އިއުތިސާމްގެ މައްޗަށް ކުރި ޓެރަރިޒަމާ ގުޅުންހުރި ދައުވާ ސާބިތެއް ނުވި
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދު
ކްރިމިނަލް ކޯޓް
2017 ވަނަ އަހަރު އައިއީޑީއެއް ތައްޔާރުކުރުމަށް ބޭނުންވާ ތަކެއްޗާއި ކެމިކަލް، ތަނެއްގެ ތެރޭގައި ތައްޔާރުކޮށް އައިއީޑީއެއް ހަދާ އެ ގޮއްވާލުމަށް ރާވަމުންދާކަމުގެ ތުހުމަތުގައި ޓެރަރިޒަމާ ގުޅޭ ދައުވާއެއް އުފުލާފައިވާ އިއުތިސާމް މުހައްމަދު ސައީދު، ގަމަރީ/ ގދ. މަޑަވެލިގެ މައްޗަށް ކުރި ދައުވާ ސާބިތުނުވާކަމަށް ކްރިމިނަލް ކޯޓުން ޙުކުމް ކޮށްފިއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒް ރަޝާދެވެ.
ދައުލަތުން ބުނާ ގޮތުގައި އޭނާގެ މޯބައިލް ފޯނާއި، އޭނާގެ ކޮޓަރިން ފެނުނު ޕެންޑްރައިވްގެ އިތުރުން، އިތުރު ފޯނެއް ޗެކްކުރިއިރު، ޓެރަރިސްޓް ޖަމާއަތެއްކަަމަށްވާ އައިސިސްއަށް ތާއީދުކުރާކަން ދޭހަވާފަދަ ތަކެތި ފެނިފައިވެއެވެ. އޭގެ ތެރޭގައި އައިސިސްގެ ލޯގޯއެއްގެ ފޮޓޯއަކާއި، ބައެއް ލިއުންތައް ހިމެނޭކަމަށް ދައުލަތުން ބުނެއެވެ.
އޭނާއަކީ ހަރުކަށި ފިކުރުގެ މައްސަލައިގައި އައްޑޫސިޓީން ހައްޔަރު ކުރި މީހުންގެ ތެރޭގައިވެސް ހިމެނޭ މީހެކެވެ. އިއުތިސާމް މުހައްމަދު ސައީދު އޭރު ހައްޔަރުކުރީ، އެ މައްސަލައިގައި ހިމެނޭ ހއ ހޯރަފުށީ އަލަނާސިގޭ މުހައްމަދު ތަސްލީމް ޓެރަރިޒަމް އަމަލުތައް ހިންގުމަށް އަމަލީގޮތުން މަސައްކަތްކޮށް، ހަރުކަށި ފިކުރު ފެތުރުމާއި ޓެރަރިޒަމްގެ އަމަލްތައް ހިންގުމަށް ހިތްވަރުދީ، އަދި ގޮވާތަކެތި ހެދުމުގެ މައުލޫމާތު އެހެން މީހުނަށް ފޯރުކޮށްދޭކަމަށް ތުހުމަތުކުރެވޭ މައްސަލައިގައި އިއުތިސާމް މުހައްމަދު ސައީދުގެ ބައިވެރިވުން އޮތްކަމަށް ތުހުމަތު ކުރެވިގެންނެވެ.
މުހައްމަދު ތަސްލީމަކީ ރައީސް މުޙައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެންވެސް ދައުވާ އުފުލައި ޝަރީއަތް ހިންގެމުންދާ ފަރާތެކެވެ.
ދިފާއުން ބުނެފައިވާ ގޮތުގައި މި މައްސަލައިގައި ހިމެނޭ ޕެންޑްރައިވްގެ ހަގީގަތް ތަހުގީގު މަރުޙަލާގައިވެސް ވަނީ ކިޔާދީފައެވެ. އަދި މި ދައުވާއާއި ގުޅިގެން ފުލުހުން ހޯދާފައިވާ ހެކިތަކަކީ އިއުތިސާމްއަށް އޭގެ މައުލޫމާތެއް އެނގިފައިވާ ހެކިތަކެއް ނޫންކަމަށް ދިފާއުން ބުނެއެވެ.
ޙުކުމުގައި ބުނެފައިވަނީ އެ ޕެން ޑްރައިވަކީ އިއުތިސާމަށް މީހަކު ދިން އެއްޗެއް ކަން ސާބިތު ކުރުމަށް ދިފާއީ ހެކި ހުށައަޅާފައިވާ ކަމަށެވެ. އެ ހެކިތައް ނަފީ ކުރުމަށް ދައުލަތުން ހެއްކެއް ހުށައަޅާފައިނުވާކަމަށްވެސް ޙުކުމުގައި ބުނެއެވެ.
އޭގެ އިތުރުން، ދައުވާ ސާބިތު ކުރުމަށް ދައުލަތުން އިންޓެލިޖެންސް ރިޕޯޓް ހުށައަޅާފައިވީނަމަވެސް، އެ ރިޕޯޓުގައި ހިމެނޭ ކަންކަން ސާބިތުކުރަން އިތުރު ގަރީނާ ހުށަހެޅިފައި ނެތުމުން އެ ރިޕޯޓަށް އެކަނި ބުރަދަން ނުދެވޭނެކަމަށްވެސް ގާޒީ ވަނީ ނިންމަވާފައެވެ.
