ޓީމު ވަރުގަދަކުރުމަށް އާސެނަލްއިން 150 މިލިއަން ޕައުންޑް ހޭދަކުރަނީ
1 މެއި 2023 | ހޯމަ 12:10އާސެނަލް އަންނަ ސީޒަނުގެ ޗެމްޕިއަންސް ލީގު ކުޅޭނެ
އާސެނަލްގެ ކީޕަރާއި ކުޅުންތެރިން ދަނޑުމަތީގައި. ލީގު ހޯދުމުގެ އަމިއްލަ ބާރު ވަނީ ގެއްލިފައި
އަންނަ ސީޒަނަށް ޓީމު ވަރުގަދަކުރުމަށް އާސެނަލްއިން 150 މިލިއަން ޕައުންޑްގެ ބޮޑު ބަޖެޓެއް ހޭދަކުރާނެކަމަށް އިނގިރޭސި ނޫސްތަކުން ބުނަން ފަށައިފިއެވެ.
ޕްރެމިއަރ ލީގު ކާމިޔާބުކުރުމުގެ ރޭހުގެ ކުރީގައި އެތައް ދުވަހަކު އޮތުމަށްފަހު މިހާރު ދެވަނައަށް ޓީމު ސޮއްސާލާފައިވާތީ އާސެނަލް މިހާރު ވަނީ ޓްރާންސްފަރ މާކެޓްގައި ގެންނަ ކުޅުންތެރިންގެ ކަންތަކާ އުޅެންފަށައިފައެވެ. އެއީ މެންޗެސްޓަރ ސިޓީއާ ޕޮއިންޓެއްގެ ތަފާތުން ދެވަނައަށް ވެއްޓުނުއިރު، ސިޓީއަށް އިތުރު މެޗެއް އޮތުމާއެކު ތަށި ނުލިބޭނެ ކަމަށް ބަލައިފައެވެ.
އާސެނަލްއިން ގަންނަން އެންމެ ބޭނުންވާ ކުޅުންތެރިއަކީ ވެސްޓްހޭމްގެ ކެޕްޓަން ޑިކްލައިން ރައިސްއެވެ. އޭނާ ގަތުމުގެ ވާދަވެރިކަން ބޮޑުވާނެކަމުގެ ބިރު އޮތަސް އާސެނަލްގެ ކޯޗު އާޓެޓާ ގަބޫލުކުރަނީ މިއަށްވުރެ އޭނާއަށް ކުޅުންތެރިޔާގެ ވިސްނުން އާސެނަލްއާ ދިމާއަށް އަނބުރައިލެވިދާނެ ކަމަށެވެ.
ރައިސްގެ އިތުރުން ބްރައިޓަންގެ މޮއިސް ސެއިސާޑޯއަކީ ވެސް އާޓެޓާގެ ޝައުގުވެރިކަން ހުރި ކުޅުންތެރިއެކެވެ. ޓީމުގެ މެދުތެރޭގެ އިތުރުން ޓީމުގެ ފަހަތާއި ގޯލްކީޕިންގ ޑިޕާޓްމަންޓްވެސް ވަރުގަދަކުރަން ޖެހޭކަމަށް އާޓެޓާ ގަބޫލުކުރެއެވެ.
ޕްރެމިއަރ ލީގު ތަށި ނުލިބުނުނަމަވެސް ހައެއްކަ ސީޒަނަށްފަހު، އާސެނަލް އަންނަ ސީޒަނުގެ ޗެމްޕިއަންސް ލީގުގައި ކުޅޭނެއެވެ.
