ރަންތާޖު ގުރުއާން މުބާރާތުގެ ފައިނަލަށް ދަތުރުކުރި ފަސް ބައިވެރިން އިއުލާންކޮށްފި
ރާއްޖެ ޓީވީއާއި ޔޫތު މިނިސްޓްރީ، އަދި އިސްލާމިކް މިނިސްޓްރީ ގުޅިގެން ކުރިއަށް ގެންދާ މި ޕްރޮގްރާމް ކުރިއަށްގެންދަނީ 6 އެޕިސޯޑަށް ބަހާލައިގެން
ރަންތާޖު ގުރުއާން މުބާރާތުގެ ފައިނަލަށް ދަތުރުކުރި ފަސް ބައިވެރިން
އިސްލާމިކް މިނިސްޓްރީއާއި ޔޫތު މިނިސްޓްރީ, އަދި ރާއްޖެ ޓީވީ ގުޅިގެން މިއަހަރުގެ ރޯދަ މަހަށް ހާއްސަކޮށްގެން ކުރިއަށްގެންދާ "ރަންތާޖު" ގުރުއާން މުބާރާތުގެ ފައިނަލަށް ދަތުރުކުރި ފަސް ބައިވެރިން އިއުލާންކޮށްފިއެވެ.
ހުކުރު ދުވަހުގެ ރޭ އޮތް މުބާރާތުގެ ހަވަނަ އެޕިސޯޑުގައި، މުބާރާތުގެ ކުރިއަށް އޮތް ބުރަށް ދަތުރުކުރާ ބައިވެރިންގެ ގޮތުގައި އިއުލާންކޮށްފައި ވަނީ
1) މުހައްމަދު ސާއީ މުބާރިކް، ނ. ހޮޅުދޫ
2) ޔައީޝް މުހައްމަދު ނިޔާޒް، މާލެ
3) ފާތިމަތު ތުގާ ހަލީމް، މާލެ
4) މުހައްމަދު މުސްތަފާ، ބ. އޭދަފުށި
5) އަހުމަދު ސުޖާއު، ހއ. ހޯރަފުށި
މުބާރާތުގެ ބައިވެރިން ވަނީ މިހާ ހިސާބަށް އާދެވެމުން އެކަމާ އުފާކުރާ ކަމަށް ބުނެފައެވެ. އަދި މުބާރާތުގެ ތެރެއިން ވަރަށް ގިނަ ކަންކަން ދަސްވިކަމަށް ބައިވެރިން ބުނެފައިވެއެވެ.
މުބާރާތުގެ ފަސް ވަނަ ބުރުން މުބާރާތަށް އަލްވަދާއު ކިޔާފައިވަނީ މުބާރާތުގެ ހަތްވަނަ ބައިވެރިއެއްގެގޮތުގައި ހޮވުނު މަރިޔަމް ޒަހުވާ އާދިލާއި ހަވަނަ ބައިވެރިއަކަށް ހޮވުނު އަބްދުﷲ ތާލިބުއެވެ.
ރޯދަ މަހުގެ ކޮންމެ ހުކުރު ދުވަހެއްގެ ރޭ 9:30ގައި ރާއްޖެ ޓީވީން ގެނެސްދިން މި މުބާރާތަކީ، އަގުހުރި އިނާމްތަކަކާއެކު ކުރިއަށްގެންދާ ޕްރޮގްރާމެކެވެ. އެގޮތުން މުބާރާތުގެ އެއްވަނައަށް ދާ ފަރާތަކަށް 3 ލައްކަ ރުފިޔާ، ދެވަނައަށް ދާ ފަރާތަކަށް 1 ލައްކަ ރުފިޔާ، އަދި ތިންވަނައަށް ދާ ފަރާތަކަށް 75000 ރުފިޔާ ލިބޭނެއެވެ. މި ޕްރޮގްރާމް ކުރިއަށްގެންދަނީ 6 އެޕިސޯޑަށް ބަހާލައިގެންނެވެ.
މުބާރާތް ކާމިޔާބުކުރާ ބައިވެރިއަކު އެނގިގެންދާނީ މި މަހުގެ 30ވާ އާދިއްތަ ދުވަހުގެ ރޭ އޮންނަ ފައިނަލް ޝޯއިންނެވެ. މި ޝޯ އޮންނާނީ އާދިއްތަ ދުވަހުގެ ރޭ 8:30ގައެވެ.
