ނަސްލީ ތަފާތުކުރުމާ ދެކޮޅަށް ސްޕެއިންގެ ކޮންސިއުލޭޓާއި އެމްބަސީދޮށުގައި ބްރެޒިލް ރައްޔިތުން މުޒާހަރާކޮށްފި

ވިނީޝިއަސް ޖޫނިއާގެ ދިފާއުގައި، ބްރެޒިލްގައި ހުންނަ ސްޕެއިންގެ އެމްބަަސީއާއި ކޮންސިއުލޭޓްދޮށުގައި ބްރެޒިލްގެ ރައްޔިތުން މުޒާހަރާކޮށްފިއެވެ.

ރެއާލް މެޑްރިޑަށް ކުޅެމުން އަންނަ ބްރެޒިލްގެ ޒުވާން ތަރި، ވިނީޝިއަސް ޖޫނިއާއަށް ނަސްލީ ފުރައްސާރަކުރުމާ ގުޅިގެން ބްރެޒިލްގައި މުޒާހަރާކޮށްފައި ވަނީ އަންގާރަ ދުވަހުއެވެ. ސައު ޕައުލޯގައި ހުންނަ ސްޕެއިންގެ ކޮންސިއުލޭޓާއި އެމްބަސީދޮށުގައި ކުރި އިހުތިޖާޖުގައި ގިނަ އަދަދެއްގެ ރައްޔިތުން ވަނީ ބައިވެރިވެފައެވެ.

މުޒާހަރާގެ ބައިވެރިން ބުނީ އެ ހަރަކާތަކީ ވިނީޝިއަސްގެ ދިފާއުގައި ހިންގި ހަރަކާތެއް ކަމަށެވެ. އަދި އެމީހުން ނިކުތީ އިންސާފު ހޯދުމަށް ގޮވާލައި، ސްޕެއިންގެ ސަރުކާރަށް އަޑު އިއްވުމަށްކަމަށެވެ. މުޒާހަރާގެ ބައިވެރިން ކޮންސިއުލޭޓްގެ ކުރިމަތީގައި ބޭނުންކުރި ޕޯސްޓަރުތަކުގެ ތެރޭގައި "އެއީ ފުޓްބޯޅައެއް ނޫން، އެއީ ނަސްލީ ތަފާތުކުރުން" ފަދަ މެސެޖުތައް ހިމެނެއެވެ.

ވިނީޝިއަސްގެ ދިފާއުގައި ބްރެޒިލްގެ ލެޖެންޑު އަދި ދުނިޔޭގައި އުފެދުނު އެންމެ މޮޅު އެއް ކުޅުންތެރިޔާ، ޕެލޭގެ އަންހެން ދަރިވެސް ވަނީ އަޑު އުފުލާފައެވެ.