އާއްމުންނަށް ހުޅުވާލައިގެން ގަސް ވިއްކުމުގެ ފެއަރ އެއް މާލެ ސިޓީ ކައުންސިލުން ބާއްވަނީ

މާލެ ސިޓީ ކައުންސިލްގެ ފަރާތުން "މާލެ ފެހި ފެއަރ 2023" ގެނަމުގައި ގަސް ވިއްކުމުގެ ފެއަރ އެއް ބޭއްވުމަށް ހަމަޖައްސައިފިއެވެ.

މި ފެއަރ އޮންނާނީ މި މެއި މަހުގެ 11ން 13ށް އާޓިފިޝަލް ބީޗްގައެވެ.

މި ފެއަރގައި ގަސް ވިއްކާ ފަރާތްތައް ބައިވެރިކުރުމުގެ ގޮތުން 15 މޭޒު ޢާއްމުކޮށް ވިއްކުމަށް ވަނީ ހަމަޖެހިފައެވެ. މޭޒެއްގެ އަގަކީ 3 ދުވަހަށް 1500 ރުފިޔާއެވެ. މި މޭޒުތައް ތައްޔާރުކުރުމާއި، އެތަނުން ބޭނުންވާ ކަރަންޓް ފޯރުކޮށްދޭނީ މާލެސިޓީ ކައުންސިލްގެ ފަރާތުންނެވެ.

"މާލެ ފެހި ފެއަރ 2023" އާއި ގުޅޭގޮތުން މާލެސިޓީ ކައުންސިލްގެ ޕްރޮޖެކްޓް މެނޭޖަރ މުޙައްމަދު މަބްރޫކް ވިދާޅުވީ މިފަދަ ފެއަރއެއް ބޭއްވުމުގެ މަޤްޞަދަކީ ގަސް ހައްދާ ގެންގުޅޭ އާއްމު ފަރާތްތަކަށް ގަސް ވިއްކުމުގެ ފުރުޞަތު ދިނުން ކަމަށެވެ. އެގޮތުން ގޭގޭގައި ގަސް ހައްދާ ފަރާތްތަކަށްވެސް މި ފެއަރގައި ބައިވެރިވެ ގަސް ވިއްކުމުގެ ފުރުޞަތު ތަނަވަސްކޮށްދޭނެ ކަމަށް މަބްރޫކް ވިދާޅުވިއެވެ. އޭނާ އިތުރަށް ވިދާޅުވީ މިއީ ފެށުމެއް ކަމަށާއި، ކުރިއަށް އޮތްތަނުގައި މާލެސިޓީ ކައުންސިލުން މިފަދަ ފެއަރތައް ބޭއްވުމަށް ވިސްނާފައިވާކަމަށެވެ.

މި ފެއަރ އާއިގުޅޭގޮތުން ކައުންސިލުން މިއަދު ކުރި ޢިއުލާނެއްގައި ބުނެފައިވަނީ ފެއަރ އިން މޭޒު ބޭނުންފުޅުވާ ފަރާތްތަކުން ކައުންސިލުން ދީފައިވާލިންކްމެދުވެރިކޮށް މާވެހި ޕޯޓަލް އިން 10 ވަނަދުވަހުގެ ކުރިން ހުށަހެޅުމަށް އެދިފައެވެ. އަދިމޭޒު ދޫކުރާނީ އެދޭތަރުތީބުން 15 މޭޒު ހަމަވަންދެން ކަމަށްވެސް އިޢުލާނުގައި ބުނެފައިވެއެވެ.

މާލެ ސިޓީ ކައުންސިލުން ކާނިވާ ސަރަޙައްދުގައި ގާއިމްކުރި "މާލެ ފެހި" އައުޓްލެޓަކީ ކައުންސިލްގެ ހަތަރުވަނަ ދައުރުގައި އެކުލަވާލާފައިވާ ސްޓްރެޓެޖިކް އެކްޝަން ޕްލޭންގައި ހިމެނިފައިވާ "އެއްލައްކަ ގަސް" ޕްރޮގްރާމްގެ ދަށުން ގަސްތައް ބަލަހައްޓާ ހެއްދުމަށް ކާނިވާ ސަރަޙައްދުގައި ޤާއިމްކުރި އައުޓްލެޓެކެވެ.