ކެރަމް އެސޯސިއޭޝަން އޮފް މޯލްޑިވްސް އިން އިންތިޒާމު ކޮށްގެން ކުރިއަށް ގެންދިޔަ، އެސޯސިއޭޝަން ކަޕްގެ އޯޕަން ސިންގަލްސް އިވެންޓުގެ ޗެމްޕިއަންކަން ޔަމާން ޢަބްދުލް ޖަލީލް ހޯދައިފި އެވެ.

އޯޕަން ސިންގަލްސް އިވެންޓުގެ ޗެމްޕިއަންކަން ޔަމާން ހޯދީ، މި އިވެންޓުގެ ފައިނަލްގައި އާދަމް އަދީލްގެ މައްޗަށް ކުރި ހޯދައިގެންނެވެ. ފައިނަލް މެޗުގައި ޔަމާން ވަނީ ސީދާ ދެ ސެޓުން އަދީލް ބަލިކޮށްފަ އެވެ. އެއީ މެޗުގެ ފުރަތަމަ ސެޓު 25-09 އަދި ދެ ވަނަ ސެޓު 25-18 އިންނެވެ.

މީގެ އިތުރުން އޯޕަން ސިންގަލްސް އިވެންޓުގެ ތިން ވަނަ ހޮވަން ކުޅުނު މެޗުގައި ބައްދަލު ކޮށްފައި ވަނީ އިސްމާއީލް އަޒްމީން އަދި ޚާތިމް ޚަލީލް އެވެ. އެ މެޗުގައި އަޒްމީން ވަނީ ސީދާ ދެ ސެޓުން ޚާތިމްގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ސެޓު އަޒްމީން ކާމިޔާބު ކުރީ 24-14 އިންނެވެ. އަދި ދެ ވަނަ ސެޓު ކާމިޔާބު ކޮށްފައި ވަނީ 25-09 އިންނެވެ.

މިއަހަރުގެ އެސޯސިއޭޝަން ކަޕްގެ 15 އަހަރުން ދަށް، އަދި 19 އަހަރުން ދަށުގެ ކުޅުން ވެސް ވަނީ ނިންމާލައިފަ އެވެ.