މިއަހަރުގެ ކެރަމް ވޯލްޑް ޗެމްޕިއަންޝިޕުގައި ވާދަކުރި ރާއްޖޭގެ ޤައުމީ ކެރަމް ޓީމު އެނބުރި ރާއްޖެ އައުމުން، ޓީމަށް ހޫނު މަރުޙަބާއެއް ކިޔައިފި އެވެ.

އެމެރިކާގެ ކެލަފޯނިއާގައި ކުރިއަށް ދިޔަ މުބާރާތުގައި ރާއްޖޭގެ ފިރިހެން އަދި އަންހެން ކެރަމް ޓީމު ވަނީ ވާދަކޮށްފަ އެވެ. ރާއްޖޭގެ ޤައުމީ ފިރިހެން ޓީމުގައި ހިމެނެނީ ޙަސަން ނާޒިމް، އިބްރާހީމް ހުޖާން އަލީ، އިސްމާއީލް އަޒްމީން އަދި މުޙައްމަދު މުންތަސިރު އެވެ. އަދި ރާއްޖޭގެ ޤައުމީ އަންހެން ޓީމުގައި ހިމެނެނީ އާމިނަތު ވިދާދު، އައިޝަތު ނައުފާ، އައިޝަތު ފައިނާޒް އަދި ފާތިމަތު ރަޔާނާ އެވެ.

މުބާރާތުގެ ޓީމު އިވެންޓުގައި ވާދަކޮށް ރާއްޖޭގެ ދެ ޓީމު ވެސް ވަނީ ލޯ މެޑަލް ހޯދައިފަ އެވެ. ދެ ޓީމަށް ވެސް ޓީމު އިވެންޓުގެ ސެމީ ފައިނަލް އިން ފުރުސަތު ލިބުނުއިރު، ސެމީ ފައިނަލްގައި ނާކާމިޔާބުވެފައި ވަނީ ސްރީ ލަންކާއާ ވާދަކޮށެވެ. ތިން ވަނަ ހޮވަން ކުޅުނު މެޗުގައި އަންހެން ޓީމުން ވަނީ މުބާރާތް ބޭއްވި ޤައުމު އެމެރިކާ ބަލިކޮށްފަ އެވެ. އަދި ފިރިހެން ޓީމުން ވަނީ ތިން ވަނަ ހޮވަން ކުޅުނު މެޗުގައި ސިންގަޕޫރު ބަލިކޮށްފަ އެވެ. މިއީ ވޯލްޑް ކަޕްގައި ރާއްޖޭގެ ޤައުމީ ފިރިހެން ޓީމަށް މެޑައްޔެއް ކާމިޔާބު ކުރެވުނު ފުރަތަމަ ފަހަރެވެ.

ބުދަ ދުވަހުގެ ހަވީރު ޤައުމީ ކެރަމް ޓީމު ރާއްޖެ އައުމުން، ވެލާނާ އިންޓަނޭޝަނަލް އެއާޕޯޓުން ޓީމަށް މަރުޙަބާ ދެންނެވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް (ޠަލާ) އަދި މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ ރައީސް މުޙައްމަދު ޢަބްދުއް ސައްތާރު (ޗަމްޕީ) އެވެ. މީގެ އިތުރުން ކުޅިވަރު ވުޒާރާގެ ސްޓޭޓް މިނިސްޓަރުން ވެސް ވަނީ ޓީމަށް މަރުޙަބާ ދެންނެވުމުގައި ބައިވެރިވެފަ އެވެ.

މިއަހަރު ރާއްޖޭގައި ބޭއްވި އޭޝިއަން ކެރަމް ޗެމްޕިއަންޝިޕްގައި ވެސް ރާއްޖެއިން ވަނީ ރަނގަޅު ނަތީޖާތަކެއް ހޯދައިފައެވެ. އެގޮތުން ޑަބަލްސް އިވެންޓުގައި ރާއްޖޭގެ އިސްމާއީލް އަޒްމީން އަދި ޙަސަން ނާޒިމް ރިހި މެޑަލް ހޯދި އެވެ. ޓީމު އިވެންޓުގައި ރާއްޖޭގެ ފިރިހެން ޓީމު ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދި އެވެ. މުބާރާތުގައި ރާއްޖޭގެ ކުޅުންތެރިން ވަނީ ސިންގަލްސް އިވެންޓުގެ ކުއާޓާ ފައިނަލްގައި ވެސް ވާދަކޮށްފަ އެވެ.