ސްޕެއިންގެ ރެއާލް މެޑްރިޑަށް ކޮޕަ ޑެލް ރޭ މުބާރާތުގެ ތަށި ހައްގު ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
އަންޗެލޮޓީ މިހެން ބުނީ މި ސީޒަނުގެ ކޮޕަ ޑެލް ރޭ މުބާރާތުގައި ފައިނަލްގައި އޮސަސޫނާ ބަލިކޮށް ރެއާލުން ތަށި އުފުލާލި މެޗަށް ފަހު ވާހަކަ ދައްކަމުންނެވެ. އޭނާ ބުނީ އެ ފައިނަލް މެޗަކީ ރެއާލުން އެތައް ތަކުލީފުތަކެއް އުފުލަން ޖެހުނު ފައިނަލެއް ކަމަށެވެ. ނަމަވެސް އެންމެ ފަހުން ރެއާލަށް މޮޅުވުން ހައްގު ކަމަށާއި، އެއީ ހަމައެކަނި ފައިނަލް މެޗުގައި ދެއްކި ކުޅުމަށް ބަލާފައި ނޫން ކަމަށެވެ. އަންޗެލޮޓީ ފާހަގަ ކުރި ގޮތުގައި ފައިނަލަކީ އަބަދު ވެސް މޮޅުވާން އުނދަގޫ މެޗެކެވެ. ނަމަވެސް މީގެ ކުރިން އެ މުބާރާތުގައި ރެއާލުން ވާނީ ވަރުގަދަ ޓީމުތަކެއް ބަލިކޮށްފައި ކަމަށާއި، އެހެންކަމުން އެ ޓީމަށް ތަށި ހައްގު ކަމަށް އޭނާ ބުންޏެވެ.
އަންޗެލޮޓީ ބުނީ ލިބުނު އުފަލާއެކު، ރެއާލަށް އަތް އުރާލައިގެން ތިބެވެން ނެތް ކަމަށެވެ. އޭނާ އެ އިޝާރާތް ކުރީ އަންނަ އަންގާރަ ދުވަހުގެ ރޭ މެންޗެސްޓަރ ސިޓީއާ ދެކޮޅަށް ކުޅޭ ޔުއެފާ ޗެމްޕިއަންސް ލީގުގެ ސެމީ ފައިނަލްގެ ފުރަތަމަ ލެގަށެވެ. އޭނާ ބުނީ، ދެން ޖެހޭނީ އަންގާރަ ދުވަހު އަމިއްލަ ދަނޑުގައި ކުޅޭ މެޗަށް ވިސްނަން ކަމަށާއި އެ މެޗުގައި ރެއާލަށް އޮތީ ކުޑަ އެޑްވާންޓޭޖެކެވެ. އަނެއްކޮޅު ރެއާލް ކުޅެން ޖެހޭނީ 11 ކުޅުންތެރިން 12 މީހުންނާ ދެކޮޅަށް ކަމަށް ވެސް އޭނާ ބުންޏެވެ.
ފުރަތަމަ ލެގުގައި އަހަރަމެންނަށް އޮތީ ވަރަށް ކުޑަ އެޑްވާންޓޭޖެއް. އަހަރަމެން ކުޅެން ޖެހޭނީ އެގާރާ ކުޅުންތެެރިން 12 މީހުންނާ ދެކޮޅަށް.ކާލޯ އަންޗެލޮޓީ / ރެއާލް މެޑްރިޑުގެ ކޯޗު
އެ ޕްރެސްގައި ވެސް އަންޗެލޮޓީ ވަނީ އޭނާގެ މުސްތަޤުބަލާ ގުޅޭ ގޮތުން ކުރި ސުވާލަށް ޖަވާބު ދީފަ އެވެ. އޭނާ ބުނީ އަބަދުވެސް ބުނަމުން އަންނަ ފަދައިން، ރެއާލާއެކު އެއްބަސްވުމެއް އޮތް ކަމަށެވެ. ހަމައެއާއެކު އެ އެއްބަސްވުމުގައި ބާކީ އެއް އަހަރު އޮތްކަން އަންޗެލޮޓީ ވަނީ ތަކުރާރުކޮށް ފާހަގަކޮށްފަ އެވެ. އަންޗެލޮޓީ ބުނީ އޭނާ އަކީ އެއްބަސްވުންތަކަށް ފުރިހަމަ އަށް އިހުތިރާމް ކުރާނެ މީހެެއް ކަމަށާއި، ރެއާލުން ދޫކޮށްލަންދެން އޭނާ ކުލަބުގައި ހުންނާނެ ކަމަށެވެ.
ޗެމްޕިއަންސް ލީގުގެ ސެމީ ފައިނަލްގައި ރެއާލުން އަމިއްލަ ދަނޑުގައި ސިޓީއާ ދެކޮޅަށް ނުކުންނާނީ އަންގާރަ ދުވަހުގެ ރޭ ދަންވަރު 12 ޖަހާއިރު އެވެ.
