ބިލް ޓައި ކުރުމާއެކު ސްޓެލްކޯއަށް މަހެއްގެ މައްޗަށް 125،000 ރުފިޔާ!

ވެމްކޯއިން ދޭ ކުނީގެ ޚިދުމަތުގެ ބިލް ސްޓެލްކޯގެ ކަރަންޓު ބިލުގެ ތެރޭގައި ހިމެނުމާއެކު ސްޓެލްކޯއިން ކޮންމެ ބިލަކުން 2.50 ރުފިޔާ، އިދާރީ ފީއެއްގެ ގޮތުގައި ނަގާނެ ކަމަށް ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.

ބިލް ޓައިކުރުމުގެ އެއްބަސްވުމުގައި ސްޓެލްކޯއާއި ވެމްކޯއާ ދެމެދު ސޮއިކޮށްފައިވަނީ އާދީއްތަ ދުވަހު ސްޓެލްކޯގައި ބޭއްވި ރަސްމިއްޔާތެއްގައެވެ.

މި ރަސްމިއްޔާތުގައި ރާއްޖެއެމްވީން ކުރި ސުވާލަކަށް ޖަވާބުދެއްވަމުން ޝަރީފް ވިދާޅުވީ ވެމްކޯގެ ބިލުގެ ޓެރިފް ކަލެކްޓު ކުރެވުމާއެކު އިދާރީގޮތުން ކުރަންޖެހޭ ބައެއް ކަންކަން ހުންނާނެ ކަމަށެވެ. މި އެއްބަސްވުމުގެ ދަށުން ބިލަށްވާ ފައިސާ ވަކި މުއްދަތެއްގެ ތެރޭގައި ވެމްކޯއާ ހަވާލުކުރަންޖެހޭ ކަމަށާއި، މިފަދަ ބައެއް މަސައްކަތްތައް ހުރިކަން ފާހަގަކުރެއްވިއެވެ. މި މަސައްކަތްތަކަށް ކޮންމެ ބިލަކުން 2.50 ރުފިޔާ، އިދާރީ ފީއެއްގެ ގޮތުގައި ނަގާނެ ކަމަށް ޝަރީފް ވިދާޅުވިއެވެ.

ޝަރީފް މިހެން ވިދާޅުވެފައިވާއިރު، މީގެ ކުރިން ވެމްކޯގެ ފަރާތުން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެކުންފުނީގެ މެނޭޖިންގ ޑިރެކްޓަރ ޔޫސުފް ސިރާޖު ވަނީ، މި ބަދަލާއެކު މާލެ ސަރަހައްދުން 50،000 އަށްވުރެ ގިނަ ގޭބީސީން ކުނި ނެގުމުގެ މަސައްކަތްކުރާނެ ކަމަށް ވިދާޅުވެފައެވެ. މިއާއެކު ވެމްކޯއަށް މަހެެއްގެ މައްޗަށް 7.5 މިލިއަން ރުފިޔާގެ އާމްދަނީ ލިބޭނެއެވެ. އަދި ސްޓެލްކޯއިން ކޮންމެ ބިލަކަށް ނަގާ 2.50 ރުފިޔާގެ އިދާރީ ފީއިން އެކުންފުންޏަށް 125،000 ރުފިޔާ މަހެއްގެ މައްޗަށް ލިބޭނެއެވެ.

ވެމްކޯގެ ބިލް ކަރަންޓު ބިލުގެ ތެރޭގައި ހިމެނިގެންދިއުމާއެކު ސްޓެލްކޯއިން ކަރަންޓުގެ ޚިދުމަތް ފޯރުކޮށްދޭ ހުރިހާ ގޭބީސީއެއް ވަނީ ކުނީގެ ޚިދުމަތަށް ރަޖިސްޓްރީވެފައެވެ. މިހާރު ވެމްކޯގެ ޚިދުމަތަށް ރަޖިސްޓްރީވެފައިވަނީ 24،000 ގޭބީސީއެވެ.