އާސެނަލަށް އަދިވެސް މި ސީޒަނުގެ އިނގިރޭސި ޕްރިމިއާ ލީގު ކާމިޔާބު ކުރެވޭނެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އާޓެޓާ މިހެން ބުނީ ލީގުގައި ޗެލްސީއާ ދެކޮޅަށް އާސެނަލް އިން ނުކުންނަ މެޗުގެ ކުރިން ވާހަކަ ދައްކަމުންނެވެ. އެ މެޗަށް ނުކުންނައިރު އާސެނަލް ވަނީ ލީގު ތާވަލްގެ ދެ ވަނަ އަށް ވެއްޓިފަ އެވެ. އެއީ އެންމެ ފަހުން ވާދަވެރި މެންޗެސްޓަރ ސިޓީން ކުޅުނު މެޗު އެ ޓީމުން ކާމިޔާބު ކުރުމުންނެވެ. ނަމަވެސް ޗެލްސީ މެޗު ކާމިޔާބުކޮށް އާސެނަލަށް އަލުން އެއް ވަނައިގައި ދެ ޕޮއިންޓުގެ ލީޑެއް ނެގުމުގެ ފުރުސަތު އޮންނާނެ އެވެ.

އެ މެޗުގެ ކުރިން ވާހަކަ ދައްކަމުން އާޓެޓާ ބުނީ، އެންމެ ފަހުން ވާދަވެރި ސިޓީއަތުން ބަލިވި މެޗަކީ ބޮޑު މެޗެއް ކަމަށެވެ. އޭނާ ފާހަގަ ކުރި ގޮތުގައި އެ މެޗުގައި އާސެނަލްގެ ކުޅުންތެރިންނަށް އެންމެ އެކަށީގެންވާ ފެންވަރަކަށް ނުކުޅެވެ އެވެ. އެހެންކަމުން، އެ މެޗުން އާސެނަލް ބަލިވުން ޙައްޤު ކަަމަށް ވެސް އާޓެޓާ ވަނީ ބުނެފަ އެވެ. ނަމަވެސް އެކަން ޤަބޫލުކޮށްގެން ޓީމެއްގެ ގޮތުގައި ކުރިއަށް ދާން ޖެހޭ ކަމަށާއި، މިހާރު ފޯކަސް ހުންނަން ޖެހޭނީ ކުރިއަށް ހުރި މެޗުތަކަށް ކަމަށް އޭނާ ބުންޏެވެ. މީގެ އިތުރުން އާޓެޓާ ބުނީ އެންމެ ފަހުން ކުރިއަށް ގެންދިޔަ ފަރިތަކުރުންތަކުގައި ވެސް ފޯކަސް ކުރީ ސިޓީ މެޗުގައި ހެދުނު ގޯސްތައް ރަނގަޅު ކުރަން ކަމަށާއި، ކުޅުންތެރިންގެ ފަރާތުން އެކަން ފެނުނީ އޭނާ ހިތްހަމަޖެހޭ މިންވަރަށް ކަމަށެވެ.

ޕްރިމިއާ ލީގާ ގުޅޭ ގޮތުން ވާހަކަ ދައްކަމުން އޭނާ ބުނީ، މިހާރު އާސެނަލްގެ އަތްމަތީގައި އެއްވެސް ބާރެއް ނެތް ކަމަށެވެ. އޭނާ ބުނީ އާސެނަލްގެ އަތް މަތީގައި އޮތީ ކުރިއަށް އޮތް މެޗު ކަމަށާއި، އެހެންކަމުން އެ މެޗުން މޮޅުވާން ޖެހޭ ކަމަށެވެ. އޭނާ ބުނީ ކުރިއަށް އޮތް ތަނުގައި ވެސް އާސެނަލް ޖެހޭނީ އެ މަގުން މަސައްކަތް ކުރަން ކަމަށާއި، އެއާއެކު ސިޓީ ކުޅޭ މެޗުތަކުގެ ނަތީޖާ އަށް ވެސް ބަލަން ޖެހޭނެ ކަމަށެވެ. އާޓެޓާ ފާހަގަ ކުރި ގޮތުގައި އާސެނަލްގައި ތިބީ ވަރަށް ހުނަރުވެރި، މޮޅު ކުޅުންތެރިންނެވެ. އޭނާ ބުނީ ކުރިއަށް އޮތް ތަނުގައި ވެސް އާސެނަލްގެ ކުޅުންތެރިން ގުޅިގެން، ވަރުގަދަ ޓީމެއްގެ ގޮތުގައި މަސައްކަތް ކޮށްފި ނަމަ އެ ޓީމަށް ލީގު ކާމިޔާބުވުމުގެ އުންމީދު ބޮޑު ކަމަށެވެ.

މީގެ އިތުރުން އާސެނަލަށް ކުޅެމުން އަންނަ ފްރާންސްގެ ވިލިއަމް ސަލީބާއާ ގުޅޭ ގޮތުން އާޓެޓާ ބުނީ، ޗެލްސީ މެޗުގައި ވެސް ސަލީބާ ނުފެންނާނެ ކަމަށެވެ. އަދި ކުރިއަށް އޮތް މެޗަށްފަހު އާސެނަލް އޮންނަނީ ކޮން ހިސާބެއްގައިތޯ ބަލަން ޖެހޭ ކަމަށާއި، މި ހަފްތާގައި ސަލީބާ އަށް ކުރިއެރުންތަކެއް ނުލިބޭ ކަމަށެވެ. އާޓެޓާ ބުނީ އާސެނަލުން މެޗުގައި އެމީހުންގެ އަމިއްލަ ގޭމު ކުޅުމަށް އިސްކަން ދޭން ޖެހޭ ކަމަށާއި، އަމިއްލަ އަތް މަތިން ކަންކަން ގެއްލުމުގެ ފުރުސަތު ދީގެން ނުވާނެ ކަމަށެވެ.

ސިޓީ މެޗުގެ ކުރިން ލީގުގައި ކުޅުނު ތިން މެޗުން ވެސް އާސެނަލް ވަނީ އެއްވަރުވެފަ އެވެ. އެއީ ލިވަޕޫލް، ވެސްޓް ހޭމް ޔުނައިޓެޑު އަދި ސައުތެމްޓަން އެވެ. އާސެނަލްގެ ދަނޑުގައި އެ ތީމުން ޗެލްސީއާ ދެކޮޅަށް ނުކުންނާނީ އަންގާރަ ދުވަހުގެ ރޭ ދަންވަރު ރާއްޖެ ގަޑިން 12 ޖަހާއިރު އެވެ.