އަލް ރައެދު ބަލިކޮށް، އަލް ނަސްރުން ފަރަގު ކުޑަ ކޮށްފި

ސައުދީ ޕްރޯ ލީގުގައި އަލް ރައެދާ ދެކޮޅަށް ކުޅުނު މެޗުން މޮޅުވެ އަލް ނަސްރުން އެއް ވަނައިގައި އޮތް އަލް އިއްތިހާދާ ދެމެދު ފަރަގު ކުޑަކޮށްފި އެވެ.

ހުކުރު ދުވަހުގެ ރޭ ކުޅުނު މެޗުން އަލް ނަސްރު މޮޅުވީ 4-0 އިންނެވެ. މެޗު ފަށައިގެން ހަތަރު ވަނަ މިނެޓުގައި އަލް ނަސްރުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. އެއީ އެ ޓީމުގެ ސުލްތާން އަލް ޣަނަމް ހުރަސްކޮށްދިން ބޯޅައެއް ބޮލުން ގޯލަށް ވައްދާލައިގެން ރޮނާލްޑޯ ކާމިޔާބުކޮށްދިން ލަނޑެކެވެ. އެ ޓީމުގެ އަނެއް ތިން ލަނޑަކީ ދެ ވަނަ ހާފުގައި ޖެހި ތިން ލަނޑެވެ. ދެ ވަނަ ހާފު ފަށައިގެން 10 ވަނަ މިނެޓުގައި އެ ޓީމަށް ލީޑު ފުޅާކޮށްދިނީ އަބްދުއް ރަޙުމާން ޣަރީބު އެވެ. އެއީ އޭރިޔާ ތެރެއިން ލިބުނު ބޯޅައެއް އަލް ރައެދުގެ ގޯލް ކީޕަރު ކައިރިން ގޯލަށް ވައްދާލައިގެންނެވެ. އަލް ނަސްރުގެ ތިން ވަނަ ލަނޑު މުޙައްމަދު މަރަން ޖެހީ މެޗުގެ 90 ވަނަ މިނެޓުގަ އެވެ. ފުރިހަމަ ވަގުތު ހަމަވެ އިތުރަށް ދެއްކި ވަގުތުގެ ހަތަރު ވަނަ މިނެޓުގައި، އަލް ނަސްރުގެ ހަތަރު ވަނަ ލަނޑު ޖެހީ ޢަބްދުލް މަޖީދު އަލް ސުލައިހީމް އެވެ.

މެޗުން މޮޅުވެ އަލް ނަސްރު އޮތީ ދެ ވަނައިގަ އެވެ. އެއީ ކުޅުނު 25 މެޗުން 56 ޕޮއިންޓާއެކު އެވެ. އަލް ނަސްރަށް ވުރެ އެއް މެޗު މަދުން ކުޅެގެން އެއް ވަނައިގައި އޮތް އަލް އިއްތިހާދަށް ލިބެނީ 59 ޕޮއިންޓެވެ. ލީގުގައި ބުދަ ދުވަހު އަލް ތާވޫނާ ދެކޮޅަށް ކުޅޭ މެޗުން މޮޅުވެ އިއްތިހާދަށް އެއް ވަނައިގައި ލީޑު ހަ ޕޮއިންޓަށް ފުޅާ ކުރުމުގެ ފުރުސަތު އޮންނާނެ އެވެ.