ފުއްގިރި ހިޔާނަތް: އަންނަ އާދިއްތަ ދުވަހު ހެކިބަސް ނަގަން ފަށަނީ
އަހުމަދު ސިޔާމް މުހައްމަދު ހިމެނޭހެން 6 ހެއްކެއްގެ ހެކިބަސް ނެގުމަށް ވަނީ ތާވަލުކޮށްފައި
ކުރީގެ ރައީސް އަބްދުﷲ ޔާމީން
ރ ފުއްގިރި ޚިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް ކުރާ ދައުވާގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
ބުދަ ދުވަހުގެ އަޑުއެހުމަކީ ޔާމީނުގެ ފަރާތުން އިފްތިތާޙީ ބަޔާން އިއްވުމަށް ބޭއްވި އަޑުއެހުމެކެވެ. އެގޮތުން ދިފާއު ބިނާ ކުރާ ޤާނޫނީ އަސާސްތަކަށް ޔާމީނުގެ ވަކީލު ޑރ މުހައްމަދު ޖަމީލް އަހުމަދު ވަނީ އިފްތިތާޙީ ބަޔާނުގައި ފާހަގަ ކުރައްވާފައެވެ.
ޔާމީނުގެ މައްޗަށް ކުރާ އެއްވެސް ދައުވާއަކާ ގުޅިގެން މަދަނީ މިންގަނޑުން ޝަރީއަތް ކުރިއަށް ގެންދެވޭ މިންވަރަށްވެސް ހެކި ހުށައަޅާފައިނުވާކަމަށް ޔާމީނުގެ ވަކީލު ވިދާޅުވިއެވެ.
ރ ފުއްގިރި ކްލެސިކް ސިޓީއަށް ކުއްޔަށް ދޫކުރުމުގައި ރިޝްވަތު ޤަބޫލު ކޮށްފައިވާކަމަށް ބުނެ ޤާނޫނުލްއުޤޫބާތުގެ ދަށުން ޔާމީނަށް ދައުވާ އުފުލާފައިވާއިރު، މި މައްސަލައިގައި ދެން ހިމެނޭ ކްރިކް ރިޒާގެ މައްޗަށް ރިޝްވަތު ހިފުމުގައި މެދުވެރިއަކަށް ވުމުގެ ކުށުގެ ދައުވާ އުފުލާފައިވަނީ ކޮރަޕްޝަން ހުއްޓުވުމާއި މަނާ ކުރުމުގެ ޤާނޫނުގެ ދަށުން ކަމަށް ދިފާއުން ބުނެއެވެ.
މި ދެ ޤާނޫނުގައި ހިމެނޭ ކުށުގައި ތަފާތުތަކެއް ހުންނަކަމަށް ޔާމީނުގެ ވަކީލު ވިދާޅުވިއެވެ. އެއް ޤާނޫނުގެ ދަށުން ބަލާއިރު އެއީ ރިޝްވަތު ކަމަށާއި، އަނެއް ޤާނޫނުގެ ދަށުން ބަލާއިރު އެޔަށް ކިޔަނީ މަންފާކަމަށް ޖަމީލް ވިދާޅުވިއެވެ.
ފުއްގިރި ކުއްޔަށް ދޫކުރުމުގެ މުއާމަލާތާއި ގުޅިގެން އެއްވެސް ޙައިސިއްޔަތަކުން ޔާމީނު ބައިވެރިވެލައްވާފައި ނުވާނެ ކަމަށާއި، އެއްވެސް އިރުޝާދެއްވެސް ދެއްވާފައިނުވާކަމަށް ޑރ ޖަމީލް ވިދާޅުވިއެވެ.
އިކުއިޒިޝަން ކޯސްޓުގެ ގޮތުގައި 2.55 މިލިއަން ޑޮލަރަށް ދޭން އޮތް ރަށެއް 1.55 މިލިއަން ޑޮލަރުގެ އަގަކަށް ކުޑަކޮށްދިނީ ޔާމީނު ބައިވެރިވެގެންކަަމަށް ދައުލަތުން ބުނާއިރު، އޭގެ މާ ކުރިން އެ ރަށުގެ އިކުއިޒިޝަން ކޯސްޓަކީ 4 ލައްކަ ޑޮލަރުކަމަށް ކަނޑައަޅައި އެމްއެމްޕީއާރްސީން ކްލެސިކް ސިޓީއަށް ސިޓީއެއް ފޮނުވާފައިވާ ކަމަށް ޑރ ޖަމީލް ވިދާޅުވިއެވެ.
ފުލުހުން ތަހުގީގު ބައްޓަން ކޮށްފައިވަނީވެސް ހަމައެކަނި ޔާމީނު ކުށްެވެރި ކުރުމަށް އަމާޒު ހިފައިގެންކަމަށް ދިފާއުން ބުނެއެވެ. އެހެން އެކަން ވެފައިވަނީ ޔާމީނުގެ ވެރިކަމުގައި މިހާރުގެ އޭސީޕީ މުހައްމަދު ރިޔާޒު ފުލުހުންގެ ވަޒީފާއިން ވަކި ކުރުމާއި ގުޅިގެންކަމަށް ޖަމީލް ވިދާޅުވިއެވެ.
ޔާމީނުގެ އެކައުންޓަށް ޖަމާވި ފައިސާއަކީ އަހުމަދު ސިޔާމް މުހައްމަދާއެކު ކުރެވުނު ޑޮލަރު ވިއްކުމުގެ މުއާމަލާތެއްގެ ފައިސާކަމަށް ޔާމީނުގެ ވަކީލު ވިދާޅުވިއެވެ. އެ ޑޮލަރަށްވާ ފައިސާވެސް ސިޔާމް ބުނި މީހަކާ ޙަވާލުކޮށްފައިވާ ކަމަށާއި، އެކަން ސާބިތު ކުރުމަށް ޝަފަހީ އަދި ކިތާބީ ހެކި ހުށައަޅާފައިވާނެކަމަށް ދިފާއުން ބުނެއެވެ.
ސިޔާމް އަތުން ގަތް ޑޮލަރުގެ ސަބަބުން ޔާމީނަށް އިތުރުވި އެއްެޗެއް ނެތް ކަމަށާއި، ޔާމީނު ޙާސިލުކުރި ހުއްދަނޫން މަންފާއެއް އޭގައި ނެތްކަމަށްވެސް ދިފާއުން ބުނެއެވެ.
ޔާމީނަށް ކުރާ މަނީ ލޯންޑަރިންގ ގެ ދައުވާއާއި ގުޅިގެންވެސް އިފްތިތާޙީ ބަޔާން އިއްވާފައިވާއިރު، ދެން މި މައްސަލައިގެ އަޑުއެހުމެއް އޮންނާނީ އަންނަ އާދިއްތަ ދުވަހުއެވެ.
އެ ދުވަހު އޮންނާނީ ދައުލަތުގެ ހެކިންގެ ހެކިބަސް ނެގުމެވެ. އެގޮތުން އަހުމަދު ސިޔާމް މުހައްމަދު ހިމެނޭހެން 6 ހެއްކެއްގެ ހެކިބަސް ނެގުމަށް ވަނީ ތާވަލުކޮށްފައެވެ.
