މިހާރު ކުރިއަށްދާ އިންޓަރ އޮފީސް ވޮލީބޯޅަ މުބާރާތުގައި މޯލްޑިވްސް ކެރެކްޝަނަލް ސާވިސް ބަލިކޮށް ފިއުލް ސަޕްލައި މޯލްޑިވްސް (އެފްއެސްއެމް) އިން އުންމީދު އައުކޮށްފި އެވެ.

ހޮނިހިރު ދުވަހުގެ ރޭ ހުޅުމާލެ ވޮލީ ކޯޓުގައި މި މެޗަށް ކުރިމަތިލީއިރު ދެ ޓީމު ވެސް ވަނީ ކުޅުނު ފުރަތަމަ މެޗުން ބަލިވެފަ އެވެ. އެހެންކަމުން ސެމީ ފައިނަލްގެ އުންމީދު ހޯދުމަށް ދެ ޓީމަށް ވެސް އެ މެޗު ވަރަަށް މުހިންމުވި އެވެ. އެފްއެސްއެމް އިން ކަރެކްޝަންސްގެ މައްޗަށް ކުރި ހޯދީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ފުރަތަމަ ސެޓުގެ ކުޅުން ފެނުނީ ވާދަވެރިކޮށެވެ. ފަހު ވަގުތު ކުރި ހޯދައިގެން އެފްއެސްއެމް އިން ފުރަތަމަ ސެޓު ކާމިޔާބު ކުރީ 25-23 އިންނެވެ. ނަމަވެސް ޖެހިގެން ކުޅުނު ދެ ސެޓުގައި އެފްއެސްއެމް އިން ވަނީ ރަނގަޅު ލީޑުގައި އޮވެ ސެޓު ނިންމާލައިފަ އެވެ. ދެ ވަނަ ސެޓު އެފްއެސްއެމް އިން 25-16 އިން ކާމިޔާބު ކުރިއިރު، ތިން ވަނަ ސެޓު ކާމިޔާބު ކުރީ 25-22 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެފްއެސްއެމްގެ ބިދޭސީ ކުޅުންތެރިޔާ މުބައްޝަރު ރާޒާ އެވެ.

މޮޅާއެކު އެފްއެސްއެމް ވަނީ މި ގްރޫޕްގެ ދެ ވަނަ އަށް ޖެހިލައިފަ އެވެ. ކުޅުނު ދެ މެޗުން އެ ޓީމަށް ލިބެނީ ތިން ޕޮއިންޓެވެ. ތިން ވަނައިގައި އޮތް ވެމްކޯ އަށް ވެސް ލިބެނީ ތިން ޕޮއިންޓެވެ. ނަމަވެސް ސެޓުގެ ގޮތުން ކުރީގައި އޮތީ އެފްއެސްއެމް އެވެ. މި ގްރޫޕްގެ އެއް ވަނައިގައި އޮތީ ދެ މެޗުން ވެސް މޮޅުވި މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އެވެ.