ކ.ގުރައިދޫގަައި ބާއްވާ އެންމެ ބޮޑު ފުޓުބޯޅަ މުބާރާތް ކަމުގައިވާ ރައްޒާގުބެ މޯރިއަލް ކަޕް ހޯމަ ދުވަހު ފަށަން ތައްޔާރުވެއްޖެ އެވެ.

މިއަހަރުގެ މުބާރާތުގައި ވަނީ ޖުމުލަ ހަތް ޓީމަކުން ބައިވެރިވެފަ އެވެ. އެއީ އެންމެ ފަހުގެ ޗެމްޕިއަން އެކްސިޓޯ އެފްސީ، އެންމެ ފަހުގެ ރަނަރަޕް ޗެލެންޖާސް އެފްސީ، އޯލް އެޓޭކް އެފްސީ، ސިކްސް އެކްސް، ކަންމަތި އެފްސީ، ޓިމެލޯ އެފްސީ އަދި ވެޓަރަންސް އެންޑް ރިވޮލިއުޝަން އެފްސީ (ވީއޭއާރު) އެވެ. މުބާރާތް ކުރިއަށް ގެންދިޔުމަށް ހަމަޖެހިފައި ވަނީ ހަތް ޓީމު ދެ ގްރޫޕަކަށް ބަހާލައިގެންނެވެ. އެގޮތުން ގްރޫޕް އޭގައި ހަތަރު ޓީމު އަދި ގްރޫޕް ބީ ގައި ތިން ޓީމު ހިމެނެ އެވެ. ގްރޫޕް އޭ ގައި ހިމެނޭ ޓީމުތަކަކީ، ޗެލެންޖާސް، ކަންމަތި، ސިކްސް އެކްސް އަދި ވީއޭއާރު އެވެ. ގްރޫޕް ބީ ގައި ހިމެނޭ ތިން ޓީމަކީ އެކްސިޓޯ، އޯލް އެޓޭކް އަދި ޓިމެލޯ އެވެ.

މުބާރާތް ކުރިއަށް ގެންދިޔުމަށް ހަމަޖެހިފައި ވަނީ މެއި މަހުގެ އެއް ވަނަ ދުވަހުން ފެށިގެން މެއި މަހުގެ 15 ވަނަ ދުވަހާ ހަމައަށެވެ. މުބާރާތުގެ ގްރޫޕް ސްޓޭޖުގެ ކުޅުން ނިމި، ސެމީ ފައިނަލްގެ ކުޅުން ފަށާނީ މެއި 11 ގައެވެ. ފުރަތަމަ ސެމީގައި ބައްދަލު ކުރާނީ ގްރޫޕް އޭގެ އެއް ވަނަ އާއި ގްރޫޕް ބީގެ ދެ ވަނަ އެވެ. ދެ ވަނަ ސެމީގައި ބައްދަލު ކުރާނީ ގްރޫޕް ބީގެ އެއް ވަނަ އާއި ގްރޫޕް އޭގެ ދެ ވަނަ އެވެ. މުބާރާތުގެ ފައިނަލް މެޗު ކުޅުމަށް ތާވަލްކޮށްފައި ވަނީ މެއި މަހުގެ 15 ވަނަ ދުވަހަށެވެ.

މި މުބާރާތަކީ އެރަށުގެ ފުޓުބޯޅަ ޗެލެޖެންޑު އަލްމަރުހޫމް އަބްދުއް ރައްޒާގު މޫސާގެ ހަނދާނުގައި 2015 ވަނަ އަހަރުން ފެށިގެން ބާއްވަމުން އަންނަ މުބާރާތެކެވެ. އެންމެ ފުރަތަމަ މި މުބާރާތް ބާއްވާފައިވަނީ "ތުއްތޮންބެ ކަޕް"ގެ ނަމުގައެވެ. އޭގެ ފަހުން 2019 ވަނަ އަހަރު މުބާރާތުގެ ނަން ވަނީ ރައްޒާގުބެ މެމޯރިއަލް ކަޕަށް ބަދަލުކޮށްފައެވެ.