"ކަނޑުއުޅަނދުގެ ސަރވޭ ކުރާ އިރު ވަސީލަތްތައް ހަމަކުރުމަށް ފަހު، ފަހުން ބަދަލުކުރާ މައްސަލަ ބޮޑު"
21 މެއި 2023 | އާދީއްތަ 14:04ސަލާމަތީ ޤަވާއިދު އެކުލަވާލީ 2015ގައި
އިކޮނޮމިކް މިނިސްޓްރީގެ ޑިރެކްޓަރ ހުސެއިން ނަޒީރު
ކަނޑުއުޅަނދުގެ ސަރވޭ ކުރާ އިރު ވަސީލަތްތައް ހަމަކުރުމަށް ފަހު، ފަހުން ބަދަލުކުރާ މައްސަލަ ބޮޑުކަމަށާއި އެފަދަ އަމަލުތަކުން އުޅަނދުތައް ނުރައްކަލަށް ހުށަހެޅޭ ކަމަށް ޓްރާންސްޕޯޓް މިނިސްޓްރީގެ ޑިރެކްޓަރ ހުސެއިން ނަޒީރު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީގައި ވާހަކަދައްކަވަމުން ނަޒީރު ވިދާޅުވީ ސަލާމަތީ ޤަވާއިދު 2015 އިގައި ގެޒެޓްކޮށްފައި ވަނީ ސަލާމަތީ ގޮތުން އަޅަން ޖެހޭ ގިނަ ފިޔަވަޅުތަކެއް ހިމެނޭ ގޮތަށް ކަމަށެވެ. އަދި އެ ގަވާއިދު ތަންފީޒުކުރުމުގެ ކުރިން ހޭލުންތެރިކުރުމަށް ގިނަ ޕްރޮގްރާމްތަކެއް ހިންގާފައިވާ ކަމަށާާއި އެ ގަވާއިދު ތަންފީޒުކުރަން ފަށާފައި ވަނީ ވެސް މަޑުމަޑުން ފަހަރަކު ކަމެއް ތާވަލްކޮށްގެން ކަަމަށެވެ.
އެ ގަވާއިދަށް 8 އަހަރުވި އިރު ވެސް އުޅަނދުފަހަރުގެ ކަންކަން ހުންނަން ޖެހޭ ގޮތް ނޭނގޭ ކަމަށް ބުނާ ކަމަށާއި، އެއީ ބަލައިގަނެވޭ ކަމެއް ނޫން ކަމަށް އޭނާ ވިދާޅުވިއެވެ. އޭގެ ތެރޭގައި އުޅަނދުފަހަރު އެހެލާ މަރާމާތުކުރުމާއި، ސަރވޭ އާއި ގުޅުން ހުރި ކަންކަން ހިމެނޭ ކަމަށް ނަޒީރު ވިދާޅުވިއެވެ. އަދި ކޮންމެ އުޅަނދަކަށް ވެސް ސަރވޭގެ ކުރިން އަލަށް އެކުލަވާލާ ގަވާއިދުތަކާއި އުސޫލުތަކުގެ މައުލޫމާތު ދެމުންދާކަމަށް އޭނާ ވަނީ ވިދާޅުވެފައެވެ.
އޭނާ އިތުރަށް ވިދާޅުވީ މެރިން ވީއެޗްއެފް ފަދަ ވަސީލަތްތަކަކީ އުޅަނދުގެ ސަލާމަތަށްޓަކާ ވަރަށް މުހިންމު ވަސީލަތްތައް ކަމަށާއި، ކަނޑުމަތީގެ ހާދިސާއެއް ހިނގައިގެން ބަލާ އިރު އެފަދަ ވަސީލަތްތައް އުޅަނދުގައި ނެތުމަކީ ދިމާވާ މައްސަލަ އެއް ކަމަށެވެ. ނަމަވެސް ކޮންމެ އުޅަނދަކަށް ވެސް ދޭންވާ ހުއްދަތައް ދެނީ އުޅަނދުގައި ހުންނަން ޖެހޭ ވަސީލަތްތައް ފުރިހަމަ އަށް ހުރިކަން ޔަގީން ކުރުމަށް ފަހުގައި ކަމަށް ވެސް އޭނާ ވިދާޅުވިއެވެ. އުޅަނދުތައް ގެންގުޅޭ ފަރާތްތަކުން ސަރވޭ ކުރަން ދާ އިރު ތަކެތި ހަމަކޮށްފައި ބެހެއްޓި ނަމަވެސް އާއްމުކޮށް އުޅަނދު ދުއްވާއިރު ސަލާމަތީ ގޮތުން ފުރިހަމަވާން ޖެހޭ ކަންކަން ފުރިހަމަކޮށްފައި ބަހައްޓަން އިސްކަން ނުދޭ ކަމަށް ނަޒީރު ވިދާޅުވިއެވެ.
ނަަޒީރު ވިދާޅުވީ ރާއްޖޭގައި ހުރިހާ އުޅަނދެއްގައި ދަތުރަށް ފުރާއިރު މެރިން ވީއެޗްއެފް ސިސްޓަމް ހުރެއްޖެ ނަމަ އެއީ ހުރިހާ އުޅަނދުތަކެއްގެ ރައްކާތެރިކަމަށް އެޅޭ މުހިންމު ފިޔަވަޅެއް ކަމަށެވެ. މީގެ އިތުރުން ލައިފްޖެކެޖްޓާއި، މީހުން އުފުލާނަމަ ބޮޔަންޓް އަޕަރޭޓަސް ހުންނަން ޖެހޭ ކަމަށާއި އެއީ ވެސް ސަލާމަތީ ގޮތުން މުހިންމު ކަމެއް ކަމަށް އޭނާ ވަނީ ވިދާޅުވެފައެވެ. އެހެންނަމަވެސް ވަރަށް ގިނަ ފަހަރު އެއީ އަގުބޮޑު ކަމެއް ކަމަށް ބުނެ ނުކޮށް ދޫކޮށްލާތަން ފެންނަ ކަމަށާއި އެއީ ހިތާމަކުރައްވާ ކަމެއް ކަަމަށް ނަޒީރު ވަނީ ވިދާޅުވެފައެވެ.
