ސިއްޙީ ދާއިރާގެ މުސާރައަށް އައި ބަދަލާމެދު ގިނަ ނަރުހުން ހިތްހަމަޖެހޭ: ސުމައްޔަތު
5 މެއި 2023 | ހުކުރު 02:34މުސާރައަށް ގެންނަ ބަދަލާއެކު ސީނިއާ ރެޖިސްޓާޑް ނަރުހުންގެ މުސާރައަށް އިތުރު ގަޑީގެ އެލަވަންސާ ނުލައި 29،271ރ. ލިބޭނެ
ނަރުހުން
ސިއްޙީ ދާއިރާގެ މުސާރަ އަށް އައި ބަދަލާ މެދު ގިނަ ނަރުހުން ހިތްހަމަޖެހޭ ކަމަށް ކްލިނިކަލް ނަރސް އަދި އެމްބީއެސް ނަރސް އިންޗާޖް އާއިޝަތު ސުމައްޔަތު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން އޭނާ ވިދާޅުވީ ނަރުހުންގެ ކުރީގެ މުސާރައާ އަޅާ ކިޔާނަމަ އައު އޮނިގަނޑުގެ ދަށުން އައި ބަދަލުތައް ވަރަށް ރަނގަޅު ކަމަށެވެ. އެގޮތުން ރެޖިސްޓަރޑް ނަރުހުންގެ މުސާރަ 21 އިންސައްތަ މަތިވެފައިވާ ކަމަށް އޭނާ ވިދާޅުވިއެވެ. މި ބަދަލުތަކަކީ ނަރުހުން ވަރަށް ބޮޑަށް އުންމީދުކުރަމުން އައި ބަދަލުތަކެއް ކަމަށާއި މި ބަދަލުތަކުގެ ސަބަބުން ނަރުހުންނަށް ކުރިއަށްދާން ވަަރަށް ބޮޑަށް ފުރުސަތު ލިބޭ ކަމަށް ވެސް އޭނާ ވިދާޅުވިއެވެ.
ސުމައްޔަތު ވިދާޅުވީ މި ބަދަލުގެ ސަބަބުން ނަރުހުންނަށް މަޤާމުގެ ކުރިއެރުން ހޯދުމާއި ތައުލީމު އުނގެނުމަށް ބާރު އެޅިގެންދާ ކަމަށެވެ. އަދި ނަރުހުން މަދު ދާއިރާތަކުން ނަރުހުން ތަމްރީނު ވުމަށް ވެސް މި ބަދަލާއެކު ބާރު ލިބޭ ކަމަށެވެ. މީގެ އިތުރުން އައު އޮނިގަނޑުގެ ދަށުން ނަރުހުންނަށް ލިބޭ އެލަވަންސްތަަކަކީ ވަރަށް ބޮޑު ފައިދާއެއް ކަމަށް ސުމައްޔަތު ފާހަގަކުރެއްވިއެވެ.
މުސާރައަށް ގެންނަ ބަދަލާއެކު ސީނިއާ ރެޖިސްޓާޑް ނަރުހުންގެ މުސާރައަށް އިތުރު ގަޑީގެ އެލަވަންސާ ނުލައި 29،271ރ. ލިބޭނެއެވެ. ހަމައެހެންމެ ސްޕެޝަލިސްޓް މުސާރައަށް އިތުރުގަޑީގެ އެލަވަންސް ނުލައި 41،976ރ. ލިބޭނެ އެވެ. ކުރިން އިތުރު ގަޑީގެ އެލަވަންސާއެކު މުސާރައަށް 28،727ރ. ލިބެމުން ދިޔަ މެޑިކަލް އޮފިސަރުންނަށް އެލަވަންސް ނުލައި 41،541ރ. ލިބޭނެއެވެ. ސަބް ސްޕެޝަލިސްޓް ކޮންސަލްޓަންޓުންގެ އެންމެ މަތީ ގިންތީގެ މުސާރަ އިތުރު ގަޑީގެ އެލަވަންސް ނުލައި 98،137ރ. ވަނީ ކަނޑައަޅައިފައެވެ.
