ކެރަމް ވޯލްޑް ކަޕް ރާއްޖޭގައި، މުބާރާތުގެ ލޯގޯ ލޯންޗުކޮށްފި
މިއީ ރާއްޖޭގައި ކެރަމް ވޯލްޑް ކަޕް ބާއްވާ ދެ ވަނަ ފަހަރެވެ. އެގޮތުން 2014 ވަނަ އަހަރު ވެސް ރާއްޖޭގައި ވަނީ ކެރަމް ވޯލްޑް ކަޕް ބާއްވައިފަ އެވެ.
ކެރަމް ވޯލްޑް ކަޕްގެ ލޯގޯ ލޯންޗު ކުރުމަށް ބޭއްވި ރަސްމިއްޔާތުގެ ތެރެއިން
މިއަހަރުގެ ކެރަމް ވޯލްޑް ކަޕް ދިވެހި ރާއްޖޭގައި ބޭއްވުމުގެ ފުރުސަތު ލިބިފައިވާއިރު، މުބާރާތުގެ ލޯގޯ ރަސްމީކޮށް ލޯންޗުކޮށްފި އެވެ.
މުބާރާތް ބޭއްވުމުގެ ފުރުސަތު ދިވެހި ރާއްޖެ އަށް ލިބިފައިވާކަން ރަސްމީކޮށް އިއުލާން ކުރުމަށް، އަންގާރަ ދުވަހު ވަނީ ޚާއްސަ ރަސްމިއްޔާތެއް ބާއްވައިފަ އެވެ. އެ ރަސްމިއްޔާތުގައި މުބާރާތުގެ ލޯގޯ ރަސްމީކޮށް ލޯންޗު ކޮށްދެއްވީ ކުޅިވަރު ވަޒީރު ޢަބްދުﷲ ރާފިޢު (ރާއްޕެ) އެވެ.
މިދިޔަ އަހަރު ރާއްޖެ އިން ވަނީ އެމެރިކާގެ ކެލަފޯނިއާގައި ކުރިއަށް ދިޔަ ކެރަމް ވޯލްޑް ކަޕްގައި ވާދަކޮށްފަ އެވެ މުބާރާތުގެ ޓީމު އިވެންޓުގައި ވާދަކޮށް ރާއްޖޭގެ ދެ ޓީމު ވެސް ވަނީ ލޯ މެޑަލް ހޯދައިފަ އެވެ. ދެ ޓީމަށް ވެސް ޓީމު އިވެންޓުގެ ސެމީ ފައިނަލް އިން ފުރުސަތު ލިބުނުއިރު، ސެމީ ފައިނަލްގައި ނާކާމިޔާބުވެފައި ވަނީ ސްރީ ލަންކާއާ ވާދަކޮށެވެ.
މީގެ އިތުރުން މިދިޔަ އަހަރު ރާއްޖޭގަައި ބޭއްވި އޭޝިއަން ކެރަމް ޗެމްޕިއަންޝިޕްގައި ވެސް ރާއްޖެއިން ވަނީ ރަނގަޅު ނަތީޖާތަކެއް ހޯދައިފަ އެވެ. އެގޮތުން ޑަބަލްސް އިވެންޓުގައި ރާއްޖޭގެ އިސްމާއީލް އަޒްމީން އަދި ޙަސަން ނާޒިމް ރިހި މެޑަލް ހޯދި އެވެ. ޓީމު އިވެންޓުގައި ރާއްޖޭގެ ފިރިހެން ޓީމު ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދި އެވެ. މުބާރާތުގައި ރާއްޖޭގެ ކުޅުންތެރިން ވަނީ ސިންގަލްސް އިވެންޓުގެ ކުއާޓާ ފައިނަލްގައި ވެސް ވާދަކޮށްފަ އެވެ.
މިއީ ރާއްޖޭގައި ކެރަމް ވޯލްޑް ކަޕް ބާއްވާ ދެ ވަނަ ފަހަރެވެ. އެގޮތުން 2014 ވަނަ އަހަރު ވެސް ރާއްޖޭގައި ވަނީ ކެރަމް ވޯލްޑް ކަޕް ބާއްވައިފަ އެވެ.
