ދެކުނު އޭޝިއާގެ ޖޫނިއާ މުބާރާތައް ދާ ގައުމީ ޓީޓީ ޓީމު އިއުލާނުކޮށްފި

މެއި މަހު 14 ގައި އިންޑިއާގެ އޮންނަ ސައުތު އޭޝިއަން ޖޫނިއާ އެންޑް ކެޑޭޓް ޗެމްޕިއަންޝިޕް 2023 ގައި ވާދަކުރާ ގައުމީ ޓީމު އިއުލާނުކޮށްފިއެވެ.

ހަތަރު ކެޓެގަރީގައި ރާއްޖެއިން ބައިވެރިވެފައިވާއިރު، މި މުބާރާތުގައި ރާއްޖޭގެ އިތުރުން ބައިވެރިވެފައިވަނީ ސްރީ ލަންކާ، ބޫޓާން، ބަންގްލަދޭޝް، ނޭޕާލް އަދި މުބާރާތް ކުރިޔަށްދާ ގައުމު، އިންޑިއާއެވެ.

މި މުބާރާތުގައި ޖޫނިއާ ކެޓެގަރީގެ ފިރިހެން ޓީމުގައި ހިމެނިފައިވަނީ އަޚްޔާރު އަހުމަދު ހާލިދު، މުހައްމަދު ތާބިން ސުޖާއު، ޒީކް ހަސަން ލަތީފްގެ އިތުރުން އުމޭރު މުހައްމަދު މުއިއްޒުއެވެ. ޖޫނިއާ އަންހެން ކެޓެގަރީގައި ރާއްޖެ ތަމްސީލުކުރާ ޓީމުގައި ހިމެނިފައިވަނީ ރާއްޖޭގެ އެއްވަނަ ފާތިމަތު ދީމާ އަލީ، މިޝްކާ މުހައްމަދު އިބްރާހިމް، މަލާކް ބިންތި މުއިއްޒު އަދި އައިޝަތު ޒާރާ ޝާހިލްއެވެ.

ކެޑޭޓް ކެޓެގަރީގެ ފިރިހެން ޓީމުގައި ހިމެނިފައިވަނީ އުމޭރު މުހައްމަދު މުއިއްޒު، އޯން އިބްރާހިމް ލަތީފް އަދި މުހައްމަދު ޒާއިމް އަހުމަދެވެ. އަންހެން ކެޑޭޓް ޓީމުގައި ހިމެނިފައިވަނީ މިޝްކާ މުހައްމަދު އިބްރާހިމް، އައިޝަތު ޒާރާ ޝާހިލް އަދި އައިޝަތު އަލްސާ ނާފިޒްއެވެ.

އިންޑިއާއަށް ދަތުރުކުރާ ޓީމުގެ މެނޭޖަރަކަށް ހުންނާނީ މުހައްމަދު މުންތިފް އަހުމަދެވެ. އަދި ކޯޗަކަށް ހުންނާނީ ސްރީ ލަންކާގެ އަޝާން އަޝްވިދާއެވެ. ޓޭބަލް ޓެނިސް އެސޯސިއޭޝަންގެ ރައީސް، އަލީ ރަޝީދުވެސް ޓީމާއެކު ދަތުރުކުރާ ގޮތަށް ވަނީ ހަމަޖެހިފައެވެ.

2022 ވަނަ އަހަރު މި މުބާރާތް ބޭއްވިފައިވަނީ ދިވެހިރާއްޖޭގައެވެ. އަދި ރާއްޖޭގެ ޓީމުން ވަނީ ފާހަގަކޮށްލެވޭ ރަނގަޅު ނަތީޖާތަކެއް ހޯދާފައެވެ. ކުރީ މުބާރާތުގެ ތަޖުރިބާއާއި، އޭގެ ފަހުން ހިންގުނު ތަމްރީނުތަކާއެކު، މި އަހަރުގެ މުބާރާތުގައި ރާއްޖެއިން ރަނގަޅު ކާމިޔާބީތަކެއް ހޯދާނެ ކަމަށް ބެލެވެއެވެ.