އަދީބާއި ޒިޔަތަކީ ރ ފުއްގިރި ހިޔާނާތުގެ މައްސަލައިގައި ތުުހުމަތު ކުރެވޭ ފަރާތްތަކެއް ނޫން: ޕީޖީ އޮފީސް
30 މެއި 2023 | އަންގާރަ 08:15ދިފާއުން ބުނާ ގޮތުގައި ބޭންކް ސްޓޭޓްމަންޓް ހޯދާފައިވަނީ ޤާނޫނާ ޚިލާފަށް
ރ ފުއްގިރި ހިޔާނާތުގެ މައްސަލައިގެ އަޑުއެހުން
ރ ފުއްގިރި ޚިޔާނާތުގެ މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް އަންގާރަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމެވެ.
މި އަޑުއެހުމުގައި ގާޒީ ވަނީ ބޭންކް ސްޓޭޓްމަންޓުތައް ބަލައިނުގަތުމާއި ގުޅޭގޮތުން ހުށަހަޅާފައިވާ ނުކުތާއަށް ވާހަކަ ދެއްކުމުގެ ފުރުސަތު ދެއްވައި، ބާކީ ހުރި ނުކުތާތައް ހުށަހެޅުމަށް ދަންނަވާފައެވެ.
ދިފާއުން ބުނާ ގޮތުގައި ބޭންކް ސްޓޭޓްމަންޓް ހޯދާފައިވަނީ ޤާނޫނާ ޚިލާފަށެވެ.
އެއަށްފަހު ދައުލަތަށްވެސް އެ ނުކުތާއަށް ވާހަކަ ދެއްކުމުގެ ފުރުސަތު ގާޒީ ދެއްވިއެވެ.
ޔާމީނާއި ކްރިކް ރިޒާގެ ފަރާތުން ދެން ހުށަހަޅާފައިވަނީ އަދީބާއި ޒިޔަތުގެ ތަހުގީގީ ބަޔާން ޝަރީއަތަށް ހެކީގެ ގޮތުގައި ބަލައިނުގަތުމަށް އެދި ހުށަހެޅި ނުކުތާއެވެ. އެގޮތުން އެ ބަޔާންތަކުގެ އޯޑިއޯ ނުވަތަ ވީޑިއޯވެސް ރެކޯޑު ކުރެވިފައިނުވާކަމަށް ދިފާއީ ވަކީލުން ވިދާޅުވިއެވެ.
އެސެޓް ރިކަވަރީ ކޮމިޝަނުގެ ޤަވާއިދުގައި ކޮމިޝަނުން ކުރާ ތަހުގީގުތަކުގެ އަޑު ރެކޯޑު ކުރަންވާނެކަމަށް ބަޔާންކޮށްފައިވާކަންވެސް ވަކީލުން ފާހަގަ ކުރެއްވިއެވެ. މިއީ ޖޮއިންޓް އިންވެސްޓިގޭޝަނެއް ނަމަވެސް، ބަޔާންތައް ރެކޯޑު ކުރެވިފައި ހުންނަން ޖެހޭޏެކަމަށް ދިފާއުން ދެކެއެވެ.
ދައުލަތުން ބުނީ، އެއީ ދިވެހި ފުލުހުންގެ ޚިދުމަތަށް އެމީހުން ދީފައިވާ ބަޔާނެއް ކަމަށާއި، އެމީހުން ދައުލަތުން ހުށައަޅާފައިވަނީ ޝަފަހީ ހެކިން ގޮތުގައި ކަމަށެވެ. އެ ބަޔާންތައް ކިތާބީ ހެކީގެ ގޮތުގައި ހުށައަޅާފައިނުވާނެކަމަށް ދައުލަތުގެ ވަކީލު ވިދާޅުވިއެވެ.
އަދީބާއި ޒިޔަތަކީ ރ ފުއްގިރި ހިޔާނާތުގެ މައްސަލައިގައި ތުުހުމަތު ކުރެވޭ ފަރާތްތައް ނޫންކަމަށްވެސް ދައުލަތުގެ ވަކީލު ވިދާޅުވިއެވެ.
ފަސްވަނަ ހުށައެޅުމެއްގެ ގޮތުގައި ދިފާއުން ހުށައަޅާފައިވަނީވެސް ބައެއް ހެކިތައް ޝަރީއަތަށް ބަލައިނުގަތުމަށް އެދި ހުށައެޅި ހުށައެޅުމެކެވެ. އޭގެ ތެރޭގައި ކިތާބީ ހެކިތައް ހިމެނެއެވެ. އެގޮތުން ޕެންޑޯރާ ޕޭޕާރސްގެ ލިއުންތަކަކީ މި މައްސަލަ ހިނގަމުން ދަނިކޮށް ހާމަވި އައު ހެކިތަކެއްކަމަށް އެ ނުކުތާގެ ރައްދުގައި ދައުލަތުގެ ވަކީލު ވިދާޅުވިއެވެ.
ދެން އޮންނަ އަޑުއެހުމެއްގައިވެސް އޮންނާނީ ހުށަހެޅުންތަކަށް ވާހަކަ ދެއްކުމެވެ.
