ލޭބަރ ރިލޭޝަންސް އޮތޯރިޓީގެ ޑެސްކެއް އައްޑޫސިޓީގައި ޤާއިމުކުރުމަށް ނިންމައިފިއެވެ.
އައްޑޫސިޓީ ކައުންސިލާއި ލޭބަރ ރިލޭޝަންސް އޮތޯރިޓީއާއި ދެމެދު އަންގާރަ ދުވަހު ވަނީ އެއްބަސްވުމެއްގައި ސޮއިކޮށްފައެވެ.
އައްޑޫސިޓީ ކައުންސިލް އިދާރާގައި ބޭއްވި ރަސްމިއްޔާތެއްގައި އެއްބަސްވުމުގައި އައްޑޫސިޓީ ކައުންސިލުގެ ފަރާތުން ސޮއިކުރެއްވީ އައްޑޫސިޓީ މޭޔަރު އަލީ ނިޒާރު އެވެ. ލޭބަރ ރިލޭޝަން އޮތޯރިޓީގެ ފަރާތުން އެއްބަސްވުމުގައި ސޮއިކުރެއްވީ އެއޮތޯރިޓީގެ ޑިރެކްޓަރ ޖެނެރަލް އަހުމަދު މިޒްހަތު ނަޢީމެވެ.
އެއްބަސްވުމުގެ ދަށުން، ލޭބަރ ރިލޭޝަންސް އޮތޯރިޓީގެ ޑެސްކެއް އައްޑޫސިޓީގައި ޤާއިމުކޮށް، ލޭބަރ ރިލޭޝަންސް އޮތޯރިޓީގެ މުވައްޒަފުން އައްޑޫސިޓީ ކައުންސިލްގެ އިދާރާގައި މަސައްކަތް ކުރުމަށާއި، ހުށަހެޅޭ މައްސަލަތައް ގާތުން ބަލައި އަވަސް ފިޔަވަޅުތައް އެޅޭނެ ނިޒާމެއް ޤާއިމްކުރުމަށްވަނީ އެއްބަސްވެފައިވާ ކަމަށް އައްޑޫސިޓީ ކައުންސިލުން ބުނެއެވެ.
އައްޑޫގައި ލޭބަރ ރިލޭޝަންސް އޮތޯރިޓީގެ ޑެސްކެއް ބެހެއްޓި އިރު، މިހާރު ރ. އަތޮޅާއި، ބ. އަތޮޅާއި، ށ. އަތޮޅު، އަދި ނ. އަތޮޅު އަދި ހއ. އަތޮޅުގައި ޑެސްކު ޤާއިމްކޮށް މަސައްކަތްކުރަންވަނީ ފަށާފައެވެ. އެންމެ ފަހުން ޑެސްކެއް ބެހެއްޓުމަށް އެއްބަސްވުމުގައި ސޮއިކޮށްފައިވަނީ ހއ. އަތޮޅުގައެވެ.
