ރާއްޖޭގައި ކުރިއަށްދިޔަ އޭޝިއަން ކެރަމް ޗެމްޕިއަންޝިޕްގެ ސިންގަލްސް އިވެންޓުގައި، ރާއްޖޭގެ ކުޅުންތެރިންނަށް ކުއާޓާ ފަައިނަލާ ހަމައިން މުބާރާތް ނިންމާލަން ޖެހިއްޖެ އެވެ.

މުބާރާތުގެ ސިންގަލްސް އިވެންޓުގެ މެޗުތައް ކުރިއަށް ދިޔައީ ބުދަ ދުވަހު އެވެ. މުބާރާތުގެ ސިންގަލްސް އިވެންޓުގެ ކުއާޓާ ފައިނަލާ ހަމައަށް ދެވުނީ ރާއްޖޭގެ ދެ ކުޅުންތެރިންނަށެވެ. އެއީ އިސްމާއީލް އަޒްމީން އަދި އާމިނަތު ވިދާދު އެވެ.

ކުއާޓާ ފައިނަލްގައި އަޒްމީން ވާދަކޮށްފައި ވަނީ އިންޑިއާގެ ކޭ ސްރިނަވާސްއާ އެވެ. އޭނާ އާ ދެކޮޅަށް ކުޅުނު ކުއާޓާ ފައިނަލް މެޗު އަޒްމީން ބަލިވީ، ސީދާ ދެ ސެޓުންނެވެ. އިންޑިޔާގެ އެންމެ ފަހުގެ ޤައުމީ ޗެމްޕިއަން، ސްރިނިވާސް މި މެޗުގެ ސެޓުތައް ގެންދިޔައީ 25-13 އަދި 25-09 އިންނެވެ.

ކުއާޓާ ފައިނަލްގައި ވިދާދު ވާދަކޮށްފައި ވަނީ އިންޑިއާގެ ކޭ ނާގަަޖޯތީއާ އެވެ. އެ މެޗުން ވިދާދު ބަލިވެފައި ވަނީ ދެ ސެޓު އެއް ސެޓުންނެވެ. މެޗުގެ ފުރަތަމަ ސެޓު ވިދާދު ކާމިޔާބު ކުރީ 25-24 އިންނެވެ. ނަމަވެސް އިންޑިއާގެ ކޭ ނާގަަޖޯތީއާ ވަނީ ޖެހިގެން ކުޅުނު ދެ ސެޓު ވެސް ކާމިޔާބު ކޮށްފަ އެވެ. އެއީ 04-25 އަދި 11-25 އިންނެވެ.

މުބާރާތުގެ ސިންގަލްސް އިވެންޓުގެ ޗެމްޕިއަންކަން ހޯދީ މުހައްމަދު ގަފްރާން އެވެ. ފައިނަލްގައި އޭނާ ވަނީ އިންޑިއާގެ ސްރިނިވާސް ބަލިކޮށްފަ އެވެ. އަންހެން ބައިގެ ޗެމްޕިއަންކަން ހޯދީ ރާޝްމީ ކުމާރީ އެވެ.

މި މުބާރާތުގެ ޓީމު އިވެންޓު އަދި ޑަބަލްސް އިވެންޓުގައި ރާއްޖެ އިން ވަނީ މެޑަލް ހޯދައިފަ އެވެ. ޑަބަލްސް އިވެންޓުގައި ރާއްޖޭގެ އަޒްމީން އަދި ޙަސަން ނާޒިމް (ނާނަ) ވަނީ ރިހި މެޑަލް ހޯދައިފަ އެވެ. ޓީމު އިވެންޓުގައި ވެސް ރާއްޖޭގެ ފިރިހެން ޓީމުން ވަނީ ރިހި މެޑަލް ހޯދައިފަ އެވެ. އެ ބައިގައި އަންހެން ޓީމުން ވަނީ ލޯ މެޑަލް ހޯދައިފަ އެވެ.

މިއަހަރުގެ މުބާރާތް ކުރިއަށް ގެންދަނީ، 11 އަހަރު ދުވަހުގެ މެދުކެނޑުމަކަށްފަހު އެވެ. މި ފަހަރުގެ މުބާރާތުގައި ރާއްޖެ ހިމެނޭ ގޮތަށް އޭޝިއާ ބައްރުގެ ހަތް ގައުމަކުން ބައިވެރިވި އެވެ. މުބާރާތުގައި ޖުމުލަ 100 އެއްހާ ކުޅުންތެރިން ވާދަކުރި އެވެ.

މުބާރާތުގައި ވާދަކުރި ޤައުމުތަކަކީ ރާއްޖޭގެ އިތުރުން، އިންޑިއާ، ސްރީލަންކާ، ބަންގްލަދޭޝް، ސިންގަޕޫރު، މެލޭޝިއާ އަދި ދެކުނު ކޮރެއާ އެވެ. މިއަހަރުގެ މުބާރާތުގައި، ދުނިޔޭގެ ޗެމްޕިއަންކަން ހޯދާފައިވާ ހަތަރު ކުޅުންތެރިން ވެސް ވަނީ ވާދަކޮށްފަ އެވެ.