އެސޯސިއޭޝަން ކެރަމް ޗެމްޕިއަންޝިޕް: ރާއްޖޭގެ އެއްވަނަ ވިދާދް އަދި އަޒްމީންއަށް ފުރިހަމަ ކާމިޔާބެއް

11 ވަނަ އެސޯސިއޭޝަން ކެރަމް ޗެމްޕިއަންޝިޕް ގެ ފައިނަލް މެޗުތައް ކުޅެ، ރާއްޖޭގެ އެއްވަނަ ކެރަމް ކުޅުންތެރިން ކަމަށްވާ އާމިނަތު ވިދާދް އަދި އިސްމާއިލް އަޒްމީން އަނެއްކާވެސް ފުރިހަމަ ކާމިޔާބެއް ހޯދައިފިއެވެ.

މެއި 18 އިން 26 އަށް ހުޅުމާލޭ ކެރަމް އެރީނާގައި ކުރިޔަށް ދިޔަ މުބާރާތުގެ ފައިނަލް މެޗުތައް ކުޅެފައިވަނީ ހުކުރު ދުވަހުގެ ރޭގައެވެ. ވިދާދް އަދި އަޒްމީން ވަނީ މި މުބާރާތުގައިވެސް ސިންގަލްސް އާއި ޑަބަލްސް އިން އެއްވަނަ ހޯދާފައެވެ.

އަންހެން ސިންގަލްސް ޗެމްޕިއަންކަން ވިދާދް ހޯދީ ފައިނަލުގައި އާމިނަތު ވިޝާމާ އަތުން ސީދާ ދެ ގޭމުން މޮޅުވެގެނެވެ. ވިދާދް ސެޓުތައް ގެންދިޔައީ 25-15 އަދި 19-9 ގެ ނަތީޖާއަކުންނެވެ. ތިން ވަނަ އަށް ގޮސްފައިވަނީ އާމިނަތު ޝުބާ އާދަމްއެވެ. އަންހެން ޑަބަލްސްގައި، ވިދާދް އާއި ޝުބާ ގެ ޕެއާ ވަނީ ސީދާ ދެ ގޭމުން ފާތިމަތު ރަޔާނާ އަދި ވިޝާމާގެ މައްޗަށް ކުރިހޯދާފައެވެ. ސެޓުތައް ނިމުނީ 25-15 އަދި 25-10 އިންނެވެ. އަންހެން ޑަބަލްސް ގެ ތިންވަނަ އަށް ގޮަސްފައިވަނީ އަފީފުއްނިސާ އާއި ސިޔާމާ ގެ ޕެއާއެވެ.

ފިރިހެން ސިންގަލްސް ޗެމްޕިއަންކަން އަޒްމީން ހޯދީ 25-21 އަދި 22-7 އިން ދެ ގޭމު ކާމިޔާބުކޮށްގެނެވެ. އެ މެޗުގައި ބައްދަލުކުރީ މުހައްމަދު މުންތަސިރު (މުންކޮ) އާއެވެ. ފިރިހެން ސިންގަލްސް ގެ ތިންވަނައަށް ގޮސްފައިވަނީ އިބްރާހިމް ހުޖާން އަލީ އެވެ. ފިރިހެން ޑަބަލްސް އިސްމާއިލް އަޒްމީން އާއި އިބްރާހިމް އަޒްމީންގެ ޕެއާ ކާމިޔާބުކުރީ ހަސަން ނާޒިމް އާއި އުމަރު ޒިޔާދުގެ ޕެއާ 2-1 ގެ ނަތީޖާއަކުން ބަލިކުރުމަށްފަހުއެވެ. ފުރަތަމަ ސެޓު 23-16 އިން އިސްމާއިލް އަޒްމީން އާއި އިބްރާހިމް އަޒްމީންގެ ޕެއާ ކާމިޔާބުކުރިއިރު، ދެވަނަ ސެޓު 19-16 އިން ކާމިޔާބުކުރީ ނާޒިމް އާއި އުމަރުގެ ޕެއާ އިންނެވެ. ފަހު ސެޓު އިސްމާއިލް އަޒްމީން އާއި އިބްރާހިމް އަޒްމީންގެ ޕެއާ ކާމިޔާބުކުރީ 25-12 ގެ ނަތީޖާއަކުންނެވެ. ފިރިހެން ޑަބަލްސްގެ ތިންވަނަ ހޯދާފައިވަނީ އާދަމް އަދީލް އާއި އިބްރާހިމް ލިފާއުގެ ޕެއާއެވެ.

ފިރިހެން ސިންގަލްސް އާއި ޑަބަލްސް އަޒްމީން ކާމިޔާބުކުރި ނަމަވެސް، އޯޕަންސް ސިންގަލްސްގައި އަޒްމީން މައްޗަށް ކުރިހޯދާ، ޗެމްޕިއަންކަން ހޯދީ ހުޖާން އަލީ އެވެ. އޭނާ މި މެޗު ކާމިޔާބުކުރި 25-13 އިންނެވެ. ތިންވަނަ ހޯދީ އަދީލްއެވެ.

މޯލްޑިވްސް ސްޕޯޓްސް އެވޯޑުގައި ދެ އަހަރުވެސް އެންމެ މޮޅު ކެރަމް ކުޅުންތެރިންނަށް ހޮވުނީ ވިދާދް އާއި އަޒްމީން އެވެ.