ބްރައިޓަން އަތުން ބަލިވެ، އާސެނަލްގެ އުއްމީދު ފަނޑުވެ، ލީގު ގެއްލިއްޖެ!

ސީޒަންގެ ބޮޑުބައިގަ އިނގިރޭސި ޕްރިމިއަރ ލީގު ތާވަލްގެ އެއްވަނަ ދަމަހައްޓަމުން އައި އާސެނަލް ބްރައިޓަން އަތުން ބަލިވެ, ލީގު ޗެމްޕިއަންކަން ހޯދުމުގެ އުއްމީދު ފަނޑުވެއްޖެއެވެ.

އާސެނަލްގެ އުއްމީދު ފަނޑުވީ ބްރައިޓަން އަތުން ބަލިވުމާއެކު, އެއްވަނާގައި އޮތް ޗެމްޕިއަން މެންޗެސްޓަރ ސިޓީއާ ދެމެދު އޮތް ފަރަގު ހަތަރު ޕޮއިންޓަށް ފުޅާވުމުންނެވެ. ލީގުގައި އާސެނަލްއަށް ބާކީ އޮތީ ދެ މެޗެވެ. ސިޓީއަށް ތިން މެޗު އެބައޮތެވެ. އެހެންކަމުން ސިޓީއަށް ކުރިއަށް އޮތް ޗެލްސީ މެޗުން މޮޅުވެގެން ލީގު ޗެމްޕިއަންކަން ދިފާއުކުރެވޭނެއެވެ. އަންނަ އާދިއްތަ ދުވަހު ޗެލްސީއާ ދެކޮޅަށް ސިޓީ ނިކުންނާނީވެސް އަމިއްލަ ދަނޑުގައެވެ. އާސެނަލްއަށް އޮތީ ތިން މެޗުން ސިޓީ ބަލިވާނެކަމަށް އުއްމީދުކުރުމެވެ. އެކަމަކު ސިޓީ އޮތީ ވަރަށް ރަނގަޅު ފޯމެއްގައި މޮޅުވުމުގެ ސިލްސިލާއެއްގައެވެ. ޗެލްސީ މެޗުގެ ކުރިންވެސް ސިޓީއަށް ލީގު ކަށަވަރުކުރުމުގެ ފުރުޞަތު އެބައޮތެވެ. އެއީ ހޮނިހިރު ދުވަހު ނޮޓިންގހަމް ފޮރެސްޓް އަތުން އާސެނަލް ބަލިވެއްޖެ ނަމައެވެ.

ބްރައިޓަން އަތުން އާސެނަލް ބަލިވީ 3-0 ނެވެ. މެޗުގައި އާސެނަލް ކޮޅަށް ތިން ލަނޑުވެސް ވަނީ ދެވަނަ ހާފްގައެވެ. ފުރަތަމަ ލަނޑު ގޯލްއޭރިޔާ ތެރެއަށް ހުރަސްކޮށްލި ބޯޅައެއް ބޮލުން ފޮނުވާލައިގެން ޖެހީ އެންސިސޯއެވެ. ކީޕަރަށް ހެދުނު ގޯހެއްގައި ދެވަނަ ގޯލް ޖެހީ ބަދަލަކަށް ނިކުމެ ޑެނިސް އުންޑާވްއެވެ. ތިންވަނަ ގޯލަކީވެސް ފަހަތުން ހެދި ގޯހެއްގެ ފައިދާ ނަގައިގެން ޖެހި ގޯލެކެވެ. އެގޯލް ޖެހީ މެޗުގެ އިތުރު ވަގުތުގައި އެސްޓުޕިނާއެވެ.

މެޗުން މޮޅުވެ ބްރައިޓަން ވަނީ 58 ޕޮއިންޓާއެކު ހަވަނައަށް ޖެހިލާފައެވެ. އެއީ 34 މެޗުންނެވެ. ހަތްވަނާގައި ޓޮޓެންހަމް އޮތީ 36 މެޗުން 57 ޕޮއިންޓާއެކުއެވެ.