ޓޫ-ފެކްޓަރ އޮތެންޓިކޭޝަނާއެކު ދިމާވި ޓެކްނިކަލް މައްސަލަތައް ހައްލުކުރަން ދަނީ މަސައްކަތް ކުރަމުން - ބީއެމްއެލް
އަލަށް ގެނައި އަޕްޑޭޓާއެކު، ލޮގިންވާ ފަރާތަކީ ރަޖިސްޓްރީވެފައިވާ ކަސްޓަމަރުކަން ޔަގީންކުރުމަށްޓަކައި އިތުރު ސެކިއުރިޓީ ލޭޔަރެއް އިތުރުކުރެވިގެންދާނެ
އެކްސްޕީރިއަންސް މޯލްޑިވްސް ލޯންޗުކުރުމުގެ ރަސްމިއްޔާތުގެ ތެރެއިން
ކަސްޓަމަރުންގެ ރައްކާތެރިކަމަށް އަޅާ އިތުރު ފިޔަވަޅެއްގެގޮތުން, މޯބައިލް ބޭންކިންގ ލޮގިންއަށް ޓޫ-ފެކްޓަރ އޮތެންޓިކޭޝަން ތައާރަފްކުރުމާއެކު ކަސްޓަމަރުންނަށް ބައެއް ދަތިތައް ދިމާވެފައިވާތީ, އެކަން ހައްލުކުރުމަށް މަސައްކަތްކުރަމުން ދާކަަމަށް ބޭންކް އޮފް މޯލްޑިވްސް (ބީއެމްއެލް)އިން ބުނެފިއެވެ.
ބީއެމްއެލްއިން ބުނީ މި ހަފުތާތެރޭގައި މި ޚިދުމަތް އިންޓަރނެޓް ބޭންކިންގއަށްވެސް ލިބިގެންދާނެ ކަމަށެވެ. އަލަށް ގެނައި އަޕްޑޭޓާއެކު، ލޮގިންވާ ފަރާތަކީ ރަޖިސްޓްރީވެފައިވާ ކަސްޓަމަރުކަން ޔަގީންކުރުމަށްޓަކައި އިތުރު ސެކިއުރިޓީ ލޭޔަރެއް އިތުރުކުރެވިގެން ދާނެކަމަށް ބީއެމްއެލްއިން ވަނީ ބުނެފައެވެ.
އެޕް އަޕްޓޭޑްކުރުމާއެކު، ކަސްޓަމަރުންނަށް މޯބައިލް ބޭންކިންގ އެޕަށް ލޮގިންވުމަށްފަހު، ލޮގިންވުމުގެ ދެވަނަ ސްޓެޕެއްގެ ގޮތުގައި އޯޓީޕީ ޖަހަންޖެހޭނެއެވެ. ރަޖިސްޓްރީކޮށްފައިވާ މޯބައިލް ނަންބަރު ނުވަތަ އޮތެންޓިކޭޓަރ އެޕް މެދުވެރިކޮށްވެސް އޯޓީޕީ ޖެނެރޭޓް ކުރެވޭނެއެވެ.
އެހެންނަމަވެސް މި މަރުހަލާގައި ބައެއް ޓެކްނިކަލް މައްސަލަތައް ދިމާވާކަން ފާހަގަކުރެވިފައިވާ ކަމަށް ބީއެމްއެލްއިން ބުނެއެވެ. އެ ކަމުގެ ސަބަބުން ދިމާވެދާނެ ދަތިކަމަކަށްޓަކައި ބީއެމްއެލްއިން ވަނީ ކަސްޓަމަރުންގެ ކިބައިން މައާފަށް އެދިފައެވެ. އަދި ބީއެމްއެލް ލޮގިންގެ ޔޫޒަރ ނަމާއި ޕާސްވޯޑް ހަނދާންނެތުމުން، ޕާސްވޯޑް ރީސެޓްކުރަން އެދޭ ފަރާތްތަކަށް އެ ޚިދުމަތް ފޯރުކޮށްނުދެވޭކަން ބޭންކުން ވަނީ ފާހަގަކޮށްފައެވެ. އެ މައްސަލަ ހައްލުކުރުމަށް މަސައްކަތް ކުރާކަަމަށް ބީއެމްއެލްއިން ބުނެއެވެ.
ސްކޭމްތައް ހިންގާ ފަރާތްތަކުން އެމީހުންގެ އުކުޅުތައް އެކި ދުވަސްވަރު އެކި ގޮތްގޮތަށް ބަދަލަކުރަމުން އަންނައިރު، ކަސްޓަމަރުންގެ ރައްކާތެރިކަން ކަށަވަރުކުރުމަށް ބޭންކުން މެދުނުކެނޑި މަސައްކަތްކުރަމުން ދާކަމަށް ބީއެމްއެލްއިން ބުނެއެވެ. މިގޮތުން މާރިޗު 2023ގައި، ބޭންކުންވަނީ ހުރިހާ ސްކޭން-ޓު-ޕޭ މުއާމަލާތްތަކަށް ވަން ޓައިމް ޕާސްވޯޑް (އޯޓީޕީ) ބޭނުންކުރަންޖެހޭ ގޮތަށް ހަމަޖައްސައި، އިންޓަރނެޓް އަދި މޯބައިލް ބޭންކިންގއަށް ލޮގިންވާ ކޮންމެ ފަހަރަކު އެލަރޓް ދާގޮތަށް ހަމަޖައްސާފައެވެ.
ބޭންކުން ތަކުރާރުކޮށް އެދެނީ ކަސްޓަމަރުންގެ ޒާތީ މައުލޫމާތު އެހެން ފަރާތަކާ ހިއްސާނުކުރުމަށެވެ. އަދި ދޭތެރެ ދޭތެރެއިން ޕާސްވޯޑް ބަދަލުކުރުމާއި ވަރުގަދަ ޕާސްވޯޑެއް ބޭނުންކުރުމަށެވެ.
