޭ) އިން ބާއްވާ ވޯލްޑް ސާފިން ގޭމްސް ހުޅުވުމުގެ ރަސްމިއްޔާތު ބާއްވައިފިއެވެ.

ސާފިން ގޭމްސްގެ ހުޅުވުމުގެ ރަސްމިއްޔާތު ބާއްވާފައިވަނީ އަންގާރަ ދުވަހުއެވެ. މި މުބާރާތް ކުރިޔަށް ދިއުމަށް ހަމަޖެހިފައިވަނީ މެއި މަހުގެ 31 ން ޖޫން 7 ގެ ނިޔަލަށެވެ.

އެލް ސަލްވަޑޯގައި ބާއްވާ މި މުބާރާތުގައި ވާދަކުރާ ރާއްޖޭގެ ގައުމީ ސާފިން ޓީމުގައި ހިމެނެނީ އިސްމާއިލް ރަޝީދު (ސްމައިލީ) އާއި އަހުމަދު އާގިލް (އަންމަޑޭ) އަދި ހޫދު އަހުމަދު (ހޫބްޒް) އެވެ. ޓީމުގެ ކޯޗަކީ ކްލައިޑް މާޓިންއެވެ. ގައުމީ ޓީމާއެކު ސާފިން އެސޯސިއޭޝަންގެ ރައީސް ޝާހިދު އަމީން (ޝާޑް) ވެސް މިވަގުތު ހުރީ އެލް ސަލްވަޑޯގައެވެ.

ކޮންމެ ގައުމަކުން ފިރިހެން ތިން އެތުލީޓުން އަދި އަންހެން ތިން އެތުލީޓުން ބައިވެރިކުރެވޭ މި މުބާރާތުގައި ރާއްޖެއިން ބައިވެފައިވަނީ ތިން ފިރިހެން އެތުލީޓުންނެވެ. 64 ގައުމަކުން ބައިވެރިވި މި މުބާރާތުގައި 164 ފިރިހެން އެތުލީޓުންނާއި 130 އަންހެން އެތުލީޓުން ވަނީ ބައިވެރިވެފައިވެއެވެ.

މުބާރާތުގެ ފުރަތަމަ ރައުންޑުގެ 11 ވަނަ ހީޓުގައި ރާއްޖޭގެ އަންމަޑޭ ވާދަކުރާނީ މެކްސިކޯގެ ސަބަސްޓިއަން ހަނާންޑެޒް އާއި ނެދަލެންޑުގެ ކެސްޕާ ހަމިންގާގެ އިތުރުން އިންޑިއާގެ ސިވަރާޖް ބާބޫ އާއެވެ. 39 ވަނަ ހީޓުގައި ހޫދު އާއެކު ވާދަކުރާނީ މެކްސިކޯގެ ޖޮނަތަން ކޯޒޯ އާއި ނެދަލެންޑުގެ ޓޮމް ބޮއެލްސްމާ އަދި އިންޑިއާގެ އަޖީޝް އަލީއެވެ. ފުރަތަމަ ރައުންޑުގައި ރާއްޖޭގެ އެންމެ ފަހު ބައިވެރިޔަކީ އިސްމާއިލް ރަޝީދު (ސްމައިލީ) އެވެ. 43 ވަނަ ހީޓުގައި އޭނާ ބައްދަލުކުރާނީ މެކްސިކޯގެ އެލަން ކްލީލެންޑް އާއި ނެދަލެންޑުގެ ބޭރިކް ޑި ވްރީސް އަދި އިންޑިއާގެ ރަމޭޝްއާއެވެ.

މިއީ ރާއްޖެއިން މި މުބާރާތުގައި ބައިވެރިވި ދެވަނަ ފަހަރެވެ. މީގެ ކުރިން ރާއްޖެ ބައިވެރިވެފައިވަނީ 2019 ވަނަ އަހަރުއެވެ.