ކައުންސިލްތަކަށް ގްރާންޓް ދިނުމުގައި މިހާރު އޮތް އުސޫލަށް ބަަދަލު ގެންނަންޖެހޭ: ރައީސް
ސަރުކާރުން މަސައްކަތް ކުރަނީ ރަށްރަށުގެ ތަރައްޤީއާ ގުޅުން ހުރިކަންކަން ކައުންސިލްތަކާއި މަޝްވަރާ ކޮށްގެން ކުރިޔަށް ގެންދިޔުމަށް
ރައީސް ފ. ދަރަނބޫދޫ ކައުންސިލާއި އަންހެނުންގެ ތަރައްޤީއަށް މަސައްކަތް ކުރައްވާ ކޮމިޓީއާ ބައްދަލު ކުރެއްވުން
ކައުންސިލްތަކަށް ގްރާންޓް ދިނުމުގައި މިހާރު އޮތް އުސޫލަށް ބަަދަލު ގެންނަން ޖެހޭ ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް މިހެން ވިދާޅުވީ ހޮނިހިރު ދުވަހު ފ. ދަރަނބޫދޫ ކައުންސިލާއި އަންހެނުންގެ ތަރައްޤީއަށް މަސައްކަތް ކުރައްވާ ކޮމިޓީއާ ބައްދަލު ކުރައްވައެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ، ސަރުކާރުން މަސައްކަތް ކުރަނީ ރަށްރަށުގެ ތަރައްޤީއާ ގުޅުންހުރިކަންކަން ކައުންސިލްތަކާއި މަޝްވަރާ ކުރައްވައި ރައްޔިތުންގެ ބައިވެރިވުން ހިމެނޭ ގޮތަށް ކުރިޔަށް ގެންދިޔުމަށް ކަމަށެވެ. މީގެ އިތުރުން ރައީސުލްޖުމްހޫރިއްޔާ ވިދާޅުވީ، ރަށުގެ ރައްޔިތުންނަށް ބޭނުންވެފައިވާ ކަންކަން ސަރުކާރުގެ ކަމާއި ގުޅުން ހުރި މުއައްސަސާތަކާ ގުޅިގެން ކުރިޔަށް ގެންދެވުމަށް މަސައްކަތް ކޮށްދެއްވާނެ ކަމަށެވެ.
މި ބައްދަލުކުރެއްވުމުގައި ރަށުކައުންސިލުން ވަނީ ރަށުގެ ތަރައްޤީއަށް މިސަރުކާރުން ގިނަ މަޝްރޫޢުތަކެއް ހިންގަމުންދާކަން ފާހަގަ ކުރައްވާފައެވެ، އޭގެ އިތުރުން ރައްޔިތުން ބޭނުންވާކަންކަން ރައީސުލްޖުމްހޫރިއްޔާގެ އަރިހުގައި ކައުންސިލުން ދެންނެވިއެވެ. އެކަންކަމުގެ ތެރޭގައި ރަށުގެ ގިރާ ސަރަހައްދު ޙިމާޔަތް ކުރުމާއި، ރަށުގައި ރަނގަޅުފެންވަރުގެ ދަނޑެއް ޓްރެކަކާއި އެކު އެޅުމާއި، އިޖުތިމާޢީ މަރުކަޒެއް ޤާއިމްކުރުން ހިމެނެވެ. އަދި މިހާރު ސަރުކާރުން ދަރަނބޫދޫގައި ޔޫތުއެންޑް ކޮމިއުނިޓީ ސެންޓަރެއް އެޅުމަށް ޢިޢުލާނު ކޮށްފައިވާކަން ކައުންސިލުން ފާހަގަކުރެއްވިއެވެ. މީގެ އިތުރުން ކައުންސިލުން ފާހަގަކުރެއްވި ކަންކަމުގެ ތެރޭގައި، ކައުންސިލްތަކަށް ގްރާންޓް ދިނުމުގައި އޮތް އުސޫލުގެ ސަބަބުން ދިމާވެފައިވާ މައްސަލަތަކާއި، ދަރަނބޫދޫ ސްކޫލުގައި މަލްޓިޕަރޕަސް ހޯލެއްގެ މުހިއްމު ކަމާއި، ސިއްޙީމަރުކަޒުގައި ނަރުހުން މަސައްކަތްކުރުމަށް އެކަށީގެންވާ ޖާގަ ބޭނުންވުން ހިމެނެއެވެ.
މިބައްދަލުވުމުގައި، ދަރަނބޫދޫ އަންހެނުންގެ ތަރައްޤީއަށް މަސައްކަތް ކުރާ ކޮމިޓީން ވަނީ، އެކޮމިޓީން މިދައުރުގެ ތެރޭގައި ހިންގާފައިވާ އެކި އެކި ހަރަކާތްތަކުގެ މައުލޫމާތު ރައީސުލްޖުމްހޫރިއްޔާއާ ޙިއްޞާކުރައްވާފައެވެ. އަދި އ.ތ.މ ކޮމިޓީގެ ހަރަކާތްތައް ކުރިޔަށް ގެންދިޔުމަށް އޮތް ބަޖެޓުގެ ދަތިކަންވެސް ކޮމިޓީގެ ފަރާތުން ވަނީ ފާހަގަކުރައްވާފައެވެ.
