ފީފާ އިން ދުނިޔޭގެ ސިއްހަތު ޖަމިއްޔާއާއެކު މަސައްކަތް ކުރުމުގައި ދެމިހުންނާނެ: އިންފަންޓީނޯ

ފީފާ އިން ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އާއެކު މަސައްކަތް ކުރުމުގައި ދެމިހުންނާނެކަމަށް ފީފާގެ ރައީސް ޖިއާނީ އިންފަންޓީނޯ ވިދާޅުވެއްޖެއެވެ.

ފީފާ އާއި ޑަބްލިޔުއެޗްއޯ އިން 2019 ވަނަ އަހަރު ވަނީ އެއްބަސްވުމެއްގައި ސޮއިކޮށް، އާންމު ސިއްހަތުގެ މަސްލަހަތުގައި އެކުގައި މަސައްކަތް ކުރަން އެއްބަސްވެފައެވެ. ޑަބްލިޔުއެޗްއޯގެ އެސެމްބްލީގައި ވާހަކަފުޅު ދައްކަވަމުން އިންފަންޓީނޯ ވިދާޅުވީ، 2019 ވަނަ އަހަރު ވެވުނު އެއްބަސްވުމުގެ މުއްދަތު އިތުރު ހަތަރު އަހަރަށް އައު ކޮށްފައިވާނެކަމަށެވެ.

އިންފަންޓީނޯ އިތުރަށް ވިދާޅުވީ، ދުވަހެއް ދުވަހަކަށް ބައިބައިވެފައިވާ ދުނިޔޭގައި ގުޅިގެން މަސައްކަތް ކޮށްފިނަމަ، ކަންކަން ހާސިލު ކުރެވިދާނެކަމަށާއި ދިރިއުޅުން ރަނގަޅު ކުރުމަށް ކުޑަ އަސަރެއް ނަމަވެސް ކޮށްފާނެކަމަށެވެ.

ޖެނީވާގައި 194 ގައުމެއްގެ މަންދޫބުން ބައިވެރިވި އެސެމްބްލީގައި އިންފަންޓީނޯ ވަނީ ސިއްހީ ހިދުމަތްތެރިންނަށް ޝުކުރު އަދާކުރައްވައި، އާންމުންގެ ދުޅަހެޔޮކަމުގައި ފުޓްބޯޅައިގެ މުހިންމުކަން ފާހަގަކުރައްވާފައެވެ.