ދިވެހި ޕްރިމިއާ ލީގުގައި ޔުނައިޓެޑު ވިކްޓަރީ (ޔޫވީ)އާ ދެކޮޅަށް ކުޅުނު މެޗުން މޮޅުވެ ސުޕަ ޔުނައިޓެޑު ސްޕޯޓްސް (ސަސް) އިން އެ ޓީމުގެ ދެ ވަނަ މެޗު ވެސް ކާމިޔާބުކޮށްފި އެވެ.
ހޮނިހިރު ދުވަހުގެ ހަވީރު ގަލޮޅު ރަަސްމީ ދަނޑުގައި މި ދެ ޓީމު ބައްދަލުކުރިއިރު، ސަސް އިން ވަނީ ކުޅުނު ފުރަތަަމަ މެޗު ކާމިޔާބުކޮށްފަ އެވެ. ނަމަވެސް ޔޫވީ އިން ކުޅުނު ފުރަތަމަ މެޗުގައި އެ ޓީމު ވަނީ ބަލިވެފަ އެވެ. ސަސް އިން ޔޫވީގެ މައްޗަށް ކުރި ހޯދީ 3-0 އިންނެވެ.
މެޗު ފަށައިގެން ކުރީ ކޮޅު ސަސް އަށް ލީޑު ނަގައިދިނީ އަލީ ނަސޫހު ރަޝީދު އެވެ. އެއީ 11 ވަނަ މިނެޓުގައި އެ ޓީމުގެ އައިހަމް އަޙުމަދު ދިން ބޯޅައެއް ޔޫވީގެ އޭރިޔާ ތެރެއިން ތިރިިތިރިން ގޯލަށް ފޮނުވާލައިގެންނެވެ. އެ ބޯޅަ ހުއްޓުވުމަށް ޔޫވީގެ ގޯލް ކީޕަރު އަލީ ނާޖިހު އަށް މާ ބޮޑު މަސައްކަތެއް ނުކުރެވުނެވެ. މެޗުގެ ފުރަތަމަ ހާފު ނިމެން ދެ މިނެޓަށްވެފައި ވަނިކޮށް ސަސްގެ ލީޑު ފުޅާކޮށްދިނީ އައިހަމް އެވެ. އެއީ ޔޫވީގެ އޭރިޔާ ކުރިމަތިން ލިބުނު ހިލޭ ޖެހުމެއްގައި ފޮނުވާލި ބޯޅަ ގޯލަށް ވައްދާލައިގެންނެވެ.
މެެޗުގައި ޔޫވީ އިން ވެސް ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. ޔޫވީގެ އަރީން ޢަބްދުﷲ އިބްރާހީމް އަށް ލިބުނު ފުރުސަތުގައި އޭނާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ. ސަސްގެ ތިން ވަނަ ލަނޑު މެޗުގެ 64 ވަނަ މިނެޓުގައި އައިހަމް ތަނަވަސްކޮށްދިން ފުރުސަތެއްގައި ޖެހީ ނަސޫހު އެވެ. ހަތަރު ވަނަ ލަނޑު ޖެހުމަށް ސަސް އަށް ލިބުނު ފުރުސަތުގައި ނަސޫހު ފޮނުވާލި ބޯޅަ ޔޫވީގެ ކީޕަރު ނާޖިހު ވަނީ މަތަކޮށްފަ އެވެ. މެޗުގެ 84 ވަނަ މިނެޓުގައި ޔޫވީގެ އަޙުމަދު ބައްސާމް މުޙައްމަދު ނައީމް ހުރަސްކޮށްދިން ބޯޅައެއް މުޙައްމަދު ޙުސެއިން ފޮނުވާލި ނަމަވެސް، ބޯޅަ އަމާޒުވީ ގޯލުގެ އަރިމަތީ ދަނޑިއާ އެވެ. މެޗުގެ ފަހު ވަގުތު ސަސް އަށް ވެސް ވަނީ އިތުރު ލަނޑު ޖެހުމަށް ފުރުސަތު ލިބިފަ އެވެ.
މޮޅާއެކު ސަސް އިން ވަނީ ލީގު ތާވަލްގެ އެއް ވަނަ މަގާމަށް ޖެހިލައިފަ އެވެ. އެއީ ކުޅުނު ދެ މެޗުން ވެސް މޮޅުވެ، ހަ ޕޮއިންޓާއެކު އެވެ. ދެ ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި، ތިން ވަނައިގައި އޮތް ކުލަބު އީގަލްސް އަދި ހަތަރު ވަނައިގައި އޮތް ޓީސީ ސްޕޯޓްސް ކުލަބަށް ލިބެނީ ތިން ޕޮއިންޓެވެ. މިއިން ކޮންމެ ޓީމެއް ވެސް ކުޅެފައި ވަނީ އެއް މެޗެވެ. ލީގުގައި ހޮނިހިރު ދުވަހުގެ ރޭ ކުލަބު ގްރީން ސްޓްރީޓްސްއާ ދެކޮޅަށް ކުޅޭ މެޗުން މޮޅުވެ މާޒިޔާ އަށް ޕޮއިންޓުގެ ގޮތުން ސަސްއާ އެއްވަރު ކުރުމުގެ ފުރުސަތު އޮންނާނެ އެވެ.
