ލުކާކޫއާ އެކު އެއްބަސްވުމަކަށް އާދެވިއްޖެކަން ޔުނައިޓެޑުން ހާމަކޮށްފި

އެވަޓަން އަށް ކުޅެމުން އަންނަ ބެލްޖިއަމްގެ ފޯވާޑް ރޮމެލޫ ލުކާކޫއާ އެކު އެއްބަސްވުމަކަށް އާދެވިފައިވާކަމަށް މެންޗެސްޓާ ޔުނައިޓެޑުން ހާމަކޮށްފި އެވެ.

ޔުނައިޓެޑްގެ ރަސްމީ ފޭސްބުކް ޕޭޖު އަދި ޓުވިޓާގައި ލިޔުނު ޕޯސްޓެއްގައި ބުނީ ލުކާކޫއާ އެކު ޔުނައިޓެޑަށް އެއްބަސްވުމަކަށް އާދެވިފައިވާ ކަމަށާއި، އޭނާގެ މެޑިކަލްގެ ކަންތައް ވަރަށް އަވަހަށް ފުރިހަމަކޮށް އިއުލާންކުރެވޭނެ ކަމަށެވެ.

ލުކާކޫ ގެންނަން ޔުނައިޓެޑުން އެއްބަސްވެފައިވަނީ 75 މިލިއަން ޕައުންޑަށް ކަމަށް ރިޕޯޓްތައް ބުނެއެވެ. ޔުނައިޓެޑުން ލުކާކޫއާއެކު އެއްބަސްވުމަކަށް އާދެވިފައިވާއިރު، އޭނާ ހޯދަން ގިނަ ކްލަބްތަކުން މަސައްކަތްކުރި އެވެ. އޭގެ ތެރޭގައި އޭނާގެ ކުރީގެ ކްލަބް ޗެލްސީވެސް ހިމެނެއެވެ.

ޔުނައިޓެޑުން ވަނީ ލުކާކޫގެ އިތުރުން ރެއާލް މެޑްރިޑްގެ ހަމޭސް ރޮޑްރިގޭޒްވެސް ހޯދަން މަސައްކަތްކޮށްފައެވެ. އެހެންނަމަވެސް ޔުނައިޓެޑުން އޭނާ ހޯދުމުގެ މަސައްކަތް ހުއްޓާލާފައިވަނީ ރެއާލް އިން ހުށަހެޅި އަގު މާ ބޮޑުވުމުންނެވެ. ރެއާލް އިން ހާމޭސް ވިއްކާލަން ބޭނުންވަނީ 90 މިލިއަނަށް ކަމަށް ރިޕޯޓްތައް ބުނެއެވެ.

މިވަގުތު ލުކާކޫ އެމެރިކާގައި ޗުއްޓީ ހޭދަކުރަމުން އަންނައިރު، އާދީއްތަ ދުވަހު އޮންނަ ޔުނައިޓެޑުގެ ފަރިތަކުރުންތަކުގައި އޭނާ ބައިވެރިވާނެ ކަމަށް ބެލެވެއެވެ.

ޗެލްސީން 2014 ވަނަ އަހަރު އެވަޓަންއަށް ބަދަލުވި ލުކާކޫ ވަނީ ވެސްޓްބްރޮމް އަށް ވެސް ކުޅެފައެވެ. ޗެލްސީއާއެކު ދެ ސީޒަން ހޭދަކޮށްފައިވާ ލުކާކޫ ވަނީ އެ ޓީމަށް 15 މެޗު ކުޅެދީފައެވެ.

މީގެ އިތުރުން އޭނާ ވަނީ މިހާތަނަށް އެވަޓަން އަށް ކުޅުނު 219 މެޗުގައި 104 ލަނޑު ކާމިޔާބުކޮށްފައެވެ. މީގެއިތުރުން އޭނާ ވަނީ ބެލްޖިއަމް ޓީމަށް ކުޅުނު 57 މެޗުގައި 20 ލަނޑު ކާމިޔާބުކޮށްފައެވެ.