އުޅަނދުތަކުގެ ކެޕްޓަނުންގެ ގޮތުގައި ހަރަކާތްތެރިވާނީ އެކަމުގެ ތަމްރީނާއި ތައުލީމު ފުރިހަމައަށް ލިބިފައިވާ މީހުން
ކަނޑު ދަތުރުފަތުރުގެ އުޅަނދުތައް
ކަނޑުގައި ދުއްވާ އުޅަނދުފަހަރާއި ގުޅޭ 3 ގަވާއިދެއް ގެޒެޓްކޮށް މިއަހަރު ތެރޭގައި އަމަލުކުރަން ފަށާނެކަމަށް ޓްރާންސްޕޯޓް މިނިސްޓްރީގެ ޑިރެކްޓަރ ހުސައިން ނަޒީރު ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ނަޒީރު ވިދާޅުވީ 2015 ވަނަ އަހަރު އަމަލުކުރަން ފަށާފައިވާ ކަނޑުދަތުރުފަތުރުކުރާ ފަރާތްތަކުގެ ސަލާމަތާއި ބެހޭ ގަވާއިދަށް އަމަލުކުރަން ފެށިފަހުން ފާހަގަވި ކަންކަމަށް ބެލުމަށްފަހު އެކުލަވާލި މިގަވާއިދުތައް ތަންފީޒުވެގެންދާއިރު އުޅަނދުތަކުގެ ކެޕްޓަނުންގެ ގޮތުގައި ހަރަކާތްތެރިވާނީ އެކަމުގެ ތަމްރީނާއި ތައުލީމު ފުރިހަމައަށް ލިބިފައިވާ މީހުންކަމަށެވެ.
އަމަލުކުރަން ފަށާ ގަވާއިދުތަކުގެ ތެރެއިން އެއް ގަވާއިދަކީ ފަޅުވެރިންގެ ތަމްރީނާއި ތައުލީމާއި އެކަން ފުރިހަމަކުރުމާއި ގުޅޭ ގަވާއިދެއްކަމަށް ނަޒީރު ވިދާޅުވިއެވެ.
ދެވަނަ ގަވާއިދަކީ ކަނޑުދަތުރުކުރާ އުޅަނދުތަކަށް ލައިސަންސް ދިނުމާއި ގުޅޭ ގަވާއިދެއްކަމަށާއި މިގަވާއިދަށް ޖުލައި 15 ގައި އަމަލުކުރަން ފަށާނެކަމަށް ނަޒީރު ވިދާޅުވިއެވެ. މިގަވާއިދުގެ ދަށުން ވަރަށް ގިނަ ބަދަލުތަކެއް އަންނާނެކަމަށް ނަޒީރު ވިދާޅުވިއެވެ.
ތިން ވަނަ ގަވާއިދަކީ މިމަހުގެ 19 ވަނަ ދުވަހު އަމަލުކުރަން ފަށާ މުދާ ބަރުކުރުމާއި މުދާ އުފުލުމާއި ބެހޭ ގަވާއިދެވެ. މިގަވާއިދުގައި ބޮޑަށް އަލިއަޅުވާލާފައިވާނީ މުދާ ބަރުކުރާނެ ގޮތްތަކާއި މުދާ އުފުލާ އުޅަނދުފަހަރުގައި ތިބެންޖެހޭ ފަޅުވެރިންނާއި އެމީހުންގެ ތަމްރީނުތައް ހަމަޖެހިފައިވާ ގޮތެވެ. އުޅަނދުގައި މުދާ ޖަހާނެ ގޮތާއި ތެލާއި ގޭސް އުފުލާ އުޅަނދުފަހަރު ހުންނަންޖެހޭނެ ގޮތްތައް ބަޔާންކޮށްފައިވާނެކަމަށް ނަޒީރު ވިދާޅުވިއެވެ.
ނަޒީރު ވިދާޅުވީ ކަނޑުމަތީގައި ހިނގާ ހާދިސާތަކަށް ބަލާ ގަވާއިދުތަކަށް ބަދަލުތައް ގެނެސްފައިވާކަމަށެވެ.
