52 މިލިއަން ރުފިޔާ ނެގުމަށް ޙުކުމުގައި ހިމަނާފައިނުވާތީ ޙުކުމް އިސްތިއުނާފު ކުރުމުގެ ހުއްދައަކަށް ޕީޖީން ހައިކޯޓުގައި އެދިއްޖެ
14 މެއި 2023 | އާދީއްތަ 07:38ދައުލަތުން އެދިފައިވާކަމެއް މައުޟޫއީ މައްސަލައިގެ ނިންމުމުގައި ހިމަނާފައިނުވާނަމަ އޮންނަ ހައްލަކީ އިސްތިއުނާފު ކުރުން
ރައީސް ޔާމީނުގެ ފަރާތުން ހައިކޯޓުގައި އިސްތިއުނާފު ކުރި މައްސަލައިގެ އަޑުއެހުމެއްގެ ތެރެއިން
ވ. އާރަށު މައްސަލާގައި 52 މިލިއަން ރުފިޔާ ދައުލަތަށް ދެއްކުމަށް، ކުރީގެ ރައީސް އަބްދުﷲ ޔާމީންގެ މައްޗަށް އަމުރުކޮށްދިނުމަށް ދައުލަތުން ދަށު ކޯޓުގައި އެދުނު ނަމަވެސް، ޙުކުމުގައި އެފަަދަ އަމުރެއް ހިމަނާފައިނުވާތީ އެކަން ދިވެހިރާއްޖޭގެ ހައިކޯޓުގައި އިސްތިއުނާފު ކުރުމުގެ ހުއްދައަކަށް ދައުލަތުން އެދިއްޖެއެވެ.
ވ. އާރަށު މައްސަލާގައި 52 މިލިއަން ރުފިޔާ ދައުލަތަށް ދެއްކުމަށް، ކުރީގެ ރައީސް އަބްދުﷲ ޔާމީންގެ މައްޗަށް ކުރި އަމުރު ބާތިލުކުރުމަށް ހައިކޯޓުން ވަނީ ނިންމާފައެވެ.
މި މައްސަލާގައި ހައިކޯޓުގެ ފަނޑިޔާރުން ނިންމާފައިވަނީ، ދައުލަތުން އެދިފައިވާކަމެއް މައުޟޫއީ މައްސަލައިގެ ގަޒިއްޔާގެ ނިންމުމުގައި ހިމަނާފައިނުވާނަމަ، އެކަމަށް އަދުލުގެ ނިޒާމުގައި އޮންނަ ހައްލަކީ އިސްތިއުނާފު ކުރުންކަމަށެވެ.
ދަށު ކޯޓުގެ އެ ނިންމުން އިސްތިއުނާފު ކުރުމުގެ މުއްދަތުވެސް މިހާރު ވަނީ ހަމަވެފައެވެ.
އެހެންނަމަވެސް ޕީޖީ އޮފީހުން ވަނީ ހައިކޯޓަށް ސިޓީއެއް ހުށައަޅާފައެވެ. އެގޮތުން ޕީޖީ އޮފީހުން މިހާރު ވަނީ އެ ނިންމުމުގެ އިސްތިއުނާފު ބަލައިގަތުމަށް ހުއްދައަކަށް އެދިފައެވެ.
ޕީޖީ އޮފީހުން ހައިކޯޓުގައި އެގޮތަށް އެދިފައިވަނީ މިދިޔަ ހަފްތާގައެވެ. ހައިކޯޓަށް ހުށައެޅި ސިޓީގައި ޕީޖީން ވަނީ ދަށު ކޯޓުގައި އެ މައްސަލަ ކުރިއަށް ދިޔައިރު ފައިސާ ނަގައިދޭން އެދުނުކަމާއި، ދަށު ކޯޓުގެ ޙުކުމުގައި ފައިސާގެ ވާހަކަ ހިމަނާފައި ނެތުމުން، އެކަން ވީގޮތް ސާފު ކުރުމަށް ދަށު ކޯޓަށް ސިޓީވެސް ހުށައެޅިކަމަށް ބަޔާންކޮށްފައެވެ.
އެގޮތަށް މައުލޫމާތު ސާފު ކުރަން ހުށައެޅީ ދަށު ކޯޓަށް ހަނދާން ނެތިގެން ޙުކުމުގައި އެ ބައި ހިމަނާފައިނުވާނަމަ އިސްތިއުނާފު ކުރުމަށެވެ. ނަމަވެސް އެ ސިޓީއަށް ކޯޓުން ޖަވާބެއް ދީފައިނުވާކަމަށް ޕީޖީ އޮފީހުން މައުލޫމާތު ދެއެވެ.
އަދި ފަހުން ދަށު ކޯޓުން ވަނީ 52 މިލިއަން ރުފިޔާ ދައުލަތަށް ދެއްކުމުގެ އަމުރު ވަކިން ނެރުއްވާފައެވެ. އެ އަމުރު ބާތިލުކަމަށް މިހާރު ހައިކޯޓުން ވަނީ ނިންމާފައެވެ.
ވުމާއެކު، އެކަން ހިނގާ ދިޔަ ގޮތް ބަޔާންކޮށް ޕީޖީން ހައިކޯޓަށް ސިޓީއެއް ހުށައެޅީއެވެ.
ވ. އާރަށް ކުއްޔަށްދިނުމުގެ މުޢާމަލާތާ ގުޅިގެން ރައީސް ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކްރިމިނަލް ކޯޓަށް ހުށަހެޅި މަނީ ލޯންޑްރިންގގެ ކުށުގެ ދަޢުވާގައި ހިމެނޭ ކުށްކޮށްގެން ހޯދާފައިވާ ފައިސާ ދައުލަތަށް ނެގުމުގެ ބައި ދިވެހިރާއްޖޭގެ ހައިކޯޓުގައި އިސްތިއުނާފުކުރުމަށް ހުށައަޅާފައިވަނީ 07 މޭ 2023 ދުވަހުއެވެ.
މީގެ ތެރޭގައި ހިމެނެނީ ޢަބްދުﷲ ޔާމީން ޢަބްދުލްޤައްޔޫމް ލޯންޑަރކުރިކަމަށް ސާބިތުވެފައިވާ 1 މިލިއަން އެމެރިކާ ޑޮލަރާއި، އެ ފައިސާއާ އެއްކޮށްފައިވާ 2،413،230 (ދެމިލިއަން ހަތަރުލައްކަ ތޭރަހާސް ދުއިސައްތަ ތިރީސް) އެމެރިކާ ޑޮލަރާއި މި ފައިސާ އިންވެސްޓްކޮށްގެން ލިބިފައިވާ މަންފާ އެވެ.
ހައިކޯޓުގައި ޔާމީނުގެ ފަރާތުން ހުށައަޅާފައިވާ، ވ. އާރަށު ހިޔާނާތުގެ މައްސަލައިގެ އިސްތިއުނާފުގައިވެސް އެކަމަށް އަލިއަޅުވާލައްވާނެކަމަށް ޕީޖީ އޮފީހުގެ އޮފިޝަލަކު މީގެ ކުރިން ވިދާޅުވެފައިވެއެވެ.
