އިޖުތިމާއީ އަދި އިގްތިސާދީ ކުރިއެރުމަށް އޭވިއޭޝަން ދާއިރާ ކުރިއެރުން ވަރަށް މުހިންމު - ޒުހައިރު
މިއީ ރީޖަނަލް އޮފީސް ކަމުގައިވާ ކޯރޕަރޭޓް އޭވިއޭޝަން ސެކިއުރިޓީ ޕްރޮގްރާމް – އޭޝިޔާ ޕެސިފިކް ގުޅިގެން ކުރިއަށްގެންދިޔަ ޕްރޮގްރާމެއް
ކޮމްބައިންޑް ކޮލިޓީ ކޮންޓްރޯލް ވޯރކްޝޮޕް
އިޖުތިމާއީ އަދި އިގްތިސާދީ ކުރިއެރުމަށް އޭވިއޭޝަން ދާއިރާ ކުރިއެރުން ވަރަށް މުހިންމުކަމަށް، ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު ޒުހައިރު ވިދާޅުވެއްޖެއެވެ.
އޭނާ މިފަދައިން ވިދާޅުވީ "ކޮމްބައިންޑް ކޮލިޓީ ކޮންޓްރޯލް ވޯރކްޝޮޕް" ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ. އޭނާ ވިދާޅުވީ އޭވިއޭޝަން ދާއިރާގެ މަސައްކަތްތެރިންނާއެކު ވަގުތު ހޭދަކުރެއްވުމަކީ އަބަދުވެސް ލިބިވަޑައިގަންނަވާ އުފާފުޅެއްކަމަށެވެ. އަދި މި ވޯރކްޝޮޕަކީ މި ދާއިރާގެ ތަޖުރިބާއާއި މައުލޫމާތު ހިއްސާކުރަން ލިބޭ ރަނގަޅު ފުރުސަތެއްކަމަށް އޭނާ ވިދާޅުވިއެވެ.
މިފަދަ ކަންކަމުގެ އަލީގައި އޭވިއޭޝަން ދާއިރާ ކުރިއަރުވައި، ފުރިހަމަކުރަން ޖެހޭކަމަށާއި، މި ދާއިރާ ކުރިއަރައި ބާރުވެރިކުރެވުމަކީ ގައުމުގެ ކުރިއެރުމަށް މުހިންމު ކަމެއް ކަމަށް އޭނާ ވިދާޅުވިއެވެ. ޒުހައިރު ވިދާޅުވީ ރާއްޖޭގައި އެކި ސިނާއަތްތައް ކުރިއަރަމުން ދާވަރަކަށް އޭވިއޭޝަން ދާއިރާ ހަރުދަނާކުރުން ވަރަށް މުހިންމު ކަމަށެވެ.
އެގޮތުން އާ އިންވެސްޓްމެންޓްތައް ރާއްޖެ އައުމާއި، ރާއްޖެއަށް އާ އެއާލައިންތައް އައުމާ ގުޅިގެން، އޭވިއޭޝަން ނުވަތަ ވައިގެ ދަތުރުފަތުރުގެ ދާއިރާގެ ޚިދުމަތްތަކަކީ ފެންވަރު ރަނގަޅު ޚިދުމަތްތަކަކަށް ހެދުމަށް ސަމާލުކަން ދޭންޖެހޭ ކަމަށް ޒުހައިރު ވިދާޅުވިއެވެ. މިހާރުވެސް ރާއްޖޭގައި 40ށްވުރެ ގިނަ އެއާލައިން ހަރަކާތްތެރިވަމުންދާކަމަށާއި، ދުވަހަކަށްވުރެ ދުވަހެއްް ޚިދުމަތުގެ ފެންވަރު ރަނގަޅުކުރުމަށް މަސައްކަތް ކުރާކަމަށް އޭނާ ވަނީ ވިދާޅުވެފައެވެ.
"ކޮމްބައިންޑް ކޮލިޓީ ކޮންޓްރޯލް ވޯރކްޝޮޕް" އަކީ މިނިސްޓްރީ އޮފް ޑިފެންސްގެ ޑައިރެކްޓްރޭޓް އޮފް އޭވިއޭޝަން ސެކިއުރިޓީ އެޑްމިނިސްޓްރޭޝަނާއި އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ)ގެ ރީޖަނަލް އޮފީސް ކަމުގައިވާ ކޯރޕަރޭޓް އޭވިއޭޝަން ސެކިއުރިޓީ ޕްރޮގްރާމް – އޭޝިޔާ ޕެސިފިކް ގުޅިގެން ކުރިއަށްގެންދިޔަ ޕްރޮގްރާމެކެވެ.
