ކެރަލާ ސްޓޭޓްގައި ބޯޓެއް ބަންޑުންޖަހާލުމުގެ ސަބަބުން 22 މީހުން މަރުވެއްޖެ

އިންޑިޔާގެ ކެރަލާ ސްޓޭޓްގައި ޓުއަރިސްޓުން އަރުވައި ބަރާކޮށްގެން ދަތުރުކުރި ބޯޓެއް ބަންޑުންޖަހާލުމުގެ ސަބަބުން، މަދުވެގެން 22 މީހުން މަރުވެއްޖެއެވެ. އާދީއްތަ ދުވަހުގެރޭ ހިނގި މި ހާދިސާގައި ބޯޓު ބަންޑުން ޖަހާލީ އެކަށީގެންވާވަރަށްވުރެ ގިނައިން މީހުން އަރުވާފައި ވުމުގެ ސަބަބުންކަމަށް ފުލުހުން ބުނާއިރު، މިހާދިސާގައި މަރުވި މީހުންގެ އަދަދު އަދިވެސް އިތުރުވުމަކީ އެކަށީގެންވާ ކަމެއް ކަމަށް، އެހީގެ މަސައްކަތުގައި ހަރަކާތްތެރިވަމުންދާ ފަރާތްތަކުން ބުނެފައިވެއެވެ.

މިހާދިސާއާ ގުޅިގެން ފުލުހުން މިހާރު ވަނީ ބޯޓުގެ ވެރިފަރާތާ ދެކޮޅަށް، ފަރުވާކުޑަކުރުމުގެ ސަބަބުން ބައެއްގެ ފުރާނަގެއްލިފައިވާތީ އެކަމުގެ ދައުވާ އުފުލާފައެވެ. ނަމަވެސް ބޯޓުގެ ވެރިފަރާތް ވަނީ ފިލާފައިކަމަށް ޚަބަރު ލިބެއެވެ.

ބޯޓެއް ބަންޑުންޖަހާލައި ބަޔަކު މަރުވުމާ ގުޅިގެން ބޮޑުވަޒީރު ނަރެންދުރަ މޯދީ ވަނީ ޓްވިޓަރ މެދުވެރިކުރައްވައި ހިތާމަ ފާޅުކުރައްވާފައެވެ.

ބަންޑުން ޖަހާލުމާއެކު ބޯޓު އޮތީ ސީދާ ދަށް ފަރާތް މައްޗަށް ކަމަށާއި، އެހެންކަމުން އެތައްބަޔަކު ބޯޓުގެ ދަށުވާން ދިމާވިކަމަށް ޚަބަރުތައް ބުނެއެވެ. އަދި އަނދިރި ވަގުތެއްކަމުން މީހުން ސަލާމަތް ކުރުމުގެ މަސައްކަތަށް ހުރަސް އެޅުނުކަމަށް އިންޑިޔާގެ މީޑިއާ ރިޕޯޓްތަކުގައި ބުނެފައިވެއެވެ. މަރުވި މީހުންގެ ތެރޭގައި ގިނައީ ސްކޫލް ޗުއްޓީގައި ދަތުރުކޮށްލުމަށް ނިކުތް އަންހެނުންނާއި ކުޑަކުދިން ކަމަށް ވެއެވެ.

ހާދިސާއަށްފަހު 4 ވަރަކަށް މީހުން ކްރިޓިކަލް ހާލަތުގައި ހޮސްޕިޓަލަށްވެސް ގެންގޮސްފައިވެއެވެ. ބޯޓުން ދަތުރުކުރި މީހުންގެ އަސްލު އަދަދު ސާފު ނުވާތީ، މިހާތަނަށް ނުފެނިވަނީ ކިތައް މީހުން ކަމެއް އަދި ނޭނގޭކަމަށާއި ބޯޓު ދަތުރު މކުރީ ހޯދަންޖެހޭ ހުއްދަ މތައް ހޯދައިގެންތޯވެސް ބަލަމުންދާކަމަށް، ކަމާބެހޭ އިދާރާތަކުން ބުނެފައިވެއެވެ.

އިންޑިޔާގައި މިފަދަ ގިނަ ފެރީ ބޯޓުތައް ދަތުރުކުރަނީ އެކަށީގެންވާރަަށްވުރެ ގިނައިން މީހުން އަރުވައިގެން ކަމަށް ވުމުން، މިފަދަ އެކްސިޑެންޓުތައް ހިނގުމަކީ އާންމު ކަމެކެވެ.